تقرير خاص عن قصة العثور على السياره + صور
بسم الله الرحمن الرحيم ..
وبعد عودة من انقطاعي الطويل .. حبيت اكتب لكم وانقل لكم قصة سيارتي كامله من بعد مالقيتها بالتفصيل مع وجود صور الي ممكن تعبر اكثر من الكلام في كثير من الأحيان ..
في يوم الأحد 7 / 10 وفي الساعه الثانيه ظهرا .. رجعت من الجامعه وانا في قمة التعب والطفش واتجهت على طول وبدون أي مقدمات على الغرفه وانا منتهي من التعب... المهم كعادتي حطيت الجوال على الصامت...وفجأه اشوف نور الجوال يولع ... شفت المتصل لقيته الوالد ... ولاخطر ببالي وقتها أي شي .. رديت ,,
ألو .. السلام عليكم .. (( وكان واضح من صوته انه نايم ))
أبشرك الشرطه لقوا السياره ..
من جدك تتكلم ..؟ طيب كيف ؟ ووين ؟ وكيف حالتها ؟
والله ما أدري عن أي شي .. الحين اتصلوا علي شرطة الظهران وقالوا سيارتك عندنا وبعد شوي بروح لهم .
طيب تكفى اذا شفت السياره اتصل علي على طول ..
ان شاء الله ..
مرت ساعه .. ولا أتصل .. ساعتين .. اتصلت عليه قالي هذا انا رايح الحين .. وأنا أحترق من الخوف ..
طبعا لاتسألوني عن النوم ... والله من بعدها من نمت يومين الا ساعه ..
المهم ان الوالد كأنه جحد شوي وكان وضع السياره مايحمس انه يتصل ..
على المغرب كذا أتصل علي أخوي ..
سلم طبعا بعد مابارك لي ..
ها ماتدري وش الي صار بسيارتك ؟؟؟
وش صار ؟؟؟
انا الحين عندها ..
طيب كيف حالتها ؟؟ عسى مافيها شي ..؟
عسى مافيها شي ؟؟؟ الا فيها البلاوي كلها ...
انا طبعا تعركت فرحتي وتحولت الى هموم من جديد ولا كأني لقيت سيارتي ..
طيب وش فيها بالضبط ؟
طبعا لاجنوط ولاكفرات وهذا شي اساسي .. ومركبين عليها جنوط سوداء ..
http://www.9q9q.org/index.php?image=ix5nnIzVujHE
الصدام الأمامي طايح من جهه .. الزوايد الي تحت باب الراكب مكسوره وطايحه ..
http://www.9q9q.org/index.php?image=FU0JJf4YXgfE
الشنطه عليها ضربة حجر .. واللوحه الموجوده عليها لسياره ثانيه مسروقه وهي نفس اللوحه الي كتيت عنها في الموضوع الي كان فيه مطارده بين خويي والسارق ..
http://www.9q9q.org/index.php?image=O6eHHdA31GCc
وسرقوا الاب توب وهذي اول فريسه والزينون وشنطة السلامه الي حاط فيها الشمعات الأصليه وبطاقة الصراف وبعض الأغراض الشخصيه مثل الكتب الجامعيه والنظارات والعطورات ومن هالطقه ..
والسياره من داخل وسسسسسسسخه وحاطين فيها أكياس اسمنت .. وفيها لوحه لسيره ثالثه مسروقه .. واللوحه ن س ص هي لوحات سيارتي الأصليه ..
http://www.9q9q.org/index.php?image=VflnnIb42mok
طبعا غير ان لمبة نظام ال ABS شغال ولا فتحت الكبوت لقيت تراب داخل على الماكينه ...!!
طيب وين لقوها الشرطه وكيف ومتى ؟
لقوها على خط الجبيل – الظهران عند مجمع الكباري .. طبعا كانوا يفحطون في الشارع المهجور على حسب التوقعات .. واضح من اثار الشكمان..
وهم راجعين ضرب عندهم الكفر الأمامي الأيمن .. حاولوا ينزلون الأسبير حق الوكاله لقوه حتى هو مفقوع (( انفقع علي قبل السرقه بأسبوعين )) ..
http://www.9q9q.org/index.php?image=ix5CC6sOnWVs
http://www.9q9q.org/index.php?image=7NTNNjZVUoql
المهم توهقوا وتركوا السياره ..
http://www.9q9q.org/index.php?image=o5DuuPJFEqrm
http://www.9q9q.org/index.php?image=KZawwRson4b2
طيب متى لقوها الشرطه ؟؟
لقوها في 29 / 9 ..!!!
ماشاء الله والحين توهم يتصلون ..؟
والله إهمال وصل الى أقصى حد ..
طيب وش الحل الحين ... ؟؟
طبعا ضبطنا وضعنا مع التأمين الي كان رافض في البدايه تحمل تاليف سرقة السياره لأنه كان خايف اننا مانلقاها ونطالب بتعويض بقيمة السياره .. لكن لما شاف ان السياره موجوده قالوا خلاص ودها الوكاله وخلهم يرسلون لنا تقرير بالتكاليف ...
خلصنا اجراءات الشرطه الي جلست يومين ((دليل على سرعة انجاز العمل ))
وحملنا السياره على سطحه لأننا خايفين تكون الماكينه دخلها تراب ولا شي بعدين تكبر المصيبه ..
المهم جلست في حوش الوكاله حدود اسبوع لأنهم ينتظرون الأوراق ترسل لهم من الشرطه وبعد أسبوع تقريبا .. فحصوا السياره من والى واصدروا تقرير ببيان التكاليف الي راح أذكرها لكم أسفل ..
أرسلوا التقرير الى التأمين .. وبعد ثلاثة أيام أو أكثر وافق التامين على الإصلاح وأرسلوا مندوبهم قبل يومين الى الوكاله ليوقع على التقرير ..
المهم في الموضوع اني كنت متوقع ان السياره راح تكلف حدود 12000 ريال أو أكثر بقليل وكان الوالد يتحداني انها تكلف مابين 20000 ريال وبين 30000 ريال ..وكنت أقول مستحيل هذا الشي ..
المهم وصلتني نسخه من تقرير السمكري فقط وطلعت لي بلاوي ماكانت تخطر على البال ... يعني الي يشوف الصور يقول مستحيل هذي تكلف هالمبالغ ..
أسرد لكم القطع المطلوب تغييرها :
1- صدام امامي 1000ريال
2- غطاء رفرف امامي يمين 200 ريال
3-عتب جانب يمين 850 ريال
4- جسر حديد جانب يمين 1900 ريال
5- اسطب امامي يمين 751ريال
6- شي ماأدري حق ايش الزبده انه للأسطب الأمامي 650 ريال
7- ديكور داخلي شنطه ((طبعا تكسر من دفاشتهم لما حطوا الكفرات)) 150 ريال
8- لمبات أنوار أماميه 300 ريال
9- ديكور أرضيه شنطه داخلي 400 ريال
10- قاعدة لوحه أماميه 150 ريال
11- كلبسات 150 ريال
المبلغ الأجمالي وحطوا في بالكم انه بس سمكره يعني الجنوط والكفرات
ماتدخل فيها 6501 ريال
وأجور اصلاح 4900 ريال
أما بالنسبه لتكلفة قطع الميكانيكا بما فيها جنوط 16 مع طقم كفرات ميشلان فبلغت 12498 ريال
واجور أصلاح 1100 ريال ..
يعني يطلع المبلغ الأجمالي 24999 ريال .. (( زين خصموا ريال ))
طبعا كلها على ظهر التأمين ... الي اتوقع اني الحين عندهم في القائمه الأسود من السوداء لأني كلفتهم قبلها ب 6800 ريال .
.... الى الحين ماانتهت القصه .... باقي شي غريب .....
قبل أسبوع تقريبا .. راح الوالد لمحل كفرات يبي يبيع كفرات بي ام النوع العريض ((سعر الواحد جديد 1500 ريال ))
بالصدفه لقى عنده جنوط أكورد مستعمل ..
قاله : هذي جنوط أصليه ؟؟؟
أي نعم ... طيب بكم ؟؟ ب 1200 ريال ...طيب وش نوع الكفرات الي عليها ؟؟ ميشلان !!!!
اتصل علي الوالد على طول وسالني وش نوع كفراتك قلت ميشلان ..
طيب في شي يميز جنوطك ... أي فيها كذا وكذا وكذا ((علامات تفرقها عن أي جنط آخر ))
بس الوقت كان بالليل والوالد ماعرف يميز العلامات فقالي بأجيه بكره بالنهار ..
راح في اليوم الثاني ومعه أخوي ولقوا نفس العلامات موجوده ....!!!!
المهم دفعوا عربون عليها وحجزوها ..وبلغوا البحث وحضر ومسكوا اليماني الي في المحل ..وحققوا معه ..وقالهم ان في ناس استبدلوا معه حنوط سوداء مع الطيس بهذي الجنوط قبل العيد بيومين وزادهم 200 ريال ..
ويقول انه مايعرفهم أبد .. قالوا له خلاص احنا بنجيب لك جنوطك بس واحد منهم مكسور وانت عطنا هذي الجنوط والله يخلف عليك من ناحية ال 200 الي دفعهتا ...الرجال كان متفاهم معنا وقبل الأمر بصدر رحب وأخذنا جنوطنا .. وأرسلناها للوكاله وخصموا مبلغ 6900 ريال من القيمه الأجماليه ((قيمة الجنوط)) والكفرات بيغيرونها بطقم جديد مع انها سليمه بس شوي كانت ممسوحه مني أنا ..
فصارت التكلفه الحين 18099 ريال .. وهذا هم الحين لازالوا شغالين على السياره وان شاء الله تخرج بعد حدود 20 يوم تقريبا ... وأرسل لكم صورها بثوب جديد أحلى من أول ,,,
أنا آسف جدا على الأطاله يالغالين لكن والله ان أهتمامكم بي فترة المحنه خلاني أهتم فيكم الحين وأعتبركم مثل الأخوان الأشقاء بل اكثر ..
الله يجمعنا معكم في جنانه مع محمد –صلى الله عليه وسلم - وصحبه
