السلام عليكم ورحمة الله وبركاته
في موضوع حابب اخذ رأيكم فيه وبالذات اصحاب الخبرة واي واحد عنده معلومات بالهموضوع احنا مانعرفها ياريت ما يحرمنا منها
موضوعي هو ان هالفترة صرت اشوف كثير بالمنتدى اعضاء يشتكوا من مشاكل تصيب سياراتهم بسبب الامطار ويطلبوا مساعدة من الاخوة الاعضاء
ولاحظت ان اغلب الاعضاء اللي يساعد بهاذا الموضوع يسأل صاحب الموضوع اذا دخل موية من الشمكان واذا كان الجواب نعم ينصحه (( انه يوقف سيارته على طلعة تكون الخلفية نازلة ويتركها ثلاث ايام مطفية لين تتطلع الموية ويفصل البطارية )) اكيد انتوا شفتوا مثل هالمواضيع
انا عندي خبرة طويلة بالسيارات بحكم هواية وبحكم عمل وبحكم معارف بس بصراحة اول مرة اسمع هالمعلومة
كثير مرت علينا حالات ودخلت موية بالشكمان , اتذكر زمان لما كنت كنت لما اغسل السيارة احط الهوز داخل الشكمان وافتح الموية وبعدين اشغل السيارة واصير ادعس حد دعسة البنزين تتطلع زي النافورة على اساس اني مسوي حركة خطيرة قدام عيال الحارة :cool: وماكانت تتأثر السيارة
ايامها كانت سيارة الوالد
وكثير وقت المطر احيانا نضطر نمشي بشوارع الموية توصل لحافة ابواب السيارة وتدخل الشمكان موية ومع كذا ماكانت تتأثر السيارة ولا تتطفي
الا اذا وصلت موية للمكينة
انا بسيارتي الاكورد اوقات اغسلها بيدي في مكان عملي واستخدم جهاز ضغط الموية وانظف دبة الشمكان وحولها ويدخل موية للشمكان وقتها انتوا عارفين ضغط الموية كيف يكون قوي زي اللي بالمغاسل ومع كذا ما قد تأثرت السيارة
ولله الحمد على كل شي اولا واخرا
ومن ناحية ثانية انا فكرت فيها
لو فرضنا انو دخلت موية من الشكمان ايش المشكلة؟؟
الشكمان عبارة عن ماسورة طويلة نهايتها واصلة المكينة
كلنا نعرف ان لو دخلت موية للمكينة رح تتأثر السيارة ,
بس وصول الموية للمكينة عن طريق الشكمان شبه مستحيل ,
والسبب /
كلكم عارفين الشكمان بالعادة كم طول ماسورتة , عالاقل 2 متر
وتحتوي الماسورة على اكثر من دبة وانحنائات ونهايتها تكون مرتفعه حتى يتوصل بالمكينة
وكلنا درسنا فيزيا ;) ونعرف ان الموية صعب ترتفع للاعلى الا اذا كان قوة دفع ,,,
وهذه القوة ماهي موجودة بموية المطر اللي موجودة بالشوارع
حتي لو انغمرت السيارة بالماء
معناها الموية اللي داخلة للسيارة عن طريق الشكمان رح تستقر بماسورة الشكمان
طيب وين المشكلة وكيف بتأثر الموية على السيارة وهي موجودة بالماسورة ؟؟؟
كلنا يعرف انو الشكمان لما تكون السيارة في وضع تشغيل يكون في درجة حرارة عالية ولو رشيت عليه موية من برة رح تتبخر بسرعة
كيف لو كانت الموية داخل الماسورة والحرارة بالداخل اكثر من طرف الشكمان من برة
فوين المشكلة لما تدخل الموية من الشمكان ؟؟؟؟ :confused:
موضوعي موجه بالاخص للاخوة الاعضاء اللي يقولوا
ان دخول الموية من الشكمان يأثر على السيارة ويبين السبب ويخلينا نقتنع بكلامه
واتمنى ومن كل الاخوة اللي يحب يساعد ويفيد غيره بأي موضوع , انه يكون متأكد من معلوماته وتكون حجته مقنعة وفيها دلائل واقعية
بالنهاية غايتنا الاساسية في تجمعنا هنا الفاااائدة اولا
مع وجود التسلية والمرح
واسف عالاطالة
تحياااااتي للجميع
