أتمنى مساعدتكم يا أعضاء المنتدى برجة أسفل السيارة

السلام عليكم ورحمة الله وبركاته

صباح الخير لجميع أعضاء المنتدى

( أعلم بإنه موضوعي طويل جدا ولكن أتمنى اللي يقرؤه , يقرؤه للنهاية وأكون شاكر له )

طبعا أنا متابع لمنتداكم من ثمانية شهور , يعني بالتحديد من يوم شريت سيارة الأكورد موديل 2012

ولكن اليوم حبيت أسجل بالمنتدى وأطرح لكم مشكلتي , وأتمنى من رب العالمين ألقى عندكم أصحاب خبرة بالسيارة ويقدمون لي مساعدة لأني أخاف أغامر بشي معين وفي النهاية أطلع أنا الخسران

أنا من أربع شهور تقريبا كنت أحس برجة في السيارة من بعد سرعة 120 وطبعا رحت سويت ترصيص ( عادي ) عند أحد المحلات التابعة لوكالة الميشلان في الغرابي , وبالفعل طلعت من عندهم مباشرة وسقت على سرعة 150 فما فوق , وماشاء الله تبارك الله السيارة رجعت مثل ما كانت في الوكالة .

ولكن للأسف شهرين ورجعت لي الرجة مرة ثانية , ورحت للمحل مرة ثانية علشان يسويلي ترصيص من جديد وهنا أشارو علي بإنه أسوي ترصيص أرضي للسيارة وتاخذ عليه ضمان شهر وترتاح عليه أكثر من الترصيص العادي وأرسلوني لأحد المحلات المجاورة لهم , وبالفعل رحت سويت ترصيص أرضي وطلعت من عندهم ولكن للأسف السيارة تحسها مش طبيعية من تحت , ورجعت لهم بعد أسبوع مرة ثانية وقلت لهم بإنه الوضع مثل ماهو ما تغير , وسوولي ترصيص من جديد وطلعت بالسيارة ولكن للأسف الوضع ما تغير كمان ومن أسوأ لأسوأ , وهنا قالولي إحتمال كبير تكون الكفرات فيها مشكلة .

المهم رجعت للمحل التابع لوكالة ميشلان وشرحت له الوضع وقال لي على كذا لازم تروح لوكالة هوندا وتخليهم يشيكون على السيارة من تحت بالكامل , وبالفعل رحت لهم وفحصو السيارة من الأمام والخلف , وطبعا قالولي السيارة سليمة وما فيها شي والحمدلله , وفي شخص بالوكالة قال لي لو تغير الكفرات بتنحل المشكلة , وأنا بكل أمانة مستغرب شي وهو السيارة لها ثمانية شهور ومامشيت عليها إلا 16000 كيلو ( ستة عشر ألف كيلو ) , مو معقولة تخرب الكفرات بهالسرعة لأنه ممشاي دوام وبيت , يعني مافي لا بر ولا سفر .

وطبعا رحت أمس للغرابي وسألت كثير محلات ويوم أشرح لهم الوضع , الكل يقول لي إما الكفرات كان تخزينها سيء وخربت أو انقطعت الأسلاك داخل الكفر ولازم تركب كفرات جديدة أو الأذرع مش موزونة أو رمان الكفرات فيه مشكلة أو أو أو ... إلخ . وبصراحة أنا إحترت وما أبغى أغير كفرات وفي النهاية تكون المشكلة مش كفرات .

علما بإنه أنا ما أحس برجة بدركسيون السيارة بشكل كبير بالعكس رجة خفيفة , ولكن أحس السيارة من تحت وكأنه الكفرات مفكوكة وقاعدة ترج أو تهتز أو تحس الكفرات في أحد يضرب فيها وأحس الضرب من أسفل رجولي , يعني باختصار من الصعب أوصل لكم الحالة ؟

لذلك أتمنى من رب العالمين إنكم تشورون علي بالحل المناسب , ولكم مني دعواتي في كل صلاة .

أعتذر مرة ثانية على طول الموضوع لكن حبيت أشرح لكم بالتفصيل الحاصل معاي .

في البداية مبروك السيارة والله يطعمك من خيرها ويكفيك شرها
وبالنسبة لموضوع الرجة في الكفرات أنا معي مثل سيارتك وكان عندي رجة بعد ما غيرت الجنوط ولكن مع الترصيص الأرضي طلع الوضع سليم لكن بعض الأوقات احس برجة خفيفة الزبدة لا تأخذ بكلام أهل الغرابي لأنهم أشخاص غير متخصصين ومو فاهمين باشغلة كلها والحل أنك تبدل مواقع الكفرات والجنوط على شكل × مثل الكفر الامامي الأيمن تركبه في مكان الكفر الخلفي الأيسر وتأكد من ضغط هواء الكفرات وبتنحل مشكلتك بإذن الله وإذا كنت أول مرة تملك الأكورد طبيعة العزل الأرضي سيئ بعض الشي وشورعنا طبعاً أسوء شي تحس أن موترك مكسر من كثر المطبات والحفر وفي النهاية أسف على الأطالة

أخوي موهيا

أولا / الله يبارك فيك دنيا وآخرة , وشكرا لك على الدعوة

ثانيا / صدقني يا قلبي , أنا ما أخذت بكلام اللي في الغرابي لأنه أنا متأكد بإنه في كثير منهم يجهل المشكلة الحقيقية وكثير منهم كلامهم عبارة عن افتراضات وتخمين , ولكن الوسوسة دخلت راسي وأعوذ بالله من الوسوسة .

ثالثا / بالنسبة لتغيير الكفرات بحرف الإكس , لما سويت الترصيص العادي لأول مرة عند المحل التابع لوكالة ميشلان , غير مواقع الكفرات مثل ما قلت وبالفعل ارتحت على هالشي , ولكن أمس لما شرحت له السالفة بشكل مفصل استغرب الموضوع وقال لي أخاف نسويلك مثل المرة الأولى وبعد أيام بسيطة ترجع المشكلة في الرجة لذلك ما نبغى نخسرك مبلغ وما تستفيد في النهاية , ولذلك حاول تحل المشكلة بشكل جذري .

وأنا بصراحة في حيرة من أمري , إما إني أروح وأسوي ترصيص عادي وأخليه يغير لي موقع الكفرات وأشوف وش يصير , أو إني أنتظر على وضع السيارة لحد ما ألاقي لي حل رغم إنه اللي حاصل معاي مكرهني السواقة كلها وخصوصا بإنه دوامي بعيد عن بيتي .

في النهاية شاكر لك عزيزي على ردك والله يوفقك دنيا وآخرة .

وأنتظر ردود أخرى من أهل الخبرة

اول شي مبرووك عليك الموتر

الله يعطيك من خيره ويكفيك شره

بما ان سيارتك على الضمان وتوها مامشت الا 16 الف راجع الوكاله وانشب لهم ولاتطلع من الوكاله الا هم حالين الموضوع لك والله الوكاله ماينفع معهم الا العين الحمراء :mad:

المشكله بسيطه هي من نوع الترصيص اذا الجنط 17 كروم افضل ترصيص له لزق داخل الجنط نوع الماني الصنع روح محل برجستون ورصص عندهم تحصل طلبك

وخله ينظف محل الاول بتحصله داخل الجنط وراح تدعي لي

على فكره الترصيص الارضي الي 110 حده لسرعه



شف الصوره هذا ماينفع بريال فتره وترجع ترج طبعا للكروم او ينفك


http://www.blogcdn.com/green.autoblo...ire_weight.jpg

شاهد الصوره الثانيه هذا الافضل للكروم



http://modelkitsreview.com/wp-conten...s/dscn3330.jpg

اهم شي يفك وينظف محله ويلزق صح داخل الجنط وراح تلاحظ فرق

أخوي ملك

أولا / الله يبارك فيك دنيا وآخرة ، وشكرا لك على الدعوة .

ثانيا / قسما بالله العظيم ، قسما بالله العظيم ، ما شفت أسوأ من وكالة عبدالله هاشم في حياتي كلها لأنها وكالة سيئة بكل المقاييس .

من يوم ما طلعت السيارة وأنا أعاني من مشاكل كثيرة ، صوت طقة في كرسي السائق لما أجلس عليه - صوت ديكور مسجل - صوت مخيف جداً بخلفية السيارة - رجة عجيبة بالسيارة - تنسيم هوا من عند السائق فقع راسي منه - صوت بالسيارة من الأسفل لما أحرك الدركسيون يسار أو يمين وهي واقفة تحس في حديد قاعد يتكسر وغير الأصوات الغريبة ، ومع ذلك رحت لهم مليون مرة علشان هالمشاكل ومع ذلك لا حياة لمن تنادي لحد إني طفشت منهم وصار عندي قناعة بإنه /

وكالة عبدالله هاشم ما عندها مهندسين فنيين ولكن عندها مجموعة ( سباكين ) قاعدين يتعلمون على السيارات لأنه أسوأ من كذا صيانة ما شفتها بحياتي .

اللي يزعلك تدفع 100000 في سيارة وفي عندك وكالة ما تحس بهالشي ، الله لا يرزقهم ولا يوفقهم لا دنيا ولا آخرة ، وبإذن الواحد القهار إني أسمع خبر إفلاس هالوكالة .

أخوي القايلة /

والله سويت مثل ما قلت لي ، رحت لمركز بيريللي في غرابي وطلبت منه ترصيص أرضي وقال لي في عندي ترصيص صيني ما عليه ضمان وترصيص ألماني عليه ضمان شهر ، قلت له أبغى الترصيص الألماني ، وبالفعل حط لي نفس اللزقات اللي إنت موضحها بالصورة الثانية ولكن الرجة ما راحت ، ورجعت لهم بعد أسبوع وبالفعل فك السابقات ونظف مكان اللزقات وحط لي لزقات جديدة ورصص لي من جديد ، والوضع ما تغير أبدا مثل ما هو ، ما أدري العيب في ترصيصهم ولا في سيارتي ؟ وتعجبت من الموضوع وصرت ماني عارف إيش أسوي ؟ هل لو غيرت كفرات برتاح من المشكلة ولا بتظل المشكلة مثل ما هي وتظهر لي مشكلة ثانية ؟

صار عندي قناعة بإني أروح لمركز العضيب وأخليه يشيك على عكوس وكفرات وجنوط السيارة لعلى وعسى يكتشف شي وإن شاء الله ما يكون فيها إلا ترصيص أو كفرات وتكون العكوس سليمة ، لأنه لو دخلنا في سالفة عكوس فهذي مصيبة ولكن إن شاء الرحمن ما تكون هي .

في النهاية شكرًا لك أخوي على ردك

ياغالي شكل المشكله عندك بالاذرعه قاعده تاكل الكفرات بشكل غير متساوي

سو كشف بالليزر على الاذرعه الاماميه والخلفيه وشوف وش يطلع معاك

معليش أخوي القايلة بسألك سؤال /

الأرقام اللي موجودة على اللزقات اللي إنت حاطها بالصورة الثانية ، هل لها معنى ولا لأ ؟ لأنه أنا حاط نفس اللزقات بس ما أدري هل نفس الأرقام ولا تختلف .

إذا كانت الأرقام هذي تعني شيء يا ريت توضحها لي إذا عندك علم ؟ وأكون شاكر وممنون لك .

صديقي أكورد سبورت /


في ناس قالت لي ها الكلام وما صدقتها بسبب إنه سيارتي جديدة والحمدلله ممشاي هادي ومحترم لأبعد حد ، ولكن بما إنك جبت طاري هالشي فأنا بسمع نصيحتك وأروح أكشف على الأذرعة كلها بإذن الله ، ولكن سؤالي لك هل تعرف مركز ممتاز ومختص بهالشي ؟ إذا بتدلني بكون شاكر وممنون لك .




شكرا لك على ردك يا الغالي .

الكفرات ياعزيزي غيرها وتنحل المشكله باذن الله
يامحبله ياتخزينها غلط

اقتباس:

---

المشاركة الأصلية كتبت بواسطة فهد أكرم

معليش أخوي القايلة بسألك سؤال /

الأرقام اللي موجودة على اللزقات اللي إنت حاطها بالصورة الثانية ، هل لها معنى ولا لأ ؟ لأنه أنا حاط نفس اللزقات بس ما أدري هل نفس الأرقام ولا تختلف .

إذا كانت الأرقام هذي تعني شيء يا ريت توضحها لي إذا عندك علم ؟ وأكون شاكر وممنون لك .

---

الارقام الي انا حاطها مالها دخل مجرد شكل توضيحي


لاكن بقولك شي دامك صلحت الترصيص الي قلت لك معناته لازم تغير كفرات (سوء تخزين) راجع الوكاله يعطونك ورقه تروح تغيركفرات عند الوكيل على الضمان


وبالتوفيق ومتابع لموضوعك

اقتباس:

---

المشاركة الأصلية كتبت بواسطة فهد أكرم

صديقي أكورد سبورت /


في ناس قالت لي ها الكلام وما صدقتها بسبب إنه سيارتي جديدة والحمدلله ممشاي هادي ومحترم لأبعد حد ، ولكن بما إنك جبت طاري هالشي فأنا بسمع نصيحتك وأروح أكشف على الأذرعة كلها بإذن الله ، ولكن سؤالي لك هل تعرف مركز ممتاز ومختص بهالشي ؟ إذا بتدلني بكون شاكر وممنون لك .




شكرا لك على ردك يا الغالي .

---

والله ماعندي علم بمحلات الرياض لاني ساكن بالجبيل الصناعية

انا سويت بالجبيل فحص عند القحطاني وكان تعاملهم ممتاز ومحلهم نظيف واجهزتهم جديده والعماله فلبينيين

حصلت لهم فرع بالرياض يقولون انه بطريق خريص مقابل الجميح وهذا رقمهم 014922266

ترا الفحص مجاني لاحد يقولك بفلوس اللي يقولك بفلوس خله وشوف غيره

أخوي ( القايلة ) , أخوي ( أكورد سبورت )

الله يوفقكم ويبارك لكم دنيا وآخرة , وأشكركم من كل قلبي على توضيحكم لي لبعض الأمور

أخوي أكورد سبورت / بالنسبة لعنوان القحطاني اللي أعطيتني إياه طلع صحيح مئة بالمئة , واتصلت عليهم قبل شوي من خلال الرقم اللي إنت حطيته وعرفت وقت دوامهم وبإذن الله بروح لهم العصر وأشوف وش يقولون لي , وبإذن الله تكون الأذرعة سليمة ومو محتاجة لوزن وما تكون السيارة محتاجة لأي مقاسات .

أخوي القايلة / والله العظيم من يوم ما طلعت السيارة من الوكالة وأنا فاقعة مرارتي هالكفرات من قساوتها وصوتها المزعج جدا , يعني الأكورد عزلها سيء وكفراتها قاسية فخذلك سيمفونية أوركسترا . على كل حال يا صديقي أبروح اليوم وأشيك على أذرعة وعكوس السيارة حتى أتطمن إنه الخلل مو فيها وبإذن الله تكون سليمة , وبعدها بغير الكفرات على طول وإن شاء الله نتوفق بنوعية ممتازة .

على كل حال وش يصير معاي اليوم أبرجع وأكتب لكم كل شي هنا حتى تعرفون وش صار معاي .

وفي النهاية شكراً شكراً شكراً ومن أعماق قلبي لكم يا القايلة ويا أكورد سبورت ولكم دعواتي في كل صلاة .

بقولك سالفتي مع سيارة اخوي

طلع اكورد 2009 ايام 2010 مخزنه يعني ( اوتوستار)

باول الايام السيارة ترج بشكل واضح رحت الوكاله قلت لهم

عطوني ورقه لمركز برجستون (بحكم ان كفرات السيارة عليها برجستون) لفحص الكفرات وان الخلل من الكفرات وليس من السيارة ( سواء جنوط او غيره )

رحت لفرع برجستون الشفا (متخصص بالعيوب المصنعيه ) فحصها قال المشكله بالكفرات محبله من التخزين

عطاني تقرير للوكاله ان الكفرات محبله من سوء التخزين

رحت للوكاله عطيتهم التقرير وقالو لي هات جوالك وندق عليك اذا توفرت الكفرات

بعد خمس ايام تقريبا دقو علي هات السيارة الصبح

استلمتها بعد الصلاه الظهر بطقم كفرات جديده

* الخلاصه / اذا عندك ورقه تثبت انك اشتكيت من الرجه ببدايه شراء السيارة رح لهم وقابل مدير الصيانه يعطيك ورقه فحص

وان شاء الله الحل من الكفرات يركبون لك جديده

السلام عليكم ورحمة الله وبركاته /

شكرا شكرا شكرا ومن أعماق قلبي لكل شخص رد علي بهالموضوع وحاول يساعدني .

أخوي ( أكورد سبورت )

اليوم رحت لمركز القحطاني اللي قلت لي عليه , وما شاء الله تبارك الله , المركز كبير ومحترم ومن أجمل ما يكون واستقبالهم ممتاز لأبعد حد وتحس الفلبينيين فهمانين

لما دخلت قابلت مديرهم الهندي , وقلت له على مشكلتي وأول ماعرف بإنه السيارة جديدة فقال لي من الصعب بإنه يكون الأذرعة فيها شي ولذلك ما أنصحك تسوي فيها أي شي لا وزن ولا ميزان يدوي ولا إلكتروني أبد سواء عندنا أو عند غيرنا , ولكن أنا متأكد بإنه كفرات سيارتك هي أساس المشكلة ويوم شافني موسوس ( أعوذ بالله من الوسوسة ) قام وطلب من الفلبينيين بإنهم يشيكون على السيارة حتى أنا أطمئن من الداخل , وطبعا يوم فكو الكفرات وفحصوها طلعت الكفرات يا صديقي وكأنها منتهية من 5 سنوات وجالسة تدور بشكل غير طبيعي حتى إنه الفلبيني قالي ( مدير كيف أنت إمشي سوا هدا كفر , هدا كفر ما في دور كويس ممكن بعدين مشكلة على طول , هدا سيارة جديد شوف كفر جديد لازم تغيير على طول ) وبالفعل حبيت أشوف لفة الكفرات وهي على الجهاز وبكل أمانة من سوء لفة الكفرات , كنت حاب أروح وكالة هوندا لأنها جنب المركز وأمسح بكرامتهم الأرض بسبب تخزينهم السيء لأنه حرام 16000 كيلو ماشية السيارة والكفرات معدومة وخصوصا مافي مكان أروحله إلا ويقولون بإنه شركة عبدالله هاشم هي أسوأ وكالة في تخزين كفرات سياراتها بسبب مشاكل الرجات . وفي فلبيني ثاني متخصص بالأذرعة وها الفلبيني أول ما شاف السيارة قالي الأكورد نظامها ما فيه مسامير توازن والرجة الحاصلة ما راح تكون من الأذرعة وكان صادق معي ووضحلي بإنه لا ألعب بالسيارة ولا أوزن ولا أسحب ولا هم يحزنون بحكم إنه السيارة جديدة ( وبكل أمانة ما استفسرت منه عن علاقة مسامير التوازن والأذرعة والرجة لأنه أكثر شي أكرهه بالسيارة هو مسامير التوازن بسبب سيارتي اللومينا السابقة وخصوصا إني كل شهر كنت أغير مسامير توازن من كثر ما كانت تتكسر وأغيرها ) , والحمدلله طلعت من عندهم وأنا مرتاح بعد ما عرفت بإنه المشكلة كفرات فقط . وشكرا لك من كل قلبي لأنك دليتني على ها المركز .

أخواني ( القايلة والمسافر وتعلمت ) / طلع توقعكم صحيح والكفرات طلعت معيدة ومنتهية وما منها فايدة , فياريت تدلوني على نوعية كفرات ممتازة وبصراحة أنا محتار ما بين الميشلان وقساوتها وما بين الهانكوك ونعومتها , مع العلم بإنه الميشلان تعمر وتخدم أكثر ولكن مع الأكورد الميشلان تتحول من كفرات إلى معزوفة موسيقية مزعجة جدا , ولكن في ناس تقول لي في نوعية ميشلان ناعمة وما أدري مدى صحة هالكلام ؟

أعتذر جدا على الإطالة بالرد وأنتظر ردكم ورد الجميع ولكم مني كل الشكر .