زيت هوندا ...

سيارتي مبدل ليها زيت وتعرفو طبعا تبديله بسيفون وتبديله بدون سيفون صح ..

المهم انا اخر تبديله كانت بسيفون ...

ماشي على الزيت 4 الاف كيلو رحت البنشري شيكت على الزيت اشوفه ناقص نص علبه ؟؟؟

:(

وش مشكلة زيت هوندا مع العلم بأنني بدلت بترومين الترا 7 بس واحد نصحني قال لي ارجع لزيت هوندا افضل للسياره ..

طبعا اليوم بدلت زيت وسيفون بترومين الترا 7 ( 20w 50 ) مع العلم ان زيت هوندا لزوجته ( 15w 40 ) يعني الزيت الجديد اقوى من ناحية اللزوجه وانشالله ما ينقص مره ثانيه

فيا شباب احذرو لا تطولو على زيت هوندا اكثر من 3 الاف كيلو مع العلم ان مشاويري كلها داخل المدينه وما اسرع نادرا اطلع طرق سريعه

وانا لحضت هذي المشكله واغير الزيت كل 3 الاف

زيت سوبر جي تي فوكس ((يمشيك خمسة الاف)) وبسس :cool:

انا بدلت بترومين الترا 7 وانشالله يكون افضل من زيت هوندا لان زيت هوندا غير مناسب ابدا مين الي فاضي كل مابين فتره يبدل زيت

معقول انا امشي بالسيآرة 5-7 الآف واروح اوديهآ الشركة اغير زيت هنآك !!! كذآ يصر بالسيآرة يعني ولا كيف !؟

احسن لك ادا كنت تستخدم زيت هوندا بدله كل 3 او 4 الاف لانه ينقص

الافضل ان نتبع كلام الكتالوج او الوكالة

كل 5000 كم تغير الزيت والفلتر

والتغيير يكون بالوكالة اضمن من الورش والمراكز

بالتوفيق للجميع

انا سيارتي هوندا اكورد ماشية 98 الف ماشاء الله عليها وكل خمسة الالف ابدل زيت مع سيفون وامسك خطوط ومشاوير طويله ولله الحمد مانقص علي بس اهم شيء ان الواحد مايقوم يدعس بالسياره واجد ولا يحنحن عليها

ترى حتى زيت الترا 7 ينقص <<< أسأل مجرب وينقص اكثر من زيت هوندا طبعآ 6 سلندر عندي واخرتها رجعت لزيت هوندا

كم تمشي على الخطوط 140 - 160 ؟

على حسب احيانا 120 احيانا 160 احيانا 180 على حسب فضاوة الطريق ...

بس ماتوقع بنقص زي زيت هوندا احسه فاطس قايم قاعد 3 الاف تمشي عليه

بس انا قليل ادا طلعت خطوط يعني 4 الاف كيلو 100 كيلو طرق سريعه والباقي داخل المدينه والجو بارد ورجولي مو حاره ع الدعسه يعني حتى لو سرعت اسرع شوي شوي مو مره وحده

مشكوووور على النصيحه ويعطيك العافيه والله , , , هذي اول مشاركه لي في المنتدا وانشالله ما تكون الاخيره ,

بخصوص زيت هوندا انا عندي ينقص بعد 3500 كيلومتر

جربت زيت موبيل اكس اتش بي نفس لزوجة زيت هوندا وللأسف نقص نص علبة بعد 3 الآف

جربت زيت الترا 7 ونقص بعد 3 الآف

وتوني الشهر الماضي رجعت لزيت هوندا لأني شفته أفضلهم بالنقصان بعد 3500

طبعآ في الخطوط انا والله دايم 160 وحسب البحث السرعه هي سبب النقصان لأن الزيت يحترق اسرع ويصير فيه نقص

طبعآ بعد ساهر الظاهر ان زيت هوندا راح يمشيني 5 الآف بالراحه

وسبحان الله في ناس ماينقص عندهم ماشاء الله تبارك الله على مواترهم

والمشكلة متأكد من ماكينة السيارة وترى لاحظت النقص من أول ماطلعت الموتر من الوكالة ومشيت عليه 1000 وبعدين 5 الآف ولاحظت النقص وقلت يمكن عيب في الماكينة ورجيت الوكالة وفحوصات وغيره وكل شي تمام

اخوي عنده كامري كان يشتكي من النقص وبدل الزيت من زيت تويوتا الى زيت موبيل علبة حديد ذهبيه

ويقول ممتاز وماشاء الله عليه يوميآ يداوم مجموع الروحه والرجعه 140 كيلو والموتر ماشاء الله ماشي فوق الـ 250 الف ومايشتكي من النقص وينصحني فيه لكني مش مقتنع لأنه يعتبر ثقيل شوي على ماكينة الهوندا

معقوله تنقص زيت :confused:

بس انا دايم اشيك ما القاه ينقص وهو زيت هوندا واغيره كل 5000كم

المباشر متى تشوف العيار اذا السياره بارده ولا حاره عشان اجرب.

ايه تنقص زيت خصوصا زيت هوندا انا لاحظت كثير انها تنقص زيت يعني تمشي 4 الاف تلاقيه ناقص نص علبه ...

انا الحين بجرب الترا 7 وبعطيكم النتايج بعد ما امشي عليه 5 الاف كيلو ...

احس حتى الزيوت ومكاين السيارات صارت مضروبه وفيها عيوب وادا فعلا العيب في مكينة هوندا فالواحد ياخد له هونداي احسن له رخيصه حتى لو كان فيها عيوب برضو رخيصه وتستاهل سعرها ومواصفاتها حلوه احسن من تاخد سياره غاليه وبدون مواصفات وتنقص زيت و تصرف فحمات و قطع استهلاكيه وفيها مشاكل في علبة الباور

احسن زيت كاسترول الخفيف من شريت السياره وانا عليه
ينقص بعد 4000 وفوق

الحين بديتوا سب وشتم بمكينه الهوندا

الزيت يمشيك مايقل عن 5000 كيلو بدون مشاكل

بلاش تشككون الناس الموسوسه

^^^^^^^^^^^^^^
:d

المسافر بس تنقص زيت سيارات واجد تنقص زيت احنا نقول كلام واقعي ؟

اعرف قروب الرياض كله وبموديلات مختلفه ولا احد يشتكي من النقص

ومن ضمنهم ناس توصل 10 الاف بزيت هوندا وتوصل 20 الف على زيت كاسترول ماجناتيك

طيب ونقص نص علبة وش المشكلة

أبي أسئلك سؤال

إنت تقول عقب الثلاثة ينقص نص علبة

طيب جرب وكمل لأربعة آلاف يعني زودها ألف وشوف هل فعلا زاد النقص عن نص علبة أو ظل على حاله

أخوي

المشكلة موبالزيت أو بالماكينة

المشكلة فيك إنت لمن تعبي الزيت ماتدري عن المعيار هل هو مظبوط مية بالمية وإلا زائد

الحين احنا نشوف المشكله انا شيكت على الزيت وهو مظبوط 100% وغيرت نوع الزيت الى توعيه لزوجتها اعلى ونشوف ...

اقتباس:

---

المشاركة الأصلية كتبت بواسطة ma6ansh

معقوله تنقص زيت :confused:

بس انا دايم اشيك ما القاه ينقص وهو زيت هوندا واغيره كل 5000كم

المباشر متى تشوف العيار اذا السياره بارده ولا حاره عشان اجرب.

---

دق سلف طال عمرك وخل الموتر يحمى

بعدين طفه واحسب له 3 دقايق او دقيقتين لكن الصحيح 3 دقايق وشوف العيار

الله يسهل امركم

اي سيارة يصير فيها تبخير للزيت وهذا شي طبيعي وموجود في الكتالوج وهذا جزء من التشغيل الطبيعي للسيارة

ونقصان الزيت لا يعتبر شيء شائع في الهوندا ابدا والزيت اللي يتبخر ينقص عن المؤشر شي خفيف وهذا ما يعتبر خطر على السيارة

لابد انها ما تنزل عن المؤشر الثاني وهو المهم للسيارة

أنا أشوف إن الزيت ماله علاقة المشكلة تكون إما من المكينة أو من التعبئة أو العيار والسيارة حارة

وأنا مجرب زيت هوندا و زيت كاسترول و زيت سوبر جي تي كلها مانقصت معي مع إني راعي خطوط وسرعات عالية

بدت الوسوسة

انا ما اغير الا فوق الـ 5000 زيت هوندا
زيت هوندا اذا كان الطقس بارد يمشيك حوالي 10000 كلم
اما في الطقس الحار 5000 كلم

صدقوني في عدة أشياء تكون هي السبب في نقص الزيت .... ومنها : -

1 - عند تغيير الزيت قد تكون كمية الزيت الجديد ناقصه بشيء بسيط ، مما يشكك في أن الزيت أصلاً ناقص .
2 - هناك أنواع من الزيوت متواجده في السوق ( مغشوشة ) يعني مكرره من زيوت قديمة ومستخدمة ومعادة التصنيع ، مما يسبب في تبخير الزيت بشكل سريع ، ويؤدي إلى تخبيط المكينه .
3 - السرعات العالية في معظم السيارات ( فوق الـ 160 ك / س ) تسرع في عملية تبخير زيت المحرك ، وقد تكون الأكــــــــورد من ضمنها .
4 - قد تكون هناك إحتمالات تهريب زيت من كرتير المكينه ( غطاء أسفل المكينه ) ، أو سره تغيير الزيت أو أحد خراطيش الزيت ، دون الإنتباه لذلك .
5 - سوء الاستخدام والدخول في المقاومات والسباق يؤدي إلى سرعان تلف الزيت وتبخره .
6 - طول مدة تغيير الزيت إلا إذا كان من النوع ( التخليقي ، أو نصف تخليفي ... مثل بترومين ون ، أو ماقنتيك ) بمعنى أن الزيت العادي لا يتعدى 5000 إلى 6000 كيلو استخدام .
7 - تغيير فلتر زيت المكينه ( السيفون ) مع كل تغيير زيت أفضل بحيث يبقي المكينه نظيفة .
8 - تنظيف فلتر هواء المكينه ( وهو عامل مهم يغفل عنه 95 % من مستخدمي السيارات بشكل عام ) وهو مسبب رئيسي في دخول الاتربة والحصى الصغير إلى السلندرات مما يؤدي إلى تلف ( شنابر البساتم ) وعملها الرئيسي الحفاظ على الزيت من التبخير ... فيجب تنظيف الفلتر عند كل تغيير زيت بشكل سليم وتغييره كل مدة معينة مثل 15 ألف أو 20 كيلو للحافظ على المكينه وعلى الـــعـــزم .

وهناك نقاط يهملها الكثير قد تصيب عند أحدهم وعند الباقين لا أعلم ... وهي عملية تمرين المكينه في أول 1000 كيلو ( السيارات الجديدة ) ... فيجب الحفاظ على التعليمات المذكورة من الشركة الصانعة ومن خبرة بعض الأخوان في تجارب سابقة .

هذا ما أحببت إضافته ... والله ولي التوفيق

السلام عليكم ،،،


اذا كنتو تقولون الهوندا تنقص انا اقول روحو للفورد وشوفو النقص عن جد وذا نقص راح ينقص نص علبه

مو علبه



تقبلو مروري ،،،،

أنا أغير كاسترول أو بترومين 10\30 اللي لونه ابيض
و عادي 5000 كم ماينقص و لو نقص قليل عادي لأنه يتبخر مع الحراره