تحذير من موجة سرقات للسيفيك في رمضان

السلام عليكم ورحمة الله

الشهر مبارك عليكم <<<< ولو انها متاخره

انا قبل امس وديت السياره المغسله سلمتهم مفتاحها ورحت مشوار طويل شوي مع واحد من

الاصدقاء وجيت استلم السياره ما حصلتها في المحطه واسال العامل وين السياره قال اخوك

خذاها !!!!!!!!!! اخوي مين ..... الي حصل جاه واحد قال له السياره خلصت قال ايه دفع 15 ريال

دق سلف بكل قوة قلب وحرك طبعاً بلغت وقتها ورحت القسم فتحت محضر وسويت تعميم على

السياره واشتكيت المحطه ( الدريس ) وصاحب المغسله طبعا العماله هربو كلهم كفيلهم

كلمني امس (صاحب المغسله ) العصر قال بكلمك العشاء وقفل جواله <<<< الزبنه

بس مشكلته ما يعرف وش الي جايه

ذي سالفتي وان شاء الله احصل المفتاح بس مع اني ما اظن في ذا البلد

وخلال جهودي انا والي معي امس عشان نكثف البحث وصل لنا خبر بان سرقات السيفيك خلال اليومين الي راحت حوالي 17 سيفيك

فانتبهوا انتبهوا

وما تشوفون مكروه

:eek:

جزاك الله خير على التنبيه, الله يبعد عننا كل شر ويحفظنا بحفظه..

ياليت تكتب معلومات السيارة حتى نتعاون على البحث واهم شيء وش يميز السيارة تضليل استيكر صدمه مثلا ً, لأن اكيد انهم راح يغيرون اللوحه وهذا اول شيء يسوونه حسبي الله عليهم ونعم الوكيل..

إن شاء الله ترجع سيارتك سليمه, ويارب يطبقون الشرع بحق السارقين وهو قطع اليد ولو قطعوا يد واحد فقط كان ماتشوف سرقات (مثل القصاص)

وعليكم السلام

في احد يالغلآ يعطي العمال مفتاح سيارته ويروح ؟

ع العموم الله يعينك ويعوضك خير

وان شاء الله اهل الرياض مايقصرون بالبحث معك

الله يؤجرك في مصيبتك ويخلفك خيراً منها

الله يجزاكم خير جميعا

اخوي ميشو هذا النظام كل العالم تخلي سياراتها وتروح لاكن هذا المكتوب والحمد لله

وبعد هذا نظام سرقة جديد




عموما اهل الرياض وكلكم فيكم الخير ان شاء الله

السياره نص فل الكفر الامامي الايسر قدام السواق استبنه جنط اسود

فيه ضربه خفيفه في الرفرف الايمن في الامام

عليها تضليله 0/1 زيرو ون اللوحه أ م ن 8800

مشكور اخوي كنق وصادق في كلامك شرع الله سبحانه مافيه لعب بس وش تقول

وعليكم السلام ورحمه الله

هذا التحذير مهب شيء جديد المفروض كل واحد يكون حريص خصوصا في الرياض لأن السرقات كثرت ..

ولو الواحد ينتظر نص ساعة أو ساعة عند سيارته إلى ما تخلص ما راح تضره حتى يكون الشغل كله قدامه وعلى نضر عينه .

والله يردها لك سالمة من دون ضرر وهذا أعتبره درس حتى تكون حريص على موترك في المرات القادمة .

دعوة المضلوم مستجججآبه . . .عليك فهم بكل صصلآة


ورآعي المغسسلة لا تخخخليه :@

يارجال ادع ربك ترى دعوه المظلوم مستجابه ..

انا حاس بالصدمه الي انت فيها الحين ..

انا سرقو سيارتي برمضان الي راح موقف عند البقاله وتاركها شغاله كان اهمال مني صراحه ..
تخيل طلعت من البقاله الا والقى الاخ اللطيف مريح بسيارتي انا ماستوعبت الموقف والله واركض
ويشبك الريوس ويحطه بالدي ويقرص بوجهي فقع ام مرارتي والله ويجي واحد ماعرفه الله يجزاه خير
ويركبني معه ونلحقه ولف مع لفه وحنى روحنا سيدا المهم والله واروح مع واحد من الشباب
القسم واقدم بلاغ ورحنا دورنا الرياض كلها مالاقينها والله اني قعدت ادعي عليه لين الحمدلله
مامر الا يومين صباح يوم الجمعه كلمني العسكري قالي انت فلان الفلاني قلت الله الله
سيارتك لقيناها وين قالي حي النظيم عند سوق الغنم الا والله واروح والقا السياره مدخلها بقطوع ورى سوق
الغنم مزبنها بين حصاتين الله لايوفقه والله وافتحها بالسبير وادق سلف عاد يقولي العسكري امك داعيتلك
الموتر مافيه ولا حكه ولقوه صدفه كان فيه بلاغ حول المنطقه ولقى السياره محلها غريب وبلغ
قالي رح القسم وكمل الاجراءات
والله الحمدلله عدت على خير
نصيحه ياخوي موترك دوره بالثلاث مناطق (النظيم -النسيم - الشفاء) وركز على المناطق هذي..
الله يصبرك ان شاء الله ولاتخلي راعي المغسله لو اني منك دفنته ..

والله انك صااااااااااادق انا قبل كم يوم كنت امشي بالسياره وبقمة الروقان وتفاجئت لمن شفت العسكري بسيارته يكبس لي ماعطيته اي اهميه (الولد عنده ثقه بنفسه هع) المهم بعدها وقفت لأنه هذا أمر وطلب مني الاستماره والخ وبعدها قالي روح الله يستر عليك قلت له سلامات موقفني بين كل هالسيارات وبعدين قلت لي خلاص ليه في شي قالي بس حبيت أتأكد من شغله لأنه جاي لنا بلاغ بأنه سياره سيفك مسروقه من نفس المنطقه اللي انت فيها حاليا

وش لونها السيفيك؟

مشكورين وما قصرتوا

وان شاء الله ماتشوفون الي شفته

اقتباس:

---

المشاركة الأصلية كتبت بواسطة c i v i c 2006

وش لونها السيفيك؟

---

اوه صح نسيت اللون الله يذكرك الشهاده

ابيض لؤلؤي

لآ حول ولإ قوه إلا بالله ..

آلله يصبرك بمصيبتك

وآلله يآخوي عمآل آلمغآسل مآلهم آمآن ماعطيهم مفتآح سيآرتي لو آضطر آجلس 3 سآعآت عندهم ..


ع آلعموم هذا قدر ومحد يقدر يردهـ

وبإذن وآحد آحد ترجع لك سليمه بدون إي آضرآر يآرب


ولإ آوصيك ترآ دعوهـ آلمظلوم مستجآبه بإذن آلله

الله يكون في عونك

المفروض انك تقوله اني انا اباخذ السياره ماتعطيها احد عيري

السلام عليكم

اول شي الله يردها لك سالمة يا رب وكل مظلوم

ثاني شي اخوي انا والله ما ودي اعاتبك وكذا لكن وشوله تخلي المفتاح حرام عليك

انا والله مستحيل اترك سيارتتي .... اقعد معهم وهم يغسلون فوق روسهم .. اقوله نظف زين من هنا وهنا ومسح القزاز كويس ..

انتبه وانا اخوك ... او حتى تنزل محل وتتركها شغالة ...

طبعا في حالتي دايم انزل واتركها شغالة :d لاني عندي خاصية زي السيارات القدييييييمة .. اللي هي اشيل المفتاح والسيارة شغالة ... واقفلها تصير شغالة ومقفلة

عمال المغاسل المفروض ماتخلي عندهم السيارة
وانشاء الله ترجعلك سيارتك

مشكورين ياشباب على مروركم

الحين كملت ثلاث شهور ولا حولك احد الحمد لله على كل حال

مدام اني بخير وانتوا بخير هذا اهم شي والباقي يتعوض :d

المشكله الحين محتار مدري وش اشتري :rolleyes:

لاحول ولاقوة الا بالله

الى الان ماحصلت السياره ؟

يعني تشلحت سيارته خلاص تم تقطيعها الى اجزاء والظاهر انباعت ولا عادة ما تطول الا اذا غيروا رقم الهيكل ورقم اللوحة وضبطوا كل شي السرقة اللي تمت مو سرقة عادية حق تفحيط ولا كان لقيتها من ثاني اسبوع لكن المشكلة في تغيير ارقام الشاص واللوحة وتشليحها

الله يعوض عليك إنشاء الله

الحمد لله ما جاك شي

واهم شي في كل صلاة

ادع عليه ترا دعوة المظلوم مستجابة

اقتباس:

---

المشاركة الأصلية كتبت بواسطة meshoo

لاحول ولاقوة الا بالله

الى الان ماحصلت السياره ؟

---

يارجال نسيت ان سيارتي انسرقت :)

اقتباس:

---

المشاركة الأصلية كتبت بواسطة بلال العلمي

يعني تشلحت سيارته خلاص تم تقطيعها الى اجزاء والظاهر انباعت ولا عادة ما تطول الا اذا غيروا رقم الهيكل ورقم اللوحة وضبطوا كل شي السرقة اللي تمت مو سرقة عادية حق تفحيط ولا كان لقيتها من ثاني اسبوع لكن المشكلة في تغيير ارقام الشاص واللوحة وتشليحها

---

يسلم فمك والله انه احساسي من يوم انسرقت

واحد من الشباب في الداخليه يقول انهم يجلخون رقم الشاصي ويكتبونه من جديد

شوف الاجرام كيف

اقتباس:

---

المشاركة الأصلية كتبت بواسطة عايش جوي

الله يعوض عليك إنشاء الله

الحمد لله ما جاك شي

واهم شي في كل صلاة

ادع عليه ترا دعوة المظلوم مستجابة

---

جزاك الله خير

شغال دعى عليه مو بس في كل صلاة في كل ثانيه

جعله بحادث كل من شافه قطع رخصته