الله يصبرني على ماصابني

السلام عليكم ورحمة الله وبركاته
اسعد الله مسائكم
صار لي حادث يوم الثلاثاء على سيارتي هوندا اكورد 2011
الحمدلله على كل حال
السيارة جتها ضربه قوية والخطا على الطرف الثاني 100%
انعدمت السيارة من الركن الايسر الامامي مع المقدمة
رحت قدرت السيارة في الصناعية مخرج 18 وقالو انها مكلفة لازم تروح لشيخ المعارض
رحت شيخ المعارض اللي بالشفا
وقدرها بقيمة 30 الف ريال - طبعآ الايرباق طلع وحرق يدي

السيارة محافظ عليها اكثر من نفسي
شاريها لي 9 شهور ماشيه 18 الف
لكن الحمدلله
واللحين مادري اصلحها في الوكالة ولا في ورشة قالو لي ناس ان هوندا متعاقدة معها بتصليح السيارات الورشة اسمها الوفاء

الله يعوضك خير والحمدلله على السلامه واخر المصايب يارب

اما عن ورشة الوفاء هيا تعد من افضل الورشات بالرياض بس تكلفتها غاليه مره

انصحك تشوف الوكاله كم تكلف والوفاء بعد قيم التصليح عندهم اذا صارت الوكاله اغلا بشي بسيط صلحها بالوكاله افضل

اهم شي الارباق اخذه من التشليح ارخص بكثير من الوكاله

والله يصبرك على ما صابك

بس اللي سمعته ان الوكالة تصلح السيارات المتضررة عن ورشة الوفا
يعني الوكالة ماتاخذ الا حقها
فوق حق ورشة الوفا

الحمد لله على السلامة ... قدر الله وماشاء فعل .

إذا تقدير شيخ المعارض ( 30 ألف ريال ) أحسب زيادة ( 5 آلاف ريال ) لأنه بتطلع لك شغلات ما تتوقعها

طيب الطرف الثاني راح يدفع لك عن طريق التأمين أو يدفع لك ( كاش ) ... الله يكون في عونك

طيب صلحها على التأمين حاول تنشب للوكأله ترا هادي حركاتهم مايبون يخسرون. واهم شي سلامتـك والحديد يتعوض

الطرف الثاني مامعه تامين
وبينقدها من جيبه
والتامين اللي معي ضد الغير بس
كم تتوقعون تاخذ وقت

أهـا توني افهم عليك . ثاني شي ماعليك من الوقت أهم شي يضبطون ألموتر
بالعكس كل ماتأخرو وهم يضبطون بالموتر كل ماكان أحسن يكون الشغل نظيف
أهم شي وسع صدرك انشإلله أنها سهلات ،،

يابن الحلال والله بدت تطيب نفسي منها احفاض عليها ويجي ويجي واحد مقرود يدمرها والله انها واقفه برا اني مابي اطلع تضيق الصدر

الله يعوضك

اقتباس:

---

المشاركة الأصلية كتبت بواسطة aalhamdan

يابن الحلال والله بدت تطيب نفسي منها احفاض عليها ويجي ويجي واحد مقرود يدمرها والله انها واقفه برا اني مابي اطلع تضيق الصدر

---

ظيب المكينه سارلها شي ؟

بيعها وافتك منها
اذا حادث بالوجة التصليح ماينفع لوتصلح بالوكاله ماترجع السيارة مثل ماكانت
خلاص الهيئة تضررت
والله يصبرك بمصيبتك ويعوضك بخير منها

المحركات بشكل عام ماجاها شي
كله بفضل الله ثم بفضل الشاصي رد الصدمه عن المكينه

أجل احمد ربك ان المحركات ماجاها شي تدري ان قيمة السياره بالمحرك .
موضوعك منتهي يعني الي يبيلك صدام وحاجات بسيطه ولمبه كامله قدام السواق والكبوت بتسوي تعديل
او اشترها من التشليح والرفارف معجون تطلع السياره اوك :cool: مادام ان المحركات سليمه ولله الحمد
والباقي يهووووووون :d

حبيبي بيجيني تعويض 28 الف اصلاح بلا معجون بلا خرابيط كل شي جديد ان شاء الله

الحمد لله على سلامتك والله يعوضك خير ان شاء الله اهم شي الصحه وانا اخوك وكل شي يتعوض

30 الف شغل يد وتكلفة + تبيع سيارتك 30 = تشتري لك 2010 ونظيفه

مجرد رأي

اخر المصايب وان شاء الله ماتشوف شر يالغلا

انصحك صلحها في ورشة الوفا والله شغلهم 100%

قبل فتره واحد من العيال صلح سيارته في الوكااااله والله شغلهم فاااااشل ابعد عن الوكاااااله نصيحة اخو والله يسهل عليك

افااااااااا وش هالكلام يالحمدان صدقني هذي دفعة بلا وتكفير للذنوب لا تتحطم ولا تيأس ولا يضيق خلقك دامك انت طيب ..طز في ذا السيارات كل ابوها وكل شي يتعوض دام انت سليم مافيك شي

بترجع السياره زي ماكانت احسن وتقول لنا هالسالفه كذكرى ماتنعاد لا تشيل هم و وسّع صدرك والله يعوض عليك

الله يجزاكم خير مازلت اقول قضاء وقدر والحمدلله ثم الحمدلله ثم الحمدلله
وديت السيارة للوكالة اليوم بغيت انجلط من سعر التصليح طبعا سعر مبدئي المصري يحسب السعر من دون تشييك اكيد للقيمة قال 55 الف ريال
مع ان الوجهيه ماجاها شي بس الركن الايسر هو اللي متضرر

شوف اذا ماراح تصلحها بالوكاله في ورشة اسمها ورشة الجنوب في الرياض لاتتعداها متخصصه بالهوندا ..
















.

55 الف اووووووووووووف قول لاالة الا الله حنا عندنا بالوكالة السيارة بكبرها الاصدار الخاص يجي زوايد ونياكل ب5.800 انا صارلي مثل حادثك قبل فترة الجهه اليسار انعدمت وشوي من قدام جيب القطع من التشليح الا الاشياء الحساسة ومنها الايرباغات وسمكر بمكان محترم اهم شي السمكرة والتربيط علشان ماتكره السيارة

حمد الله على سلامتك والسيارة تصلحها او تبيعها وتشتري غيرها بكيفك أهم شئ سلامتك

لاحول ولا قوة الا بالله

المهم انت طيب والحديد معوض ان شاء الله
الله يكون فعونك ويبعد عنك وعننا شر الحديد

طيب ياخوان شيخ المعارض قدر السيارة 28 الف ريال هل تقديرة اصلاح ولا قيمة السيارة قبل وبعد الصدمة
واذا كان قبل وبعد الصدمة مثل قيمة السيارة قبل 70 وتقدير شيخ المعارض 28 يكون قيمة السيارة 48
هل تكون قيمة السيارة 48 بعد اصلاحها ولا قبل اصلاحها