مشورتكم يالربع ... هوندا أكورد 2007

بسم الله الرحمن الرحيم

إخواني الأعضاء الكرام ..هذي أول مشاركة لي في هذا المنتدى الرائع بكل المقاييس ..:cool:
و أتشرف أن أكون عضواً من أعضائه الكرام و عشان كذا جيتكم اليوم طالب للمشورة و اللي على أساسها أن شاء الله راح أكون أحد ملاك الهوندا أكورد :o
----------->>
أبغى آخذ رأيكم في شراء أكورد 2007 4 سلندر سبيشل لونها ذهبي ..:rolleyes:
ماشية 61 ألف كيلو ;)
فيها دقشات في الشنطة و الرفرق الخلفي ..:(

استفساراتي كما يلي:-

1- هل السيارة راعية كد أو فيها مشاكل ؟؟
2- كم تسوى قيمة السيارة المعروضه علي ( تقريباً)
3- كيف قطع غيارها و توفرها و أسعار القطع الإستهلاكية إن أمكن
4- كيف عزم السيارة و رساوتها و عزلها للهواء ؟
5- إن كان في أحد يقدر يذكر لي تجربته مع السيارة بشكل عام

شكري و تقديري مقدماً لكن من قدم لي المشورة..

تحياتي لكم ,,

يوف يالحبيب هوندا سيارات ممتازة لكن قطعها غالية مرة يعني السيارة من يوم يطلعها الواحد من الوكالة تقعد معاه خمس سنوات زي الحلاوة اذا سلمت من الحوادث بعدها ترا السيارة اذا طلبت حتكلف طبعا خلال الخمس سنوات حتطلب خراطة هوبات وأحيانا تغيرها مع الأقمشة بشكل مستمر وسلامتك .
معليش ما أنسى سوء الوكيل .

هلا مرحبا فيك اخوي :

و الله انا مو شريطي ما اقدر افيدك عن الأسعار

1- لا ابدا ما فيها اي مشاكل

2-و الله مالي بالبيع و الشراء

3-من ناحية الرساوه و عزلها للهواء مقبوله وراضين عنها

4- انا معاي اكورد 2002 نضيفه وممتازه معاي لها 7 سنين ولا تطلب اي شي ما شيه 400 الف كادها لمين قالت آمين و السياره زي العسل بس لازم تهتم فيها و تغير الزيت و تحميها كل يوم و تعبي مويه الرديتر ماء مقطر مو من مويه ( البزبوز - المغسله ) تطلع 100%

شاري مستعمل 2007 والحين معي لها 6 شهور
ماشاء الله .. زي الكريمه << بغير صغة الحلاوة :d

1- هل السيارة راعية كد أو فيها مشاكل ؟؟

سيارة تتحمل وقوية .. انا طامرت بها مطبات :p ودعسات وسرعه :cool: .. الحمد لله ممتازة

2- كم تسوى قيمة السيارة المعروضه علي ( تقريباً)

على خبري من 6 شهور يوم ادور بالمعارض كان سعرها 58 آلف السبشل ..
الآن اتوقع 50 - 55 آلف .. وتفرق بالفتحه وبدون الظاهر 5 الآلف

3- كيف قطع غيارها و توفرها و أسعار القطع الإستهلاكية إن أمكن

http://www.hondaarabia.com/club/showthread.php?t=21984
والله تبي الجد .. الآسعار إذا غاليه .. الاسعار ما تفرق عن تويوتا الحين :( مرة التويوتا اغلى من الهوندا ومرة العكس تختلف قطعه لقطعه والفرق كله 50 - 100 ريال !!!

-4 كيف عزم السيارة و رساوتها و عزلها للهواء ؟

العزم حلو لكن تحسها ثقيله شوي :d .. الرساوة ماشاء الله .. عزل السيارة ممتاز .. ماعليه خلاف :)

5- إن كان في أحد يقدر يذكر لي تجربته مع السيارة بشكل عام

هـاديـه فـ القياده والله مريحه جداً وعاجتني ..

باستعمالك النظيف لهآ ما راح تكلفك ..

خفيفه جداً فالمناورات والمصاقط + رساوه حلوه تمسك معك السيارة ..
تجربتي قبل كامري :d << امحق تجربه .. كانت تزحف بس شوي وتخوف :(

نصيحه : دور سيارة مشت تحت الـ 60 آلف .. تكون على الضمان لي صار شي والاش .!

بالنسبـــه للموتر ممتـاز ماعليه
بس شف لو كـان مصدوم يبي يتعبك والله
واسـألني انا
انا فيه صدمه لا بـأس بها وخسرت بها مبالغ شوي واجده
الين ضبطت معي

ولكن انت قبل لا تـأخذها افحصهـا بالوكاله وشف كم تبي تكلفك عشـان
تعرف .~

وبالنسبه للسعر انا اشوف ان الـ 45 الف حقهـا دام الموتر سبشـل ~

تح.ـيتي~..

لا تستعجل اصبر شويه بتحصل فل ونضيييفه ويمكن سعرها يكون حدود ال 50000 انا خويي شرا اكورد ابيض 2007 ماشيه حدود التسعين بــ 54000 والله هذا انا اشوف سعر الفل والسبيشل من ال45000 الى ال48000 وبالتوفيق ومرة ثانيه لا تستعجل

الله يعطيكم العافية جميعاً ..
و صدق انكم رجااااال شقرديه يشد بكم الظهر ..:cool:
أجل رايكم نصبر شوي لعل الاسعار تنزل بعد نزول موديلات 2010 :rolleyes:

لا عدمناكم يالغالين ..