عاجل تحذير من التعامل مع مؤسسة النعماني لقطع الغيار

في البداية غرني اعلانهم في الاعلى على الرقم الخاص بفرعهم بالرياض سائلا عن بعض القطع فرد علي شخص يماني وقال بان القطع موجوده فقط حول لنا المبلغ وترشسلها لك بالزاجل وكان ذلك باسلوب مهذب ويرد عليك من اول اتصال. اعطاني رقم الحساب والاسم في بنك الراجحي(215608010105303 مختار حسن)
الحقيقة لم يكن لي حساب في بنك الراجحي الا انني وللسعة في التحويل طلبت من احد الاقارب التحويل للشخص المذكور فنفذ التحويل فورا كان ذلك بتاريخ 2-7-2010 واتصلت به بتاريخ 3-7 -2010 وافادني بانه تم الارسال عن طريق الزاجل غدا انشالله تكون عندك
من الغد اخذت ليموزين ورحت لفرع الزاجل قالو ماوصلنا شي جيتهم باليل مرة ثانية قالو نفس الكلام جيتهم من بكرى نفس الوضع فشكيت بالموضوع لا سيما وان السيارة بالورشة خالصة بس تنتضر بعض القطع علشان يركب الصدام الامامي المهم دقيت على اليماني قال اني مرسلها ومادري كيف ويعطيني رقم بوليصة وارجع للزاجل بعدها ب 6 ايام واحاول مهم وندور بالسجلات مافيه فايده وبالاخير دق الموضف على الادارة قالو الرقم حق بوليصة الشحن موب صحيح
ادق على النعماني مرة ثانية ماحد يرد لان الموضف عرف رقمي والله العضيم اني في احد الايام دقيت بدون مبالغة تقريبا 80 مرة وكلهن يشوف الرقم ولا يرد مع انه كان بالاول يرد على طول . حاولت ادق على باقي الارقام ماحد يرد
انا احذر الشباب من التعامل مع محلات النصب والاحتيال هذي
والله العضيم ان السيارة الان خالصة لها تقريبا 9 ايام بس انتضر ذالقطع تجي وماجت لان الموضف اصلا مارسلها
لكن وين يروح من ربه

حسبي الله ونعم الوكيل ..

الله يكون بعونك أخوي الغالي ..

طيب رحت للمؤسسة وتفاهمت معآهم ؟ ؟

وتسلم على التنبيه ..

والله لو انا مكانك وعارف ان هالشخص يشتغل بمكان محدد وفي اي وقت بحصله بالمحل لانزل له واعلمه كيف ينصب علي !

لاتسكت عن حقك :)

ما اقولك الا قضاء وقدر وخلها على ربك
لكن عندي لك حلو >>>>>> ابعدوا عنه ولد الضابط
رح اشتكي عليه عند الحقوق المدنيه وحقوقك ترجع باذن الله

اذا اك قريب في المدينه الي فيها المحل وصه يروح يعلمهم شغلهم

سررررق عيني عينك حسبي الله عليهم

يآخوي كل دقه بــتعليمهـــ وتـسذآ الدنيآآآ

وحسبي اللهـ وهو نعم الوكيل ولآ تخآآف حقك بتآخذه بتآخذه سوآ في الدنيآآآ ولآ بالآخرررهـ

ونصيحه : لآ تتعآمل مع محل آلين مآ تشوف فرعهم وتعرف مكآنه عشآن مآ يغشوونكـ

ولآ تثق في آحـد مهمآ كآن الدنيآ وآنـآ آخووك مو مثل آول من يوم خشو علينآ الاجآنب والسعوديه ع الدنيآآآ السلآم

شوف لك اي قريب بالرياض وعطه معلومات المحل وهوا يلعن اخر رقم له ويطلع حقك دبل من صاحب المحل

حسبي الله ونعم الوكيل
ملعون صير عيني عينك سرقة !!!!!
المهم لا تخليه وانا اخوك رح له او وصى اي قريب لك يعرف مكانه ومثل ما قال اخوي كل صفقه بتعليمه اصلن من المهبول في هالزمن يثق بالغريب لكن لا تخليه تكفى لا تخليه رح وخذ حقك واكبر قهر ان لطعك وسفهك معاااد رد عليك .....

والله غريبه سبق وتعالمت معهم وكانو قمة في الاخلاق ونفس الشي طلبت صدااام وارسلوها لي على جيزان ما اخذ الشحن يومين

وين إدارت النادي عن هذا الموضوع ..؟

أكيد هم يعرفون المحل ويعرفون صاحبه ولا كان ماسووا له هالإعلان

وان شاء الله بترجع لك حقوقك والمال الحلال

ماتاكله النار :rolleyes:

والله يا اخوي بعد صلاة العشاء اليوم انا عنده عكس كلامك الرجال محترم . وانا ماخذ منه قيل يومين ريديتر صيني وكنت متردد ولا قلتله اني متردد واليوم رحت للمحل شاااايل هم لاني برجع الريديتر واول ما دخلت عليه قال حياك الله وش المشكله ؟؟؟

قلت كذا حبيت اصلح اللي عندي قال مافيه مشكله ورجعه ولا قال شي ؟؟؟

بصراحه محترمين . بس انت وانا اخوك المفروض ما تعتمد على احد يعني ممكن توصي احد يشتري القطع و يرسلها لك

وبيني وبينك انا شاك بمركز الشحن تراااااهم دايم يضيعون البضائع





والله يعينك



لو وصيتني اناااااااااا حاضر

__________________

ياخوك لو صادق في كلامك ... روح إلعن أبو خيرهـ
المشكلة لمن تجي الواحد منا مشكلة ... مايعتمد على نفسه
يبي الآخرين يحلونها له
أشكرك على تحذيرك للشباب منهم .,
بس ليه ما تروح عندهـ وتتفاهم معهم بحكم إنهم شركة معروفة وليسوا محل أبو ريالين


تقبل مروري بكل أريحية

احس انك تسرعت بالحكم عليهم. العادة البضاعة المرسلة من زاجل تاخذ يومين بالكثير ونادرا ما توصل في يوم واحد!!
لا تخاف وان شاء الله حقك ما يضيع.

طيب ياليت ترسل اثبات لصحه كلامك ونجيب لك حقك

الكلام سهل جدا بس الاثبات ياكد صحه كلامك

* ارسل صوره التحويل مع ارقام الاتصال والا بيحذف الموضوع

اليوم اتصلت على الرجال وتفاهمت معه وقالي ان البضاعه مرسله وعنده السند لكن الخطا من شركه الشحن

وانه اتصل على المسؤل بالرس وعطاه رقم الاخ علي وبيتواصل معه عشان يعرف سبب التاخير لانه من المحتمل انه تكون ركب سياره شحن بالخطا لمدينه ثانيه

وقالي تعال عندي اعطيك صور الشحن واثباتها ولا ارسلي رقم فاكس ارسلها عليه عشان اثبت لك

طبعا الاخ علي بيتاكد وبيتواصل مع المدير للشحن بالرس ويعطينا اخر التفاصيل

والله يخوك شي يقهر حتى لو ان الي راح عليك ريال !

وكلام اخونا المسافر يطمن القلب

بس نفسي اعرف عضويتك الاولى ليش ما تفتح معك :confused: ؟

ومتابع للموضوع حتى النهايه

طيب اذا كان الرجال رسل البظاعة ليش مايرد على الاخ علي ويشرح له المشكلة
ويعتذرله بالنيابه عن شركة زاجل للاخ علي عشان يطمئن

اقتباس:

---

المشاركة الأصلية كتبت بواسطة عبودي 2009

طيب اذا كان الرجال رسل البظاعة ليش مايرد على الاخ علي ويشرح له المشكلة
ويعتذرله بالنيابه عن شركة زاجل للاخ علي عشان يطمئن

---

من جد ..

وسالفه اذا تبي تشتكي اشتك ..


السالفه فيها تلاعب .. < والله اعلم ..

^^^^^^^^

اقتباس:

---

دقيت بدون مبالغة تقريبا 80 مرة

---

عرفت ليش صاحب المحل ما يرد.
يا اخوان انتم داخلين تحرشون بينهم والله ما يجوز الي تسونه.

مبروك وتم حل مشكلتك وعقبال وصول البظاعه

اخوي أهم شي لا تخليه لو انشاء الله تروح مشوار للمح لو بالطيارة وتروح لهاليمني ولا تطلع إلا بعد أخذ حقك

وجرب دق عليه من جوال آخر إذا رد عليك قله تراني جاي لك وراح أشتكيك <<<< خوفه

اقتباس:

---

المشاركة الأصلية كتبت بواسطة ِali2008

عزيزي ابو ابراهيم
اذا ماناسبك العنوان موب بالضرورة انك تدخل الموضوع
اعتقد انه منتدى حواري نسمع فيه اراء الاخرين ووجهات النظر وخبراتهم
عزيزي ابو ابراهيم ليتك يم كنت تتابع مواضيعي كنت تقراء كويس وعرفت ان الموضوع السابق ((مغلق))
بالنسبة للثاني الي انت تقول,كان مكرر بالغلط موب عمدا لانها اول مشاركة لي فماني خبير بتنزيل المواضيع وذا الغلط بالذات يتكرر بشكل كبير في المنتديات الحوارية موب جديد ولا غريب
و المشرف مشكورا قام بحذفه
آمل انك ماتكون كتبت المشاركة على سبيل التندر وللمعلومية انا ماكتبت الموضوع وتابعته استجدي احد علشان ارجع قرشين ولا استجديت احد ذلك بل المشرف مشكورا اخذته النخوة ووعد بارجاع المبلغ
انا كتبته احذر زملائي اعضاء المنتدى من الوقوع بنفس الخطا

---

أولاً هذا ليس منتدى حوراي هذا منتدى وملتقى ملاك الهوندا والمنتديات الحوارية بعيدة كل البعد عن هالمنتدى , ممكن تقول منتدى تبادل خبرات وتجارب وممكن نصائح أما حوار !!

ثانياً أنت لو قرأت ردي جيد ماكان كتبت انه تندر أو شككت في ذلك , وعلى فكرة ما احد ينكر عليك او يلومك يومك تنصح الاعضاء وحتى لو حاولت تبحث عن من يفزع لك في مشكلتك بما انك مو في الرياض .

أتمنى ان لايكون لهذه المشكلة تاثير على ردودك او تسرعك في الحكم على الاخرين .

الى اللقاء .

اقتباس:

---

المشاركة الأصلية كتبت بواسطة أبو غيوض

مبروك وتم حل مشكلتك وعقبال وصول البظاعه

---

الرجال دق علي جوالي امس وقال لي انه معطيه الزاجل ويبي يرسل لي صورة السند بالفاكس
الزاجل يقولون ما ارسله ولا شفناه.

مبروك على ايش ايش اسوي انا بصورة السند ! الزقها قدام الاديتر مكان الصدام !!!
*
عطاني رقم واحد بالامس قال ذا بيسلمك البضاعة بالرس روح له دقينا على ذالواحد قال انا باجازة اداوم بعد ثلاث ايام تعال واشرح لي مشكلتك وانا بدوري ادق على الرياض اشوف ايش ردهم !!!

عاد انشالله ادق عليه بعد بكرى انشالله اذا كان مداوم اروح اشرح له المشكله عاد هو بيكلم الرياض وبيقولون عطنا وقت نشوف وش السالفة هل فعلا فيه شئ ولا لا واذا فيه وين راحت القطع بعدبن نرد لك وانت تابع معي كل يوم ............

عرضت على مختار اليماني انه يرجع لي المبلغ علشان اشتري قطع من الوكالة ولا اتعطل بدون سيارة اكثر من كذا وهو يتابع مع الزاجل على اقل من مهله و يسترجع القطع لمستودعه اذا كان فعلا مرسلها فمارحب بالفكرة !
احب اكرر انا مانزلت ذالموضوع الا تنبية وتحذير للاعضاء بعدم تحويل المبالغ للشخص او المؤسسة المذكورة من فوقها ما يرد عليك ولا يقو لك رح اشتك !!
شف لك احد يروح لهم وسلم واستلم

الاخ المسافر اهتمامك محل تقدير.

أخوي صاحب الموضوع

اولآ السلام عليكم ورحمة الله وبركاته

أنا قرأت موضوعك قبل أمس وشدني الموضوع وإندهشت بصراحة لأني كنت أعزم على شراء فحمات من النعماني وبعد قراءة الموضوع

صار عندي حالة شك وأكاد أجزم بأن هناك خطأ أو سوء فهم من إحدى الطرفين على كل حال إتجهت بالأمس لفرع النعماني بحي العنوز

بالصناعية القديمة و أخذت الفحمات و تطرقت مع الأخ مختار عن موضوعك و كان عنده علم بأنك كتبت الموضوع بقصد تشويه سمعة

المحل و أفادني بأن المشرف المسافر إتصل به و تناقش معه بخصوص موضوعك وأفادة بأنه تم شحن بضاعتك عن طريق زاجل لترحيل

البضائع و شفت الفاتورة بعيني و أفاد بأنه على إستعداد تام بإثبات إرسال بضاعتك لزاجل بصورة منها و أن الخطأ خطأ الزاجل ولا يوجد عليه أدنى

مسؤلية . ثمرة الكلام أن بضاعتك ذهبت لمدينة أخرى بالخطأ و الخطأ وارد و بحكم تعاملي مع شركات الشحن حصل لي ما حصلك

وبالنهاية بضاعتي رجعت لي و قمت بإرسالها مجددآ لذا عليك التواصل مع مكتب الزاجل بالرياض وراح ينحل موضوعك بأذن الله

ولكن صاحب المحل الشهادة لله رجل محترم جدآآ وآمين و أرى أنك إستعجلت بالحكم عليه ولا ألومك صراحة وهذا شي من حقك

أن تشك و إللي مايعرفك مايثمنك ولكن الآن إتضحت الصورة و إن شاء الله ترجع قطعك بأسرع وقت ممكن ...................

للإحاطة والله الذي لا إله إلا هو إني ما أعرف الرجال و لا بيني وبينه أدنى علاقة اللهم إني مريت مثلي مثل أي زبون وأخذت غرضي

و سألته عنك فقط لا غير وحبيت أن أوضح لك بعض الأمور والشكر موصول للمشرف المسافر لأهتمامه بموضوعك وكفى ووفى

تقبل مروري مع خالص تحياتي

علمنا اذا وصلتك قطع الغيار ؛؛

عشان نتأكد أنه تم حل المشكلة ..

الله يعينك

صراحة تعامل راقي جدا من النعماني بالشرقية واظنه نفسه راح يكون بالرياض وهذي كلمة حق لازم تنقال

واخوي روح لزاجل واخرشهم خرش وخلهم يعترفوا وين ودو القطع وفي اي مدينة

لا تتعب روحك وتروح لزاجل كل مره تخسر حق اللموزين ..

اول ماتوصل القطع .. راح يتصلون عليك

السلام عليكم ورحمة الله
اليوم مريت الزاجل المساء واسالهم عن القطعة قالو موجودة واننا ندق عليك جوالك مقفل !! قلت لا قفل ولا شي هات القطع بس . قال جب 10 ريال اول . قلت خذ عشرتك لو انتم شاحنينها على حمار كان مداها وصلت قبل اسبوع بعد لكم وجه تبون دراهم قبل لاتردون السلام.
قلت لهم وش الي صار وش السالفة قبل عشر ايام تقولون الايصال كذب واليوم موجوده قالوا خذ القطع يارجال واستر علينا حصل لخبطة مانبغى نقولها.
كنت باكلم مختار الي بالمحل حق النعماني ولا الرجال يسبقني ويدق علي قال استلمتهن قلت الله الله
قال انا عاتب عليك انك كتبت بالمنتدى
قلت موب مشكله يا مختار انا ذكرت الي واجهته وكل انسان يذكر ما واجه
قال بس موب ذنبي انا قلت لك ان معي ايصال
قلت ذنبك اني ادق عليك باقول لك اني رحت بايصالك للزاجل قالو موب صحيح وادق عليك الى 80 مرة ببعض الايام ولا ترد
انت بتصرفك ذا فتحت باب الشك على نفسك
الرجال اعتذر انه الشغل ماشالله كثير مرة والعمال قليلين فمافي فرصة يرد على الهاتف وياخذ ويعطي اكثر من الي كان
المهم كل شخص تفهم موقف الاخر وبالنهاية هو قد اخذ دراهمه وانا وصلتني القطع.
لكن احقاقا للحق مختار سوى اتصالاته مع الزاجل وتابع ورى القطعه لين وصلت للزبون وذا جهد يشكر عليه الحقيقة.

وان كنت اتمنى انه كان من اول ماتاخرت القطع وكمان لكل زبون يشتري عن طريق الشحن ولا تاصله القطعه
موب بس لي انا لاني اثرت موضوع ايقاف الشراء عن طريق الشحن من النعماني في المنتدى ووتفاعل غالبية الاعضاء الذين شاركوا بالموضوع بل وراح اشخاص لحده بالمحل وتحدثوا معه .ودق عليه مشكورا الاخ المسافر
على العموم تصافينا وانا حتى الان لازلت انصح ان الواحد يروح يشتري القطع بنفسة وسلم واستلم

^^
يالله بسيط وعادة هالاخلاق تجي لما تكون السيارة في الورشة ومتعطل اسألني انا

مبرو على استلام القطع وصراحه محتاج قطع من الرياض من النعماني وابي يرسلها جازان ومن يوم شفت الي حصل لك خفت وهونت والله يخارجنا

هههههههه
علي
يا حبي لك
المحل معروف والارقام معروفة
فـ مستحيل انه يغشك او ينصب عليك
اللي يبي ينصب عليك يبي يكون شخص ماتقدر توصل له
بس انه محل ومعروف بشكل كبير
ما اتوقع يسوي هالشي
ثانيا انت معك اوراق وكل شي والتحويلات وارقام التلفونات ومكالمات
يعني ما فيه امل ينكرون عليك شي
دايم يصير الخطأ

انا مثلك صارت لي سالفة مع زاجل بسبب هالحركة
تأخير وتضييع
بس الحمدلله ما كانت السيارة بالورشة والاخلاق مطينه
ههههههه

بالتوفيق
اول ما قريت الموضوع كنت أبي اقول لك عطني رقم تلفونك واشوف لك السالفة شخصيا
بس الحمدلله
بآخر الموضوع انحلت
بالتوفيق

اخوي انا اشتريت ستاير من عند اكورداوي (خالد) وارسلها من شركة الزاجل اخذت عشرين يوم لين وصلت يقولون لقوها في فرع مكة كيف وصلت مكة وهي مرسوله الى المدينة ما ادري

بالتحديد زاجل تعاملهم سيئ ..

وماعندهم اهتمام بالبضائع ...

شاري جنوط من عدنان ..

يوم وصلت .. اناظر فيها الا سادحين الجنطين على الزفلت وتحفرت شوي وبعض المشوخ ..

والجنطين الباقيه ماجاهم شي لانهم حطوها فوق

السؤال المهم الان للأخ صاحب الموضوع :

لما واجهتك المشكلة تسرعت واتهمت المحل والرجال ونزلت بدال الموضوع 3 مواضيع وتكلمت كلام كثير عن المحل , والان بعد ايضاح الحقيقة لم تفكر حتى باتنزيل موضوع مستقل ولو واحد مو ثلاثة تبين خطأك وتراجعك وتبين المشكلة واللبس ؟؟

والحمد لله على وصول البضاعه لك .

ابو ابراهيم...
انت شاركت بذالموضوع 3 مرات كلهن للاسف فيهن غمز ولمز تارة و تهجم تارة علي انا شخصيا
ولو كان ماتكتب عن نفس الموضوع المطروح ابداء راي وراي أخر او تفيد بخبرة معينه لكنت تقبلت ذلك منك بسعة افق
ولقد شرحت لك سالفة ال3مواضيع التي تغني بها ولكنك لا تفهم والمشكلة انك لا تفهم انك لا تفهم بل والمؤلم انك لا تريد ان تفهم
بدلالة محموع كتاباتك التي ياسف الشخص عندما يقراها فانت تتعمد الاسائة والاسقاط من شخص لا تعرفه ولم تتعامل معه بدون التطرق للب الموضوع وتفيد برايك سواء بالتاييد من عدمه مثل بقية الاعضاء
وهو مالمسته منك بعد اول رد وتأكد لي بعد ردك الثاني مما جعلني اتجاهل الرد على كتاباتك واسقاطاتك احتراما للمنتدى
انا لم اخطئ عندما حذرت الشباب فقد ذكرت ما واجهت ان كنت تفه
ولم افتري على الرجال فقد ذكرت ماواجهت منه بالاول والاخير سواء من امر ينتقد عليه او يشكر عليه
ولقد والله تعمد تجاهل الرد عليك بلاني ارفع نفسي والمندى عن مثل هذه المهاترات بل وقلت لك لست مضطرا لدخول الموضوع لكنك للاسف شخص غريب النوايا.
على العموم لن ارد عليك بعد الان مهما كتبت وان كنت تريد ان تثبت للقراء انك تفهم فامنع اسقاطاتك تقديرا للمنتدى

اقتباس:

---

المشاركة الأصلية كتبت بواسطة أبو ابراهيم

السؤال المهم الان للأخ صاحب الموضوع :

لما واجهتك المشكلة تسرعت واتهمت المحل والرجال ونزلت بدال الموضوع 3 مواضيع وتكلمت كلام كثير عن المحل , والان بعد ايضاح الحقيقة لم تفكر حتى باتنزيل موضوع مستقل ولو واحد مو ثلاثة تبين خطأك وتراجعك وتبين المشكلة واللبس ؟؟

والحمد لله على وصول البضاعه لك .

---

اخوي ابراهيم لا يكون المتحدث الرسمي بمحل النعماني
او انك تحاول تدافع عنه بأي طريقه
المحل غلط ويستاهل ما يجيه
لأنهم ماردوا وطنشوا
والمحل يتحمل خطاه
يتعامل مع شركه زفت
لنقليات البضائع
*****
اخوي علي صراحه ما يلحقك قصور
حقك ومن حقك تطالب فيه
وهم جابوا العيد والسمعه
لهم مو انته
****
المؤسسه النعماني المفروض تعاملها يكون راقي جدا وعدم التطنيش وعدم الظهور بمظهر البراءه من المشكله لأنها طنشت العميل وهوا محول دراهمه لهم
************************
اتمنى من المشرف اقفال الموضوع نهائيا بعد حل المشكله
:mad::mad::mad::mad::mad::mad::mad::mad::mad::mad: :mad::mad:
وكل تاخير في اقفال الموضوع يتسبب بحدة نقاش بين الاعضاء
ليس لها لزوووووم
:p:p:p:p:p:p:p:p:p:p:p:p

طيب مدام المشكله انحلت ليش مايتقفل الموضوع ..؟

المشكلة انحلت :d

بس باقي مشكلة الاعضاء .. مشاكلهم ماتنحل :d

ياخي غالين ويقولون ان عندهم تخفيض ل أعضاء المنتدى وهم كذابين شفت غيرهم وعرفتهم

ترى الخصم اللي يسويه يسويه لاي شخص يجيه مو شرط من المنتدى ..

والخصم كم ..10 او 5 ريال ..

لا يغركم ..

الرجال منزل اعلان هنا عشان يمشي سلعته لا اكثر ولا اقل ..

زيه زي محلات العازل وغيرهم ..