بعد كسر حاجز الـ 5000 كيلو هذي ملاحظاتي على اكوردتي 2008 اربعه فل
السلام عليكم
سيارتي مشت 5 الاف كيلو 2008 فل اوبشن 2.4
ملاحظاتي عليها بذكرها تحت وان شاءالله نشوف اصحاب الـ 2008 ونتناقش حول الملاحظات المذكوره وهل لاحظوها مثلي ولا لا :
1- احياناً يطلع صوت طقه اذا شغلت المكيف .
2- احياناً يطلع صوت اذا كنت ارجع للخلف بمعني اذا عشقت ريوس اول ما افك رجلي من البريك وتتحرك السياره يطلع صوت غريب ما اقدر اوصفه بصراحه وما يطلع الا نادراً .
3- رساوة السياره على السرعه مش ولابد على عكس المنعطفات والدوارات فهي ثابته جداً لكن على سرعه فوق 120 تحس شنطة السياره تلعب لحالها اذا لفيت بقوه يعني حاولت تتجاوز سياره خلفية السياره ما تستوعب الفكره الا متأخر تحسها تميل بعد ما تعدل السياره وتجيب فيك العيد لو انك مو منتبه . وبعد الطاره خفيفه على السرعه وحساسه يعني اقل لمسه تلف معك بقوه وكان ودي تكون اثقل شوي على السرعه وتحسسك بالثقه .
4- بوري السياره :d فلم فيني بصراحه اول ما طلعت السياره ضربت بوري وصوته من داخل السياره غبي ونويت اغيره بس سمعته وانا فاتح الباب طلع العكس رسمي مشاءالله بس اللي لاحس مخي ليش من داخل صوته غير .
5- ريحة المكيف اذا شغلت المروحه بس بدون الفريون يطلع ريحه خايسه وش الحل وهل فيها فلتر ( على فكره انا مدخن )
6- المكينه قويه مشاءالله مع انها 4 سلندر قمت على كامري قير عادي وانا سيارتي اوتو مشاءالله بس ملاحظ فزتها بالبدايه ضعيف يعني الى 20 او 30 مدري ليش هل هو نظام حمايه او تركشن وشي ثاني صوت الحنه ياشباب هذا اللي ودي اشوف له حل الوكاله يقولون عادي بكل الاكوردات مدري وش رايكم هل اعتبره عيب مصنعي ووان شاءالله تلقى حله هوندا قريب او نتعود وننطرب عليه .
7- عندي رجة فرامل اذا هديت على سرعه الوكاله قالو لي بنخرطها وانا رفضت لأن اللي اعرفه ان الخراطه حل مؤقت . المهم في واحد قال لي لا تغسل السياره الا وهي بارده انتو وش رايكم ؟
بإنتظاركم
