فلتر البنزين

السلام عليكم ورحمة الله وبركاته

وبعد :

انا سيارتي اكورد 2007 v6 ماشي حاليا 160 الف ولا مره غيرت فلتر البنزين وهالفتره احس صرفية البنزين
زايده كم سعر الفلتر ؟ وكم تكلفة تغييره ؟
وهل في مشكلة لو غيرته بعد ممشى السياره الكثير ؟؟

وشكرا

وعليكم السلام ورحمة الله وبركاته

أنا مغيره قبل تقريبا 4 سنوات

سعر الفلتر ذاك الوقت بـ 170 ريال بالوكاله عاد ما أدري الحين بكم
واكيد تلقاه ارخص عند محلات قطع الغيار

شغل اليد يتراوح بين 75 - 130 ريال كحد أقصى .. أو ممكن أقل انت وشطارتك و حسب الورشه

حاول تكاسرهم بالسعر وحاول تروح لأكثر من ورشه تقارن الأسعار


ما أعتقد فلتر البنزين يأثر على صرفية البنزين..
لكن هو له دور بــ :
1) عزم السياره شوي
2) تقليل الضغط على طرمبة البنزين والمحافظه عليها
3) تقليل الأوساخ اللي تروح للبخاخات والمحافظه عليها
4) صفاوة المكينه


الأشياء اللي تأثر على صرفية البنزين بكل السيارات :

1) البواجي سعرها 50 ريال عند محلات فطع الغيار , نفس اللي عند الوكاله بالضبط .. يفضل وينصح بتغييرها والمكينه بارده كل 40 ألف كيلومتر

2) فلتر الهواء أصلي وكاله سعره 110 ريال تقريبا ؛ إذا كان مليان غبار أو شبه مسدود .. تصير السياره تعوض نقص الهواء بصخ بنزين أكثر بكل السيارات

3) لو عندك تنسيم بالهدرز أو الماصوره اللي قبل دبة التلوث .. لأن الأماكن هذي فيها حساسات بكل السيارات .. لو كان فيه تنسيم تصير الحساسات هذي تقول للكمبيوتر فيه كميه هواء أكثر من البنزين .. ثم الكمبيوتر يعطي إشاره للبخاخات بأنها تضخ بنزين أكثر .. عشان يكون فيه نسبة معينه للبنزين والهواء

4) ضغط هواء الكفرات خله على 30 والكفرات بارده واقفه لها كم ساعه ؛ لأن مع الحراره وإذا مشيت عليها كم مشوار معروف يزيد بمقدار 2 PSI تقريبا

للأمانه الحديده اللي عند باب السواق والكتالوج مكتوب فيها الكفرات الأماميه 32 والخلفيه 30 والكفرات بارده
لكن إذا مشيت مشوار طويل عليها بتصير الأماميه تقريبا 34 والخلفيه 32
ما ينفع مع شوارعنا
خلها على 30 أحسن والكفرات بارده

و قبل تغير فلتر البنزين أو البواجي .. أنصحك تستخدم محلول سائل تنظيف البخاخات يا تشتري ياباني أصلي من ميتسوبيشي أو تشتري أمريكي من ساكو .. إذا ولعت لمبة البنزين صبه في التانكي ثم عب فل أو نص أو 3 أرباع التانكي حسب كمية المحلول تلقى مكتوب عليه

5) لزوجة الزيت ؛ زيت 10W30 يقلل صرفية البنزين يعني لو مثلا سيارتك تمشيك بالفل 500 كيلو .. تصير تمشيك 600 كيلو تقريبا

لكن المشكلة عندنا صيف حار جدا عشان كذا أنا أستخدم 20W50 بالصيف و بالشتاء 10W30

طبعا اذا سيارتك ماشية 300 الف او اكثر اعتقد ما ينفع لها الزيت الخفيف

6) كل ما زاد عرض الكفرات تزيد صرفية البنزين

7) فك بلف الحراره يزيد صرفية البنزين بكل السيارات ؛ لأن السياره مصممة بأنها تكون شغاله على درجة حرارة معينه ؛ لكن الحمد لله ما عمري شفت أكورد مفكوك بلفها حرارتها ممتازه

8) تغيير الزيت كل 5 آلاف كيلو وفلتر الزيت كل 10 آلاف كيلو


فلتر الهواء والبواجي وتنظيف البخاخات أهم من تغيير فلتر البنزين

و للفائدة هذي صور لفلتر البنزين من أحد المواضيع بالمنتدى

http://www6.0zz0.com/2011/03/17/14/254953218.jpg


مكانه بشنطة السيارة فيه غطاء تحت الفرشه

http://www6.0zz0.com/2011/03/17/14/866459591.jpg

http://www6.0zz0.com/2011/03/17/14/461079042.jpg

http://www6.0zz0.com/2011/03/17/14/683200181.jpg

http://www6.0zz0.com/2011/03/17/14/514839014.jpg

http://www6.0zz0.com/2011/03/17/14/977858673.jpg


بقية الصور

http://www.hondaarabia.com/club/-accord/46289-a.html

مشكور اخوي ما قصرت
انشهد انك كفيت ووفيت
يعطيك الف عافيه