يالربع مشكله في طرمبه الدركسون,, صور !!

السلام عليكم ورحمه الله وبركاته ,,

اعتذر عن غيبه طويله جدا , عاد ما ادري اذا احد درا عني والا لا هههههههههه ,, لظروف جامعيه ولله الحمد والمنه تخرجنا منها ..

الزبده من فتره كنت اسوق سيارتي والاحظ ثقل في الدركسون واسمع صوت ونه عالي كانها سوبر تشارج واوقف اشوف والقى ماعاد فيه الا ربع العلبه زيت واشتري زيت هوندا واعبيها

المهم راح الصوت ونفظت مكان الزيت بمنديل وشغلت وجلست اراقب الطرمبه وشفت التهريب وهذي الصور

http://store2.up-00.com/Nov12/OU046473.jpg

هذا هو يهرب وينزل لتحت

وهذا مصدر التهريب
http://store2.up-00.com/Nov12/fm046473.jpg



من النص بالضبط ,,

السياره اكورد 2007 سبيشل ماشيه 170 الف ,, طبعا انا كنت خايف يهرب ع الدينمو بس خطيته وشبته بكرتون ومشت الحركه وانا حاليا في الرياض
ابغى اعرف وش المشكله وهل قد واجهتكم وكيف اصلحها لا تبخلون علي بنصايحكم ,, خصوصا الاخ بلال وبي يوسيفل

اخوكم / عمر

يالربع 25 مشاهده ولا رد ؟؟

كلمه ولو جبر خاطر:(

والله ياخوي معرف شي عن الطرنبة وله اي شي عنها
بس كتبت الرد عشان لا ينكسر خاطرك وتجلس حزين
انو محد رد عليك :d:p

وان شاء الله الاخوان بفيدونك

اقتباس:

---

المشاركة الأصلية كتبت بواسطة al.berens1

والله ياخوي معرف شي عن الطرنبة وله اي شي عنها
بس كتبت الرد عشان لا ينكسر خاطرك وتجلس حزين
انو محد رد عليك :d:p

وان شاء الله الاخوان بفيدونك

---

هههههههههههههه ,, الله يبعدك عن مشاكلها , وشرفني مرورك المواساتي << من المواساه ,,

جلست خمس دقايق ابغى ارد عليك كل شوي اخطي في السؤال العشوائي ههههههههه بس والله جاني سؤال صعب

ان شاء الله يجيون الشباب بس شكلهم نايمين ,

ياغالي عندك ورشه رقم 20 بصناعية ام الحمام
وكلها طقم اصلاح للطرمبه وتنحل المشكله باذن الله

كانت عندي نفس مشكلتك قبل اسبوعين تقريبا وعالجتها ولله الحمد ،
اشتريت طقم إصلاح طرمبة الدركسون "كامل" , بعد الخصم ب 148 ريال + علبة زيت دركسون وكالة ب 40 ريال
وشغل اليد ب 150 والمده الزمنيه المستغرقه ساعه ونصف .
والله يعوضك خير ..سلام

^^

شغل اليد مايتعدى 100 ريال

طقم اصلاح طرمبة دركسون 140ريال
شغل اليد100ريال

بسم الله الرحمن الرحيم

تم حل المشكله ,, رحت لورشه الجنوب في الصناعيه القديمه , ناظر السياره وشاف التهريب ولفلف الدركسون يشوف ثقيل او لا

طبعا الدوده سليمه لكن الطرمبه تهرب وقال يلزمها اصلاح وعطاني القطع ورحت شريتها

- 2 لي , واحد يجي داخل للطرمبه ورايح للعلبه والثاني تحت مره عند الشمعه
- عدد اثنين رمان للطرمبه غيرها داخل الطرمبه
- والباقي ربلات وجلد للطرمبه

طبعا فكها كلها ونظفها وشال الترسبات ونظفها بديزل او مدري وشهو ذاك ونشفها بهواء وفك الطرمبه وغير الرمان والجلود وكل شي , ونظف العلبه وفك الزيت القديم ونشفها وركب كل شي وعبى الزيت وشغل السياره وجلس لف يمين ويسار ويزود زيت الين ما ثبت على الupper level المهم الدركسون اللحين جدا سلس وراحت الونه ومافيه تهريب لحد الان

القطع كلفت 190 ريال وشغل اليد 100 ريال بما مجموعه 290 ريال والمده 3 ساعات

وسلامتكم واشكر كل من رد واطلع عالموضوع ,وصلى الله ع نبينا محمد
اي سؤال انا حاضر

سبحان الله نفس المشكله اللي حاصله معي الاسبوع ذا

اخاف يبي لها تغيير لاني صلحتها قبل سنه في الصناعيه القديمه عند حقين الهدروليك


ولا عليك امر اذا الورشه اللي صلحت عندها و تشوف شغلهم كويس وصف لي خل استفيد انا والاعضاء

ياخي على ما اسمع انها عيب الهوندا طرمبة الدركسون و العلبه

على العموم الحمدلله على السلامه و تقبل مروري و تحياتي ياصديقي

اقتباس:

---

المشاركة الأصلية كتبت بواسطة 3ssl

سبحان الله نفس المشكله اللي حاصله معي الاسبوع ذا

اخاف يبي لها تغيير لاني صلحتها قبل سنه في الصناعيه القديمه عند حقين الهدروليك


ولا عليك امر اذا الورشه اللي صلحت عندها و تشوف شغلهم كويس وصف لي خل استفيد انا والاعضاء

ياخي على ما اسمع انها عيب الهوندا طرمبة الدركسون و العلبه

على العموم الحمدلله على السلامه و تقبل مروري و تحياتي ياصديقي

---

ايوه هي عيب مصنع في الاكورد ونص اللي شفتها داخل الورشه مثلي اصلاح ,, هو صحيح الحل تغيرها كامله بس سعرها جامد حول 3500 ريال فانت جرب اول اصلاح يمكن تمشي معك وتفك نفسك الخساير واذا مانفع غيرها بواحده من التشليح او الوكاله والله يعين

اغلب اللي فالمنتدى يعرفونه لكن هذا الوصف ا

ذا كنت جاي من الدائري الشرقي مخرج 17 ومتجه ( غرب ) على شارع الأمير سلمان

بعد النفق أول إشارة تروح يسار تدخل الصناعية يجي على يـدك اليمين ميزان العضيب

الفرع رقم ( 4 ) ادخل معه يمين على شارع اسمه - المـنتـزة - اتجه على إلى نهاية الشارع

يجيك هـوندا الجـنوب على اليمين ومقابلها محلات قطع غيار هونـدا,,

عني اشوف شغلهم زين خصوصا الهندي المشرف عليهم كل شوي يراقب اللي يركب لي الطرمبه ويوجهه ويوم عبى الزيت وصكر الكبوت رجع قالي افتحه وشيك ع العلبه ولقى هذاك عبى امها زيت وزبد له وخلاه يجيب لي ويشفط الزيت يعني حريص جدا ويراقبهم اول بأول ,,

شكرا لمرورك يا صديقي

يا بلاش .. قطع اصلاح ( 2 لي + 2 رمان + ربلات وجلد ) للطرمبه بـ 190 ريال .. وشغل يد 100 ريال
لكن قطع الإصلاح والليات اللي شريتها أصليه من الوكاله ؟ أو ؟

ما شاء الله
يا حظ أهل الرياض بورشة الجنوب

خاصة بإصلاح دودة وطرمبة الدركسون .. أغلب الأعضاء بالمنتدى يمدحونها وشغلهم نظيف وأسعارهم معقوله

بالقصيم غالباً الورشات أغلى بكثير ( شغل اليد ) .. وبعض الورشات شغلها ( يمشي الحال )

من أسباب التهريب :

1) زيادة الزيت عن الحد الأعلى ( يزيد الضغط على ربلات وصوف طرمبة الدركسون والدوده .. ويقطعها أو يفجرها).
2) إستخدام زيت أحمر ( الزيت هذا سيئ ويضر الطرمبه والدوده والصوف والربلات و يسبب تهريب ) .
الزيت المناسب = زيت دركسون هوندا من الوكاله
3) كسر الطاره على الاخير الين تطق ( إطفائها وتشغيلها على هالوضع ) .
والخ...



الورشه أو العامل .. اذا زاد الزيت عن الحد الأعلى

عشان تخرب الصوف والربلات بعد فتره .. وترجعه تصلح عنده = يكسب شغل يد أكثر

أو ممكن بسبب الإهمال أو جهل العامل بكمية الزيت المناسبه