ليه ما فيه وكالة هوندا بالاحساء؟!!

السلام عليكم ورحمة الله وبركاته .. وبعد

في الآونه الاخيرة لاحظت أن مبيعات هوندا شركة عبدالله هاشم بالسعودية قد زادت

أنا من أهالي الأحساء وعندي أكورد 2008 .. لكن أعاني وقت اللي أبغى أسوي فحص

لازم أروح الدمام عشان أسوي فحص ووكالة الدمام يعطوني موعد على أسبوعين أو 3 أسابيع أحيانا

يعني من جد زهقت من هذا الوضع. الأحساء بكبرها ما فيها وكالة هوندا وصيانة كمان !! مشكله

كبيرة ..كم واحد في الأحساء يمتلك هوندا؟ وتصوروا كل اللي بالأحساء واللي بالدمام والخبر راح

يكون فحص سياراتهم في وكالة الدمام وممكن حتى القطيف. بالله عليكم الجبيل الصناعية اللي ما فيها

كثر اللي بالأحساء حاطين فيها وكالة والأحساء ما فيها. وش ذا التخلف؟

أنا أعاتب هوندا على هذا الشيء. صحيح انهم يقولوا إذا تبي تفحص عندكـ معرض الكفاح فيه صيانه

بس الكفاح مو متخصص في سيارة وحده. عنده صيانة لـ كيا وهيونداي والهوندا.. يعني مو مثل

صيانة الوكالة بالتأكيد والأمور الصعبة ما راح يحلوها. راح يرسلوكـ على الوكالة نفسها.

أنا كتبت هذا الموضوع عشان أعرف ان هذا المنتدى قوي وكلامي 95% إن شاء الله يوصل لوكالة

عبدالله هاشم وياليت يشوفوا حل لهذه المشكلة. واللي لاحظته ان الأغلب ما يشتروا هوندا بالأحساء

بسبب الوكالة اللي أقرب فرع لها بالنسبة للأحساء هو فرع الدمام.

هذا وتقبلوا خالص احترامي

كلامك صحيح وماعليه اي غبار

انا من اهل الاحساء لكن عملي في الجبيل والله اني اكون مرتاح لما اكون بالجبيل بحكم انو الوكاله قريبه لو حصل اي شي او احتجت اي شي لاسمح الله الفرع قريب

وياريت عبدالله هاشم يفتح فرع في الاحساء عشان تزيد مبيعاته واهل الاحساء يقدرون يسوون صيانه لسياراتهم .....

حاولو تاخذو رقم المكتب الرئيسي بجده وتصلو لهم هالكلام :cool:

وعليكم السلامْ ،،

هلا فيك أخويْ ،،

بيني وبينك بالعكس انا مستانس ان الوكالة في الخبر هع ،،

عشان امسك الخط من الأحساء لين الخبر ونغير الزيت والفلتر ونفّتر في الشوارع هِناك ،، :d

أنا سمعت أن الكـِفاح تسوي صيانة اذا بغيت ، بس صيانتهم مثل وجههم ..

وبالنسبة لصيانة الدمام هذي طالع عمرك مسوي عليها X ،،

سويت صيانة 20 ألف في الرياض ولا أحلى يا بعديْ ،،

وما بقى شيء ما غيرته ع الضمانْ ،، :d

أما في الدمام يسوي لك موعد عقب اسبوعين بسبب الزحمه ،،

في الرياض سويته في نفس اليومْ ،، :d

و . . شكراً ،،

اقتباس:

---

المشاركة الأصلية كتبت بواسطة kakashi-san

سويت صيانة 20 ألف في الرياض ولا أحلى يا بعديْ ،،

وما بقى شيء ما غيرته ع الضمانْ ،، :d

---

يا ليت تفيدنا اخوي .. وش الي غيرته على الضمــاان ، بالضبط ( لاهنت ) :o

بسم تعالى :


كلامك صحيح أخي الكريم ....... و الشيء المستغرب أن سيارات هوندا بإزدياد و مراكز الصيانة على ماهي عليه أي المركز ذاته مع تطوير العمل و لكن لم يحسب تعداد المركبات الواجب صيانتها و التي تقص بها مراكز الصيانة ....... فعند ذهابي لأحد مراكز الصيانة تكدست كميات كبيرة من السيارات خارج أسوار المركز بسبب عدم و جود مواقف كافيه و السبب الآخر الزيادة المضطردة لملاك هوندا بالأعوام الأخيرة ......... و الكل يشتكي بسبب تباعد فترات الصيانة و المدة المقررة لإنهائها و لكن لمن المشتكى ............ و لكن لا أعتب على عبدالله هاشم وحده بل أعتب على معظم الوكلاء لدينا و سوء الخدمات المقدمة لعملائهم المغلوب على أمرهم ......و صادف أن أرسلت سيارتي الفورد لوكالة الجزيرة و مركز صيانتها العملاق و لكن قوبلت بعدم الإكتراث من الموظفين المهملين و سوء الإستقبال و لا أنسى المدة لتي قضيتها جيئتآ و ذهابآ لمركز الصيانة و خسارة الوقت و المال لتكلفة صيانة تصل إلى 9000 ريال لسيارة لم يدم إمتلاكي لها لثلاث سنين فقط و بعد الخصم و بث الشكوى و صل المبلغ ل 7000 ريال و بقاء السيارة لديهم لأكثر من شهر خسرت بها مبالغ طائلة لإستأجار سيارة أخرى تقيني من لهيب الشمس و لكن بعد إستلام المركبة حصلت على ضمان شهر واحد بعد الخدمة المقدمة و مالبثت السيارة بالرجوع للمشاكل مرة أخرى بعد إنتهاء فترة الضمان و كأن شيء لم يحدث ..................... زبدة الموضوع أنه لايوجد لجنة لحماية المستهلك و ليس للعميل حق للشكوى ........المشكلة لدينا هو عدم وجود آلية للتنسيق بين المستهلك و المنتج و الوكلاء همهم الربح السريع لا غير حتى و إن كان ذلك على حساب العميل ................ بدول الخليج الأخرى العميل مكرم و مرفوع الرأس و له كل الحق لرفع شكوى أو إشهار قضية لتحسين صورته و حفظ ماء وجهه ......... و لنبغى على هذا المنوال ترحيب مطلق وقت الشراء و عبوس و غنطرة بعد البيع .............و شكرآ .

تكفون ياشباب لاتجيبون طاري الكفاح تروا اذا قريت اسمه تجيني حاله نفسيه :(

أفشل موزع لشركة عبدالله هاشم هو الكفاح :mad:

وربي لو نتكلم من اليوم لبكره ماحد راح يسمع !! :(

قول احنا في الشرقيه عندنا >> طبعا انا بعد حساوي :d

قول الي في الجنوب كلها مافي ولا صيانه وحده حقت هوندا !!:p انا مستغرب من جد يعني هناك يعيشون ناس زينا زيهم !!

وربي اتمنى اني امر في خط قطر او حتى خط الرياض او في اي مكان اشوف مشروع بناء وكاله عبدالله هاشم :d

الصراحه راح يكون اسعد يوم في حياتي لانه اختصر علينا المسافات !!

انا من سكان الجبيل بس اروح الاحساء دائما دائما ....

وكنت بالحسا والسياره ماشيه 5000 وما ادري في وكاله ولا لا ... ولما دريت ان مافي شد الخط و شيك بالدمام بس الحمد لله ما احتجت موعد ...

والله يبيلها الاحساء ستي وكاله مو نيسان الي بيفتحونها على خط قطر راضين جنبها خلهم يشيلون قهوة طش قند قهوتي المفضله ويحطون وكاله ....

راضي .

طيب بما ان فرع الدمام دايم حجوزات هذا يدل على الضغط الكبير على الفرع هذا , يعني ما يحسون على نفسهم ويفتحون صيانه ثانيه

صدقوني ياشباب عبدالله هاشم ما يستاهل الهوندا لأن خدماته سيئه واهتمامه بالعملاء فيما بعد البيع اسوأ

الاحساء محافظه كبيره واكبر من الخبر والدمام مجتمعتين وعشاق الهوندا فيها كثار << هذا الكلام انا متأكد 100% ان الوكيل عارفه لكن مثل ماقال واحد من الشباب " ماشفت ابخل من وكيل هوندا "

ما اقول غير الله يعينكم ياهل الاحساء انا وكالة سيارتي تبعد عن البيت 2 كيلو وبدون حجز بس اذا جا وقت الصيانه يجيني هم شلون عاد انتم



romanticlife كم مره قايل لك روح افحص بالبحرين بس شكل حتى فحص الاربعين بيفوتك مثل مافاتك فحص الثلاثين :p

كلامكم كله 100%
اذا قربت من وقت الصيانة تجيني ام الغثة:mad::mad: اول شي شارع الدمام - الاحساء دماااااار:mad::mad: ثانيا الصيانة لابد موعد:mad::mad:



ثالثا وهو الاهم......................عرفنا الحساوية بالمنتدى:p:p:p

^
^

الخط من جد دمار خصوصاً من بقيق للدمام " تكسر خاطري سيارتي "

ودك تاخذها قطوع للحسا اصرف :d

بسمه تعالى :

اقتباس:

---

كلامكم كله 100%

---

اقتباس:

---

ثالثا وهو الاهم......................عرفنا الحساوية بالمنتدى:p:p:p

---

أظنك لم تقرأ سياسة المنتدى بحذافيرها

اقتباس:

---

سياسة النادي في المواضبع:

- تمنع الإساءة إلى وكالة هوندا في أي بلد كانت كما يمنع التجريح بشخص معين أو بلد أو عرق.

- يمنع الإساءة للدين الإسلامي أو أي من الأنبياء عليهم السلام.

- يمنع التجريح بعضو معين علناً .

- التعصب مرفوض بجميع أشكاله، سواء للهوندا أو لبلد أو لجنس أو للغة أو...الخ

---

إن كان العضو من الأحساء أو الرياض أو جدة أو نجران أو المدينة أو حائل أو أي كان من دول الخليج أو الدول العربية الشقيقة فليس لك الحق بالتشهير و التعميم على جنس لعضو أو بلده أو ماشابه ..........ليس من اللائق الإسائة لشخص العضو بأيقونات غير لائقة بعد ذكر جنس بلده أو التجريح بأي مدينة و كأن على رؤوسها الطير ..... أرجوا قرائة البيت التالي :

اقتباس:

---

دع الأيام تفعــــــــل ما تشــاء ..... وطب نفسا إذا حكم القضاء
ولا تجــــــــزع لحادثة الليالي ..... فما لحـــوادث الدنيا بقـــــاء
وكن رجلا على الأهوال جلدا ..... وشيمتك السماحة والوفـــاء
وإن كثرت عيوبك في البرايا ..... وسرك أن يكون لها غطـاء
تستر بالسخاء فكـل عيــــــب ..... يغطيه كمـا قــيــل السخـــاء
ولا تــــــر للأعادي قــط ذلا ..... فإن شماتة الأعدا بـــــــــلاء
ولا ترج السماحة مــن بخيل ..... فما في النــــــار للظمآن ماء
ورزقك ليـــس ينقصه التأني ..... وليس يزيد في الرزق العناء

---

^
^

اخي قوقو

الاخ mr.lonely147 لم يقصد الاسائه لأهل الاحساء ابداً

قصده مثل ماذكر انه استفاد من الموضوع انه عرف الشباب اللي من الاحساء اللي من ديرته لأنه هو اصلاً من الاحساء وراجع معلوماته

وعذراً اذا كان تدخلي مزعجاً

وـاللــه كلامكـ
سليمـ 100%
وانا واحد من الاحساء واعاني من نفس المشكله
بس ياليت يشوفون لنا حل
اما الكفاح حط عليه اكس
ولا تفكر تسوي صيانه عنده

وانشاء الله يوصل الكلام لي عبدالله هاشمـ << ما اتوقع يوصل:d

ومشكور
اخوي
عـ ـالمـوضــوع

ماشاء الله.. أشوف ردود زحمة

بالنسبة للكفاح.. لو يعطوني القمر بكف والشمس بكف ما سويت فحص معهم

والصراحة أنا منقهر على هالحالة.. تصوروا اتصل عليهم يقولوا لي فحص 40000 بعد أسبوع

وغير هذا يمكن تجلس معنا يومين أو أكثر. والأدهى والأمر أنهم ما يعطوك سيارة تمشي حالك فيها لما يخلص الفحص

بس وش تسوي.. هذه الحالة في وكالات السعودية كلها.

الشكوى لله .. سلام

للأسف أسوء شي في هوندا ان وكيلها عبدالله هاشم لأنه للأسف وكيل فاشل ما عرف يقدر السياراة اللي تحت يده ، لا دعايات .. لا عروض .. لا معارض صيانه .. ولا يعرف حتى يختار موقع مناسب لمعارضه ..

يعني أنا حسب علمي ان اكثر شرايين لسيارات هوندا في القطيف ، وهذا من قديم الزمان بس وين الوكاله عنهم ..
فرع الدمام ترجع له الأحساء .. بقيق .. الخبر .. الظهران .. والمدن اللي حواليهم .. مو صاحي هالوكيل؟!
أهل الأحساء مهضوم حقهم ومافي لهم حتى معرض قطع غيار من هوندا ..

أنا نقلت الأحساء من قرب ومن جد أحس بالمغثه ، وتمنيت اني ما خذت هوندا لأن للأسف مو أي واحد يصلحها ويشتغل عليها ووكيلها زفت ولله الحمد ..