أستشارة مهمة أبغى نصيحتكم عاجلاً...

السلام عليكم

كيف حالكم ياأعضاء المنتدى ،، أنا عضو جديد في المنتدى وهذي أول مشاركة لي معاكم...

أول شيء أحب أقوله لكم سبب تسجيلي في هذا المنتدى هو أني أملك سيارة هوندا أكورد أسبشل موديل 2007، والسبب الثاني هو روح التعاون الي لقيته فيكم عشان كذا عندي مشكلة وأبغى نصيحتكم وأريكم...


كما تعلمون أن هوندا أكورد أسبشل موديل 2007 ماتجي معها جنوط كروم مقاس 16 وأنا أول ماشريت موتري على طول رحت للغرابي بالرياض وشريت جنوط تجاري من صنع تايون، ركبتها ومشتني ولها معي أربع سنوات المهم أبي أغيرها لأنها تقشرت بويتها وشهبت، وهالمرة أبي أركب أصلي وكالة...


كلمت الوكالة وسألتهم عن سعر الجنوط قالولي سعر جنط الأكورد الواحد مقاس 16 بـــ 2400 ريال قبل الخصم:eek::eek:


كدروا خاطري قسم بالله وتحطمت:(
قلت ليش السعر هذا يعني لو بشتري جنوطكم وكفرات ميشلان بيكلفني 10.000 آلاف ريال وزيادة والسيارة لو ببيعها ماأعتقد أنها بتجيب 40.000 ألف ريال أو أكثر...
قالي عندنا جنوط هوندا أكورد موديل 2008 و 2009 و 2010 مقاس 17 وسعرها مخفض الجنط الواحد بـــ 523 ريال بعد الخصم:duh: (فرق شاسع)

قلتله تركب على سيارتي قالي ماأدري، المهم رحت للغرابي أبي جنوط مستعملة بس أهم شيء أصلية دورت ولفيت مالقيت إلا عند محل واحد وماهي نظيفة، كلمت بعض البناشر الي هناك قلت لو أشتري جنوط الأكورد 2008 مقاس 17 تركب على موتري قالولي عادي تركب...


وش رايكم يالربع والله محتار أبي نصيحتكم، أشتري جنوط هوندا أكورد مقاس 17 موديل 2008 أصلية من الوكالة ولا جنوط هوندا أكورد موديل 2007 تجاري من الغرابي مع أن سعر جنوط التجاري ماتتعدى 1100 ريال؟؟

وعليكم السلام

اذا الجنوط الي مركبها نفس شكل جنوط الوكاله للفل وماشيه معاك تمام وبدون مشاكل

رشها نفس اللون الاصلي وصلى الله على محمد

وعليكم الـــــســلام ورحمة الله وبركاته

شوف اخوي انا ابغى انصحك اذا تبي تركب جنوط الفل 2007 أصلي لا تركب غير جنوط 2011 او

2012 تطلع شكل السيارة حلوه وجميل وهذي الجنوط ماهي منشره بكثر بين سيارت الاكورد

هذا اذا كنت مقتدر مادينا لان سعر الجنط 2012 نفس سعر جنط 2007 في الوكالة

عاد هذا انت بختيارك القرار لك

اما بخصوص الجنوط الفل 2007 التجارية لو اشتريتها بكرتونها تجلس معك 4 سنوات هذا على

كلامك يعني بعد اربع سنوات أكيد غير تبيع السيارة وهذي هي جلست معك سيارتك 8 سنوات

انا صوتي يروح مع صوت مشرفنا رشهن عند ورشة محترمه واعطيهم تلميع ترجع خمس سنوات

الى الخلف .

الأخ: ميشو

شكراً لك يالغالي على مشاركتك ونصيحتك ولكن أنا ما أبي أرش الجنوط أبي أغيرها لأن فيها طعجات خفيفة في وجه الجنط وكذالك تشعرات أيضاً، ومحتار والله هل أركب جنوط أكورد 2007 مقاس 16 تجاري أو جنوط أكورد 2008 مقاس 17 وارد عبد الله هاشم السعر المخفض.

أخوي خالد، شكراً لك حبيبي على نصيحتك

الرش مايدخل مزاجي أبداً أشتري جنوط جديدة أحسن، ومن ناحية الجنوط الأصلية حقت الأكورد 2011 و 2012 غالية على موتري لو موتري يسوى 100.000 وزيادة صح يستاهل وبركب،،،

أنا الآن محتار في أني أشتري جنوط الأكورد 2007 مقاس 16 تجاري أو 2008 مقاس 17 السعر المخفض من عبد الله هاشم وهل يطلع شكلها حلو وأنيق مثل مانصحتني في جنوط الأكورد 2011 و 2012 ولا لا.

مثل ماقال لكـ مشرفنا الغالي

الجنط بـ 2400 :eek: >>> بديت افكر استثمر بجنوطي :d

فكره جنوط الاكورد 2008 فل حلوووه جدا شكلها رايق

مع اني اول ماشفتها ماعجبتني بس هنا بجده شفتها كم مره وعجبتني على 2007

بس حط ببالك سعر الكفرات 17 غالي يعني مايقل عن 600 ريال للكفر الواحد .. طبعا للماركات المشهوره

الأخ: دحوم شكراً ك على نصيحتك،

فكر يالله وإذا تبي تبيعني جنوطك أســـوم بـــ 2000 ريال:d

هاه وش قلت

أخوي: المسافر الله يجزاك خير والله أني كنت محتار مرة بس بعد ردك خفت حيرتي ،

يعني ظنك أتوكل على الله وأشتري جنوط الأكورد موديل 2008 مقاس 17

ومن ناحية سعر الكفر حصلتها في الغرابي ميشلان الماني بــ 540 للكفر الواحد.

اذا ماودك ترش

فا انا افضل الجنوط الاصليه وهي جنوط الاكورد الفل 2008 - 2010 لانها اضمن في الجوده من الصيني الي بالسوق

وعليكم السلام

ابو بشر اذا بتاخذ شوري ونصيحه من اخ لاتركب جنوط 2008 وموترك 2007
انا موتري 2008 فل كامل الجنط عليها دلع لأنه متناسق مع تصميم السياره
وسيارتك 2007 وجنطها الوكاله طالع خقق عليها ومتناسب مع شكلها

فالنهايه جنط اكورد2008 مايصلح على اكورد 2007 لأنو واحد من الجيران معه اكورد 2007 ومركب جنط 17 حق اكورد 2008 خرب شكل السياره وماعاد ودك تناضر فيها السياره كلها جنط وشكلها مو لايق الزبده جاب العيد

وتصويتي انك تشتري جنوط تجاريه حقت 2007 وراح تكون سيارتك تحفه وشكلها روعه

اتمنى اني افدتك

^^^

أنا مع الأخ خلووود :cool:

بس حاول تدور جنوط أصلية مستعملة

اخوي هي حلان فقط لاغير <<< يكتب شيك
اما انك ترش جنوطك دامها نظيفه وماشيه معك او تشتري جنوط نفس حقتك القديمه
اما انك تاخذ جنوط ال 2008 ابد ماانصحك اولا جنط 17 وكفراتها غاليه شوي انا جنط 16 والكفر ب 550 كيف ال 17
وثانيا ماتطلع حلوه على سيارتك اتمنى اكون افدتك

شكراً لكم جميعاً على مشاركتكم نصائحكم،،،

أبشركم شريت جنوط هوندا أكورد موديل 2008 - 2010 مقاس 17 وكفرات ميشلان فرنسي مقاس 17/45/235 ،،،

الجنوط شريتها بــ الفين وسبعين أو ثمنين حاجة زي كذا والكفرات شريتها بــ 1800 طلع علي الكفر بــ 450


والحمد الله الشكل طلع مية مية وعال العال خصوصاً مع الكفرات الفرنسية وتغيير حجم الكفر...


والله يعطيكم العافية وجزاكم الله ألف خير.

اقتباس:

---

المشاركة الأصلية كتبت بواسطة أبـــو بشـــر

شكراً لكم جميعاً على مشاركتكم نصائحكم،،،

أبشركم شريت جنوط هوندا أكورد موديل 2008 - 2010 مقاس 17 وكفرات ميشلان فرنسي مقاس 17/45/235 ،،،

الجنوط شريتها بــ الفين وسبعين أو ثمنين حاجة زي كذا والكفرات شريتها بــ 1800 طلع علي الكفر بــ 450


والحمد الله الشكل طلع مية مية وعال العال خصوصاً مع الكفرات الفرنسية وتغيير حجم الكفر...


والله يعطيكم العافية وجزاكم الله ألف خير.

---

طيب حط صورتها :)

:d

صورة عشان يكتمل الموضوع
ويستفيدون الشباب :d

أبشروا تامروني أمر ،،،

أقل شيء والله أوفيه معكم، لأني والله أستفدت منكم كثير قبل لا أسجل في هذا المنتدى.

كان ودي أحملها دايركت بدون روابط لكن ماعرفت
وسامحوني على القصور ...


وعلى فكرة الصور هذي على الطبيعة أحلى بكثير.




http://store2.up-00.com/Oct11/v0o63276.jpg



http://store2.up-00.com/Oct11/IaW63276.jpg



http://store2.up-00.com/Oct11/Iw263277.jpg



http://store2.up-00.com/Oct11/UPN63277.jpg



http://store2.up-00.com/Oct11/7pP63277.jpg



http://store2.up-00.com/Oct11/GSY63277.jpg



http://store2.up-00.com/Oct11/I0L65330.jpg



http://store2.up-00.com/Oct11/SAQ65330.jpg

^^
ما شاء الله تبآرك الله نآقصهآ تضليل خفيف ويطلع المنظر عآل العآل :)

شكراً لك أخوي Solidus 2010 يعطيك العافية،

آسف على التأخير أو بالأصح أنا رديت عليك بس المنتدى مهنق الظاهر وماطلع ردي

يا اخوان انا ابي جنوط السبشل حقت 2008 / ابي حقت الاصليه وقالوا لي حقت الوكاله تجي وارد دبي ومو اصليه .. الزبده بكم اسعار اللي ف الغرابي واذا فيه احد عنده مستخدم ويبي يبيع انا شراي

http://store2.up-00.com/Oct11/Iw263277.jpg



http://store2.up-00.com/Oct11/v0o63276.jpg


http://store2.up-00.com/Oct11/IaW63276.jpg



http://store2.up-00.com/Oct11/UPN63277.jpg

ماشاء الله :d

رووووعة صراحة ماشاء الله تبارك الله

الله يطعمك خيرها ويكفيك شرها

شكراً لكم جميعاً لمشاركتكم

وأخص بالشكر الأخ accord 7 على تنزيله الصور مباشرةً.

اخوي الجنوط شاريها من الوكالة ؟

اذا شاريها من الوكالة حصلت اختلاف في عزم السياره ؟

وش نوع الكفرات اللي ركبتها ؟