اكورد 2012 ، أو 2013؟؟ (مجموعة أسئلة تحتاج خبير يجاوبها)
السلام عليكم ورحمة الله وبركاته
صبحكم / مساءكم الله بالخير
وشلونكم يا اخوان؟؟
انا اخوكم في الله عاشق من عشاق علامة هوندا المنتشرين في كل مكان وزمان
كنت مالك اكورد 2004 ومشيت عليها الى 317,000 كيلو ينطح كيلو :(
واقل ما اصف فيه السيارة انها لا مثيل لها
فعلاً لا اعتقد ان هناك سيارة مثل جودة الاكورد 2003-2007
اكلت مطبات ، حفر ، ارصفة (ينفجر الكفر بعد الرصيف واروح اغيره بالمحطة ولسان حالي يقول : الرصيف اللي بعده)
مشكلتي النظر عندي شجرررر فلا بد بالاسبوع اكل لي مطب على سرعة سبعين وفوق
مجنت السيارة مجن بالسفريات على سرعات عالية
كان نظامي معها : الزيت والأمور الدورية من عند الوكالة وفارق التكلفة بسيط
اما غيره انحش من الوكالة لانهم بيمصونك مص (وهذا اللي اطلق المفهوم الخاطئ بين الناس ان الهوندا قطع غيارها نار ، هي اغلى بفارق بسيط والله فقط وفارق الجودة كبير)
اما القطع اشترها بنفسك ولازم اصلية وركبها عند ورشة مضمونة وانتهى الموضوع ولا ارتفاع اسعار بقطع الغيار ولا هم يحزنون
المهم جميعكم هنا مُلاك المَلاك الجميلة الاكورد وتعرفون جودتها ما يحتاج
انا قدر الله علي وطلعت بنص الليل دايخ اجيب دواء لاخوي الصغير ومسرع
فما كان مني الا وتودشت ام الرصيف على سرعة ثمانين تقريباً .. وكان رصيف جامد و ولد حمايل فراحت السيارة فيها
حسبوها التأمين علي خسارة كلية وعوضوني 25,000 سعرها بالسوق (الحمدلله على كل حال نعمة والله)
المهم طولت عليكم والله ابيكم تفهمون وضعي
انا قاعد اللحين على سيارة اجار افيو والاجار ماكلني اكل
ولا يمكن اشتري سيارة غير الاكورد
فالسؤال اللي يطرح نفسه وبحكم اني غير متابع للسوق
1. متى بتنزل الاكورد 2013 عندنا بالسعودية؟؟
2. تتوقعون إذا نزلت اقدر اشتريها واستلمها مباشرة؟؟ وهل فيه احتمال آكل تبن كم اسبوع زيادة على بال ما استلمها؟؟
3. كم بيكون سعرها؟؟ الاستاندر كم؟ وباقي الفئات كم؟؟
4. هل فعلاً راح يكون فيها عيوب مصنعية؟ بسبب انها اول دفعة من الشكل الجديد؟ او مجرد كلام؟؟
5. هل جودتها راح تكون مثل سابقاتها؟؟ ولا تختلف؟؟
6. ماهي الفروقات الجوهرية بين الاكورد 2012 و 2013 ، غير الشكل والداخلية؟؟
7. وش تنصحني؟ بـ12 او بـ13 ؟ وليش؟!
لاني انا بين خيارين ومحتار اشد الحيرة
اشتري سبيشل اكورد 2012 او انتظر الـ 2013
الـ 2012 حلوة وشي ممتاز انها اخر دفعة ميزة اعتقد ان العيوب كلها المفروض اختفت
لكن شكلها ما عجبني مرة وداخليتها ايضاً نفس الشيء
السبب طبعاً إن 2013 افضل بكثيييييير هههههههههههه ما يبيلها كلام
وأيضاً 2013 سيارة جديدة كلياً بعد اربع سنوات فراح يكون مستواها التقني مختلف جداً وهذا اللي حارقني ابيها
لكن المشكلة زي ما قلت ما اقدر انتظر مدة طويلة بتاكلي الاجارات
وخايف انتظر ولا تستاهل بعيوب او غيره
انا اهم شي عندي الجودة بشكل رئيسي فقط .
شوروا علي يا اخوان وخذوا راحتكم بالكلام والتفصيل
(بعد ما اشتريها بإذن الله بتكون رابع اكورد تشتريها العايلة الكريمة خخخ عندنا هوس اكورد بالبيت) -- لا إله إلا الله ماشاء الله تبارك الله :)
الله يوفقكم يا اخوان وييسر اموركم وانتظر ردودكم ونصايحكم
