مشكلتي مع الوكالة ولازمني نصيحه

السلام عليكم ورحمة الله وبركاته

اللي صاير معي اني مسوي حادث بتاريخ 27/12/2009م
والحمدلله اني طلعت منها سالم والسياره الوجهيه الا الرديتر بس والحمدلله المكينة ما تأثرت من الحادث طبعا بعد كم قروشه دخلت السياره الوكاله تقدرها تقدير إصلاح كامل بـ 46399ريال ، وقلنا دام شركة التامين بتصلحها خلهم يقدرونها بالسعر اللي يبونه طبعا دخلت الوكاله يوم 29/12/2009م و وافقت شركة التامين
على تصلحيها وارسلت الموافقة بيوم 31/12/2009م وواعدوني اني أستلم السياره وتكون جاهزه بالكثير يوم 20/1/2010م يعني بعد أربع أيام من اليوم ، والمشكلة اني رحت اليوم
السبت 16/1/2010م قلت خلني امر عليهم اشوف السياره وش صار عليها لقيتهم ما فكوا فيها مسمار والسبب ان أرباق السائق
مو متوفر عندهم فجأه يقول لي الأرباق راح تجينا
بتاريخ 5/2/2010م جن جنوني ودخلت على مدير قطع الغيار
(بابا نول السودان) قالي نبي نتاكد متى تجي بأي تاريخ وندق عليك ، انا بالفتره هذي تلزمني السياره كثير كثير بس السؤال
وكالة عبدالله هاشم على كثر مبيعاتهم ويدخل ارباح بالهبل عاجز يحط ارباق واحد بس عنده المفروض هوندا تكون موفره قطع الغيار كامله لعملائهم السعوديين اللي مايمديه يوقف عن تقاطع الا والأرباق بوجهه.

السؤال هو:
في حالة تأخر الوكاله على عميلها العميل وش المفروض يسوي
وذبحته أجار السيارات ؟

ابي نصيحتكم هل من حقي اطلب منهم في حالة تاخر السياره انهم يعوضوني بالفتره اللي تاخروا علي فيها سياره ثانيه الا تطلع سيارتي؟

مع العلم:
انهم ما صلحوا اي شي ثاني بالوجهيه بعلت تأخر وصول الأرباق
وانها لازم تتركب اول!

قانونيا اتمنى تشوف الورق او الفاتورة اللي اعطوك اياها فيها تفاصيل اكثر باللي ملزمين فيها فقط

اذا مكتوب في الفاتورة اللي هي بمثابة العقد انه ملزمين يعوضونك بسيارة بديلة طول مدة الاصلاح بكل بساطة تروح المحكمة وترفع قضية تعويض عليهم وحط المبلغ اللي انت خسرته خلال الايام اللي قضيتها انت بدون سيارة بعد التاريخ المذكور بشرط ان تاريخ الاستلام يكون موجود في الورق نفسه اللي وقعته معهم

للأسف أنهم ما كتبوا تاريخ أستلام السيارة

بس الموضح بالورقة انه بعد موافقة شركة التأمين

أني أستلم السياره بعد 15 يوم من الموافقة
وتاريخ الإستلام أو دخول السياره موجود

وشغلت المحكمة يبي لها لف ودوران

بس لو اقول للوكاله لازم تعوضوني

بدون تهديد بالمحكمة بتعوضني

ولا لا؟

طبعا ما راح يعوضونك

جرب ادخل على المدير وشوف بنفسك النتيجة مسبقا

اللي هو ان كلامك ما يقدم او يأخر

تقدر تاخذ تعويض عن طريق المحاكم ولا يضرك شي وفي نفس الوقت اخذت حقك

لكن للمعلومية اتمنى تقرا العقد او الفاتورة زين وياليت تستشير قانونيا عن الموضوع هذا لا يطالبونك بتعويض لان المسائل القانونية بحر ما ينتهي

ممكن أقدر أفيدك بس عندي عدة أسأله :
1 - وش أسم شركة التأمين اللي راح تعوضك ؟
2 - هل أطلعت على بنود ورقة الموافقة على الاصلاح المرسلة من شركة التأمين الى الوكالة ؟
3 - هل تأمينك شامل والا طرف ثالث ( يعني واحد صدمك وحطو الخطا علية والا أنت صدمت وعندك تأمين شامل ) ؟

من واقع خبرة شركة التأمين مسؤولة عن تعويضك عن تكلفة تنقلاتك خلال فترة اصلاح السيارة يعني طال عمرك تجيب فاتورة ايجار السيارة وتطالب فيها شركة التأمين لأن شركة نجم لما قدرو الحادث فية بند يكفل لك تعويضك عن تكلفة المواصلات خلال فترة الإصلاح وفي حالة رفضهم تعويضك تقدر ترفع عليهم شكوى لدى مؤسسة النقد ( يعني المحكمة مالها دخل بموضوعك ) وأضمن لك بظرف أسبوع دراهمك بجيبك والشكوى سهلة وماتحتاج وقت وأي استفسار راسلني على الخاص .........

في البداية الحمدلله على السلامة

وبخصوص موضوعك خذ تأمينك طال عمرك ومر أقرب فرع للتأمين وأستفسر منهم هل يعطونك سيارة بديلة لتنقلاتك في حال حصول حادث << لا تجيب لهم طاري انك صدمت بس قوله حاب أستفسر هل يشمل تأميني ولا مايشمل

اذا قال لك يشمل على طول جهز فواتيرك وأكبر فرع يعتبر رئيسي للتأمين وطالبهم بالتعويض

كأني أذكر اني شفت بالعقد او بمكتب التعاونية انك تدفع زيادة شوي ويوفرون لك سيارة بديلة وقت اصلاح سيارتك لكنها معلومة مش متأكد منها والعقد عندي بس بالسيارة

ولكن اتوقع اذا تأمينك ضد الغير يمكن مايشمل

اقتباس:

---

المشاركة الأصلية كتبت بواسطة أبوعبدالله

السؤال هو:

في حالة تأخر الوكاله على عميلها العميل وش المفروض يسوي
وذبحته أجار السيارات ؟
ابي نصيحتكم هل من حقي اطلب منهم في حالة تاخر السياره انهم يعوضوني بالفتره اللي تاخروا علي فيها سياره ثانيه الا تطلع سيارتي؟
مع العلم:
انهم ما صلحوا اي شي ثاني بالوجهيه بعلت تأخر وصول الأرباق
وانها لازم تتركب اول!

---

شوف الاجابه سهل مرررررررررررره

اتصل على الشركة الام وارسل لها ايمل بالموضوع كامل وصور الاوراق التى عند وسوف يتم تحويل الموضوع الى الشركة الام في الامارات ويتم الاتصال بك للتأكد من طلبك ماذا تريد بالضبط ويتم توبيخ الشركة هشوم

انا عملت نفس الحركه مع شركة ايسر للكمبيتوتر وكان الرد ما توقع:eek: يقول كذا كان التعويض بحاسب جديد والسبب ان الجهاز غير سليم وبعد اقل من 24 ساعه كانه فيه عطل فني مع الشركة تقول عليك الانتظار اكثر من اسبوع لوصول القطعه :mad:

يا عيوني انسى انا صار عليا حادث قبل العيد ومرررررة كان بسيط بس الشنطة الي انعدمت ...يعني بس تتغير الشنطة وتترش بوية فقط لا غير + اصطب الشنطة والله انهم محطوني حدود الشهر عشان الموضوع هذا وازيدك من الشعر بيت لما جيت استلم السيارة لقيتها مصدومة من الخلف يعني الشنطة والصدام مرة ثانية ومحكوكة من الأمام ... واعيطهم اسبوع كمان المهم اخر شي لما جيت استلم السيارة لقيت شغلهم زي وجههم شغل بنشري مو شغل شركة لعنت 10 جد لهم وما بقيت فيهم واحد من اكبر شخص الى اصغر واحد واعطيتهم مهلة يومن يعدلو شغلهم وبلفعل جيت السبت واستلمت السيارة بس والله للأمانة شغلهم زي وجههم ولا حق المدة هذي كلها الشي الوحيد الي امدحه فيهم انه لون السيارة ما اختلف فقط ...

وبخصوص العقد او التأمين من الأن اقلك ارجع اقراء عقدك مافيه ولا بند واحد لصالحك ... وهذا تأمين شامل ... بس اذا كانت اسيارة كاش والتأمين من برا زي التعاونية يعطوك مبلغ حق اجار سيارة لمدة 20 يوم فقط بمبلغ 70 ريال تقريباً تزيد او تنقص ...

والله يعينك على ما بتلاك فيه ... والحمد لله على كل حال.

1 - وش أسم شركة التأمين اللي راح تعوضك ؟
إياك (سلامه)
2 - هل أطلعت على بنود ورقة الموافقة على الاصلاح المرسلة من شركة التأمين الى الوكالة ؟
أطلعت عليها ووافقت على تصليحها كامل
بشرط انها ما تتحمل تلف في الكفرات او البطاريه
3 - هل تأمينك شامل والا طرف ثالث ( يعني واحد صدمك وحطو الخطا علية والا أنت صدمت وعندك تأمين شامل ) ؟
شامل

_______________

أسف على التأخير لسبب إنشغالي مع الوكالة

اللي صار:
دخلت على مدير قطع الغيار في المره الأولى وتفاهمت معه برواقه وطلب مني اعطيه مهله يوم كامل علشان يتأكد من أول أرباق بتوصل وكلموني بعدها وقالوا انها بتجي الأسبوع الجاي ، طبعا ً رحت للوكاله وطلبت تعويضي بسياره حتى تطلع سيارتي وتهاوشوا مديري قطع الغيار ومدير الصيانة كل واحد فيهم يقول انت السبب أنتهينا ان سيارتي لو ما أستلمتها الأربعاء الجاي 20/1 أستأجر سيفك ويعوضوني الوكاله بقيمة أستأجارها (بعد ما هددتهم أني أطلع من مكتب المدير وأفضحهم بالصاله)
وانا أنتظر يوم الأربعاء ونشوف أخرتها مع العلم اني نسيت أخذ منهم ورقة ثبوتية على كلامهم هذا

وأسف على التأخير بالرد
ومشكورين على المرور

وياليت تعطوني رايكم باللي صار؟

سلالالالالالالامه آآآآآآه منهم لي تجربة سيئة معهم وأخذت منهم حقي بقوة القانون
تأمينك شامل ماعندي خلفية عن تعويضات التأمين الشامل لأن أغلبها يكون منصوص عليها بعقد التأمين اللي بينك وبينهم
وبالنسبة للوكالة القرار لك أنت شايف انك محتاج السيارة مرة أستأجر وأدخل على المدير العام
أما اذا كان ماعندك مشكلة أمشي مع الكذاب لين الباب واذا ما أنحلت مشكلتك يوم الأربعاء أشتكي عليهم