:: صور حادث سيارتي , GoodBye My Accord ::
بسم الله الرحمن الرحيم
السلام عليكم و رحمة الله و بركاته , و بعد ...
أخواني , ما أدري كيف يدي ماسكة الـ كيبورد و جالس أكتب لكم , بصراحة أنا ماني مصدق إني طلعت منها سليم و لله الحمد . الحمد لله على كل حال ....
هذي صور الحادث حق سيارتي الـ Accord , الحادث صار يوم الإثنين الماضي و الطرف الثاني فيه هرب .
و دخّلني في عمود إنارة طوله 12 متر .
هذي صور الحادث ......
الحادث كان بشارع الأندلس في لفة بايخة دخل عليّا فيها تاكسي كامي و شطفني من الجنب اليسار و طلعني الرصيف و دخلت في العمود .
و الله يا شباب شفت و السيارة ما في غير أسمع أصوات الحكحكة من أسفل و شوي سمعت ضربة جامدة " العمود " و صوت الإيرباق و الريحة الخايسة حقته .
يوم صار الحادث واحد من أصحابي كان ماشي من نفس الطريق لأننا كنا طالعين على الجامعة و شاف سيارتي واقفة على الرصيف و العمود بجنبها و أنا لسى ما طلعت من السيارة , هو جاء و فتح الباب , الرجال يوم جاء و شاف إن ما فيني شي بكى لأني طلعت عايش و ما جاني شي .
الحمد لله على قضاء الله و قدره , و الله يا شباب إني ماني زعلان . بس إني تحمدت الله إني طلعت منها سليم .
السيارة و الهرجة من أولها لآخرها على التأمين و الحمد لله تأميني باقي فيه 10 أيام .
السيارة بايعها تشليح و جابتلي بحالتها هذي 20.000 ريال .
السالفة مو هنا , السالفة كلها في كشف قطع الغيار إللي طلعته من الوكالة قبل أمس و سلمته لشركة التأمين .
هذي صوره .... شوفو الصورة الثالثة كم إجمالي قطع الغيار .
هذي كانت صور تسعيرة قطع الغيار مع أنه لم يتم احتساب قيمة الـ 4 جنوط .
للعلم أنا مشتري السيارة بـ 78.000 ريال كاش .
الحمد لله على كل حال , و ربنا يعوضني بأحسن منها بإذن الله , أهم شي أنا طلعت منها و ما جاني شي و لله الحمد .
و الله إن العين حق
يا شباب , يوم تطلعون من البيت ما فيها شي إذا حبيت راس الوالد و لا الوالدة الله يحفظهم لكم و تطلب منهم دعوة و لا دعوتين , و تحصنون أنفسكم .
و الله يكفينا و ياكم شر الحوادث .
