2012 وكاله وهذي نهايتها !!!!

السلام عليكم ورحمة الله وبركاته

بحكم ان هذه تعتبر اول مشاركاتي

احببت ان تفيدوني بمشكلتي ورغبت ان استفيد من خبرتكم

اخوتي الاعزاء

امتلكت واستلمت سيارتي الاكورد 2012 سبشل

لم يمضي على استلامها سواء اربعه ايام الا وبدأت العيوب تظهر بها

اولى تلك المشكلات هي الحذفه لليسار رغم اني حريص على تمرينها بالشكل المطلوب

لم تتجاوز سرعتي 80 فقط المصيبه العظمى عند وصول سرعتي للــ 100 الا

وظهرت رجه بالكفرات المشكله ان الطاره بها ثبات ولكن تشعر بهزه بالكفرات وانتفاضه !!

مع العلم ان السياره لم تكمل الف كيلو حتى الان !!!!

ماهو الحل برأيكم وهل تلك العيوب خلل فني بالتصنيع ام لا !!!!

ختاما وبكل امانه اشعر بالأسى والمراره على ماحدث لي ولا املك الا ان اقول

ان وكيلها للاسف لم يدرك قيمتها عن محبيها وعاشقيها !!!!

بانتظار افادتكم ولكم جزيل الشكر والتقدير

كل الاكوردات فيها حذفه,, حتتعود عليها ياخوي,,

ع البركه

يبارك بعمرك اخوي ويحفظك من كل شر

تهون الحذفه وان كانت صعب تتقبلها بحكم السياره جديده

لكن الرجه والانتفاضه هذي اللي محيرتني بها

فرحتي لم تكتمل بكل اسف وان كنت أتمنى ان أستبدلها با أخرى

لكن الحمد لله على كل حال

شكرآ لتجاوبك اخي الكريم

الحل انك تروح الوكالة وبعد الوكالة الوكالة
دخل السيارة واحذف عليهم المفتاح وقولهم ماستلمها الا لمى تظبط وخلي واحد من الموظفين يركب معاك ويجرب السيارة

هلا اخووي اناا نفس طريقتك اخذت 2012سياحي وطلع فيها رجه وحذفيه مثلك تماما وبيني وبينك جاني ضغط رحت للوكاله قالوا خلاص نسوي لك ترصيص 140 وان شاء تروح الرجه والسوالف هذي وهي معي من 1000 بس بفضل من الله ماعطيتها وجه مشيت عليها 5000 وغيرت زيتها طبعا مايسوون لها تشييك الا ب 10000 والحمد لله سويت تشييك العشره واخذوا مني 475 طبعا ينظفون كل شي وحتى القماشات ينظفونها لك وفكوا الكفرات واتوقع انه بدلهن يعني لخبط فيهن الاماميات حطهن في الخلف وركبهن والحمد لله راحت الرجه بس باقي الحذفيه احيانا تجي واحيانا لا وان شاء الله تروح ماحسيت اني اقول قصه ههههههههههههههه بس لاتوسوس هوندا وبس

الحل حسب كلام احد الاصدقاء ان شركة عبدالله هاشم مايجون الا بالبهذلة والشدة

لذلك تروح وترمي المفتاح مثل ماقالولك لان الكفرات قديمة وع الغالب محبلة

ولا توقع استلام السيارة الا بحل مشاكلك مع العلم ان الحذفة ايضا غير طبيعية ويجب حلها بعد تغغيير الكفرات ان بقيت وذلك بوزن الاذرعة

لعنبو الشغلة اللي ما تجي إلا بهواش وبهذله ... ونطل مفاتيح ... ما فيه في هالبلد شيء يجي بسهوله .

حسبي الله ونعم الوكيل

الاكورد مافيها حذفيه ..
انا معي 2011 .. وماتوقع 2012 يصير فيها هالشيء ..

حسب ماشفت من مقاطع كثيره وصار معي ..
الاكورد فيها مشكله بالكفرات الخلفيه يعني اي ضربه بسيطه
راح يتغير الوزن فيها ..
لكن بما إن السياره مامشت كثير .. رجعها للوكاله وبالعين الحمراء
خذ حقك او بياكلووونك ..

الاخوان
أخي ناصر هدي نفسك ههه
أبقولكم حدث حصل لي:
في السفر صادفني حجر وطلعت فوقه وانشق الكفر
وغير بعدها الكفر ولكن بقيت حذفه بسيطة يسار!
ذهبت لميزان المجد فالي اترك السيارة عدنا وسيتم حلها باذن الله سواء رجة وحذفه, الشاهد
قالي ان أكثر الشركات تجيب سياراتها عندهم لحل مثل هذه المشاكل.
والله أعلم
لكن انا تركت السيارة على وضعها وتعودت على الحذفة طبعا بسيطة جدا. وغيرت كفر ات بعدها ونسيت الموضوع
أخوكم

تتعود على الحذفه لما تكون بسيطه لكن انك تجرب وتمشي 140 وتزود الحذفه هنا تحس بالغبنه والقهر !!!!

رجه وحذفيه وقرقعه بالشنطه وتنسيم هذا والموتر وكاله ماوصل 800 كيلو !!!!

اجل لما يتعدى 50 الف كيلو وش بيظهر لنا من مشاكل جايه !!!!

كان الله في العوون والوعد الوكاله بكرآ ..

مشكوريين على الافاده جميعآ ولآ خلا ولا عدم ..

هل الوكيل ملزوم يغير الكفرات مجانا لو كانت محبلة او يابسة من التخزين ام لا ؟؟؟

علموني

تحية طيبة ياغالي
الله يبارك لك فيها ويطعمك خيرها ويكفيك شرها
المشكلة بالكفرات فقط من الممكن يكون تخزين السياره سيئ
بالاضافه انا نوعية الكفرات برغم انها ميشلان الا انها مزعجه بنسبة للنوعية في الموديل السابق 2011 بريجستون
انا واجهة مشكلة مثلك لكن قمت بتبديل الكفرات مع صاحبي لدجيه اكورد 2011 وذهبت الحذفه وذهب ازعاج الكفرات

علمآ ان سيارتي لم تكمل 10 ايام

عندى 2012 ليها 3 شهور لا حدفه ولا رجه ولا تنسيم ولا شىء الحمد لله هذه شهاده حتى لا تظلمو الموتر 2012

وعليكم السلام

ياشباب لاتكبرون الموضوع ترا المسئله بسيطه

سيارتك تقول باقي ماوصلت 1000 لما توصل 1000 عندك صيانه مجانيه وتكتب فيها كل ملاحظاتك ويتم اصلاحها سيارتك باقي على الضمان !

هذا نظام الوكاله من اول ليه الاستعجال

اشترط عليهم ماتوقع على استلام السياره الا وكل المشاكل محلوله

اذا مانحلت وقتها يصير خير قدم شكوى لادارة الصيانه

يارجال وسع صدرك وهونها

قبل سنتين شرى اخوي 2009 سبشل واول ماسقتها من اوتو ستار وهي فيها رجه خفيفه

بعد يومين رحت للوكاله وقابلت مدير قطع الغيار وقلت له عن المشكله وسجل اسمي ورقم جوالي قال بنتصل فيك اذا جت دفعه كفرات جديده لان بعض الاكوردات فيها تحبيل من الوقفه

خلال اسبوع اتصل فيني قبل ماتكمل السيارة التمرين وقالي وصلت الكفرات تعال بالسيارة

رحت له الصبح قالي المساء تخلص .. المهم شبيت عليه على اني مسافر الظهر :d قال ولا يهمك

قبل صلاة الظهر اتصلوا علي استلم السيارة بكفرات جديده

اذا ما انحلت مشكلتك ارسل لي وان شاء الله الامور تضبط

شيك على ضغط الهوى بالكفرات يمكن معبى الكفر هوى ومهو موزون علشان التخزين جرب منت خسران شيئ

بسم الله الرحمن الرحيم
في البداية ألف مبروك السيارة والله يعطيك خيرها ويكفيك شرها
ثانيا أنا قبل 3 أسابيع استلمت السيارة ( أكورد 2012 سبيشل ) وللأمانة ما من ملاحظات لا اللي قلتها ولا اللي تفضلوا بها الشباب من قبل من حيث العزل وغيره والرساوه راسية وحليوه انا أمشي عليها 140 على طريق الرياض وما عليها ملاحظات ومشت لليوم 2500 ك م .

عموما إن شاء الله تكون المشكلة بسيطة وتنحل ولا تتكدر يخوك و لا تعور قلبك تراها ما تسوى الله يسهل دروبك .

رحت الوكاله بطريق خريص مرتفع ضغطي بلغتهم بمشكلتي
قالو جبها بعد الف قلت عشان مستقبلا تقولون ليه ماجبتها قبل الالف !!
نشبت لهم اليوم واعطونا ورقه لمركز ميشلان اللي بالمرسلات
يشيكون على الكفرات ان كانت تالفه يبدلونها وان كانت حالتها زينه يسوون لها ترصيص !!
قلت لايكون على حسابي بعد قالو لا على حسابنا قلت مفروض يكون مندوب هنا يشيك عليها
مو تهجولون بي للمرسلات قالو لازم شيك عليها وجب التقرير منهم ونشوف بعدين !!
وبكرا ان شاء الله بتكون كملت الالف وبروح لهم صيانه وتشييك والربوع بسنتر عندهم بعد
ماجيب التقرير لهم ونشوف اخرتها معهم !! والله يكون بالعوون !!
والله العظيم يااخوان لاشفت اكورد 2012 بااي طريق امر بجنبه وأشر له
واسئله عنده حذفه ورجه بعضهم يقول لا وبعضهم يشتكي من خراب البوري وطقطقه بالقير
يعني مستقبلآ لو أشر لكم راعي اكورد يسئلكم اعرفو انه محدثكم خخخخخخخخ وسوس
على كل حال الله يبارك بااعماركم ومشكوريين على الافاده ويعطيكم ألف عافيه

طبيعيه الوسوسه هذه هههههههههه عموما الف مبروك ربي يعطيك خيرها ويكفيك شرها
توي مطلع اكورد 2012 وماعندي اي رجه ولا حذفه ولاتنسيم ولله الحمد
سيارتك جديده لاتسكت على الوضع هذا وبالتوفيق

يبارك بعمرك أخوي ويحفظك من كل شر ومكروه
ولاتوصي اخوك حريص بليا والله يبعدنا واياكم عن الوسوسه خخخخخخ
موفق يابعدي

لا صحيح الوكاله عندهم خبر
حصلت مع خويي وراح للوكاله وصلحوها اظن تبديل بين الكفرات ووزن وراحت الحذفه

بس رجعت بعد يمكن اسبوع خخخخخخخخخخخخخخخخخخخخ

انا باقي بالتمرين ماوصلت 1000 ابمسكها خط بعد التشيك الاولي واشوف :confused:

اغلب الوكالات وللاسف الشديد ما ينغع معهم الا الدعس والبهدلة

حسبنا الله ونعم الوكيل بس

انا عن نفسي مع 2012 ماشية عشر الاف حاليا , الحمد لله السيارة ماشاء الله ما اشتكي منها .. هو صحيح ان العزل بشكل عام سيء لكن مع الايام تتعود ,, بالاضافة الى الحذفة البسيطة لليسار وبرضو بتتعود عليها ..

عسى يباركلك بسيارك وتنحل مشاكلها :)

رح للوكالة اخوي يصلحون كل شيء ع الضماااااان ان شاء الله

ونصيحتي لك لا توسوس

اي وسوسه اليوم رحت لميشلان سوا لي ترصيص للكفرات
ونفس المشكله السياره للان ترج وبرجع له بعد العصر وبفش غلي فيه
لابد مايشوف لي حل فيها يايغير الكفرات ولا اروح الوكاله يشوفون لي صرفه
تقولون وسوسه اقسم بالله اليوم سيارتين اكوردات كلها 2012 عند ميشلان
وكلهم رجه وحذفه !! لاصيانه مثل الاودام ولا وكيل لاقي حل لمشاكلنا
لكن يصير خير اليوم بعون الله .. ناشب لهم ناشب لهم :mad:

ياخوي قلت لك روح الوكاله اذا في شيء بالكفرات الوكاله تعطيك تقرير لميشلان بتبديل الكفرات مجانا ليه تستبق الاحداث

لما توصل 1000 كيلو سجل كل الملاحظات

ميشو يمكن يقولون له ليه ما جيت بالاول ,,, ترا حركات الوكالات كذا يحاولون يطلعونك انت الغلطان

انا عندي اكورد 2007 فيها حذفه لليسار من طلعتها من الوكالة وهي كذا واذا رحت للوكالة بعض المرات يقولون غير علبة الدركسيون وبعض المرات يقولون غير الدودة غيرت الدودة بعد فترة رجعة المشكلة

اقتباس:

---

المشاركة الأصلية كتبت بواسطة هوندانا

ميشو يمكن يقولون له ليه ما جيت بالاول ,,, ترا حركات الوكالات كذا يحاولون يطلعونك انت الغلطان

---

مايقدرون لان اذا مشت 1000 كيلو هذي صيانه مجانيه منهم وتسجل ملاحظاتك وتطلب انك ماتستلم السياره الا وجميع الملاحظات مخلصه

ويفضل تخلي الفني يطلع معك قبل ماتطبع فاتورة الخروج لما تتأكد من حل جميع المشاكل

أمس رحت لمركز ميشلان الصباح وصادفت اثنين يشتكون من نفس معاناتي
المهم سوا لي ترصيص الكفرات جربتها ولازالت الرجه فيها
رجعت لهم العصر طلع معاي المهندس يتأكد ونفس المشكله لازالت
قامو وبدلو الكفرات حرف x وبرضو ماراحت الرجه ولا الحذفه
واعدوني على الاربعاء الجاي يفك الجنوط ويشيك عليها ويعطوني تقرير لوكالة هوندا
بالنسبه للي يقولي روح الوكاله للعلم بس الوكاله ترسلك لميشلان لانهم مسئولين عن الرجه
والحذفه قالو روح الوكاله هم المسئولين عنها قلت اوك
اليوم الصباح رحت الوكاله ابسوي وزن للاذرعه قالو مانقدر نسوي اي شي لك
جيب التقرير الاربعاء الجاي وان كانت المشكله من الجنوط نغيرها لك علما ان الكفرات سليمه بناء على كلام مهندسين ميشلان
الزبده يااخواني اللي ماخذ السياره من شركة أوتو ستار معاه مدة شهر يجرب السياره
طلع فيها مشاكل يجيب تقرير من الوكاله ان بها عيب مصنعي ويبدلون لك السياره
واخوكم ناشب لمندوبهم التقرير باخذه الاربعاء الجاي بمشيئة الله
وبعدها نشوف اخرتها مع هوندا في حالة سوو كل شي من ترصيص ووزن وتغيير جنوط
والسياره برضو فيها مشكلة الحذفه والرجه هنا يبدلونها وهم مايشوفون الدرب
لاني سويت كل اللي علي وتحملت مشاوير بما فيه الكفايه
صحيح كرهت نفسي من كثر التردد عليهم وخصوص اني اجي لهم من خارج الرياض
لكن اخوكم متفرغ لهم ومستقعد لين اخذ حقي بأي طريقه .. وسلامتكم ..

استكمالا لما حدث
رحت ميشلان اليوم الساعه 30 : 8 صباحا .. أخذت التقرير بإن الكفرات سليمه ومافيها شي
بعدها اتجهت الوكاله طلبت خروج احد الفنيين معي طلع معي فني بغيت أرتكب فيه جريمه :confused:
اقوله فك الطاره تشوف الحذفه وهو متجود بها اقوله تعدى 110 ولاحظ الرجه
بالنهايه يقولي السياره مافيها شي قلت ارجع ارجع الوكاله مايندرى يمكن الحذفه والرجه بمخي وانت الصاحي !!
طلبت خروح فني ثاني ونشبت لهم طلع معي فلبيني وجرب السياره وبالفعل اقر بوجود الحذفه
رجعنا الوكاله بلغتهم بمشاكل السياره .. الحذفه .. تنسيم الهوا .. قرقعة الشنطه .. سلمتهم السياره
وواعدوني بكرا استلمها .. وراح أجربها وأتمنى بس يطلع فيها أي مشكله عشان استقعد بزياده
لا لاقين تعامل محترم مثل الاوادم منهم ولا لا اي اهتمام واذا ماتنشب لهم انواع التصريفات ..
بشكل عام ماانكر بديت امل وأطفش رايح جاي بس بنفس الوقت لاقي لذه ومتعه بالاستقعاد لهم ;) ونشوف أخرتها معهم .. وسلامتكم ..

نهاية القصه والمشاوير الدائمه للوكاله

اتجهت للوكاله اليوم لاأستلم سيارتي وأنتظرت من الساعة الثامنة صباحآ الى الثانية عشر ظهرآ
نحمد الله ونشكره انتهت مشكلة الحذفه والتنسيم واصوات الشنطه
واصبحت اتمتع بقيادة سيارة في منتهى الرفاهية والفخامه :cool:

همسه : مهما كان حجم المشكله بمركبتك لاتصمت وتوجة للوكاله فورآ :rolleyes:
بالتوفيق للجميع

ههههههههههههههههه
والله كفووو ي مزاحمآوي
عرفت لهمم والله

كفوك الطيب يابعدي

مللنا من الذهاب والتردد على الوكاله حوالي أربع مرات
لكن الحمد لله ان تكللت جهودنا بالنجاح وهذا كله بتوفيقه سبحانه
احترامي وتقديري للجميع

اخواني انا معي اكورد 2012 برضو عندي حذفة لليسار خفيفة و في كمان احيانا رجة بعد ال 100 و احيانا لا وش يكون السبب؟؟؟ افيدوني جزاكم الله خير

اخوي مزاحماوي الله يعوض صبرك وروحتك وجيتك ....

اتمنى تسوي موضوع لوحده وتنسخ كل الي كتبته تحت عنوان :

اكورد 2012 عندك رجة وحذفة (( تعال هنا الحل مع الوكالة ))


عشان تختصر الوقت والجهد للأخرين

والله يرزقك بما فيه خير لك يارب العالمين

اقتباس:

---

المشاركة الأصلية كتبت بواسطة هوندانا

اخوي مزاحماوي الله يعوض صبرك وروحتك وجيتك ....

اتمنى تسوي موضوع لوحده وتنسخ كل الي كتبته تحت عنوان :

اكورد 2012 عندك رجة وحذفة (( تعال هنا الحل مع الوكالة ))


عشان تختصر الوقت والجهد للأخرين

والله يرزقك بما فيه خير لك يارب العالمين

---

+ 1

ههههههههههه والله انك نشبه ياشييييخ بس ونعم فيييك ولو كل واحد يسوي زي كذا كان تأدبت الوكالات كلها حقت السيارات لكن شايفين ناس تقول ياعمي وياشيخ وطنش فلعبو لعبتهم علينا عموما تحياتي لك

طيب ماقالوا لك وش سبب الحذفه ؟

يافرحه ماتمت :(
رجعت الحذفه لليسار بشكل خفيف ولازلت اسمع اصوات تنسيم هواء !!
والرجه بدال ماكنت من 80 الى 120 صارت من 100 الى 110 !!
مو مشكله قربت السياره توصل 5000 نوديها الخدمه السريعه
وبعدها نتفاهم مع هالوكاله الخايسه :)