.: مشكلة :. مبرد القير ضرب وخلط موية وزيت فزعتكم يا أهل الخبرة .. آكورد 2008
السلام عليكم ورحمة الله وبركاته
أسعد الله أوقاتكم بكل خير
المشكلة يا أخواني كالتالي بإختصار مالكم بالطويلة
قبل المشكلة بأيام ويمكن أسابيع لاحظت فيه مشكلة بالتعشيق اذا كنت ماشي بالسيارة ووقفت لفترة معينة وجيت شغلت مره ثانية بمشي
ودقيت الريوس مايشبك لازم ارجعه بالـ P ثم اعشق ريوس من جديد ويمشي الوضع وهذا كأن خلل مني أني أهملت الموضوع ودليل على قوة قيرات الهوندا :beaten:
وفي أحد الأيام كنت ماشي في البلد بعد ماطفش القير مني ومن اهمالي له واقف عند الاشارة والا السيارة تقول مكاني هنا وماني متحركة
ادوس بنزين والقير عالـ D بس مافيه فايدة ...
على طول عرفت ان فيه مشكلة بالقير لكن اللي ماتوقعته أول مافتحت الكبوت ورحت على معيار زيت القير فتحته وسحبت المعيار
الا والله اشوف لون الزيت متغير وشكله مخلوط بمويه
المهم اني دقيت على سطحة وجت وشلت السيارة عن طريق واحد أعرفه وداني عند ورشة فلبيين متخصصين في القيرات بالجبيل في العريفي قال الفلبيني نوضب لك القير وراح يكلفك 6000 ريال لأنه 6 سلندر وقال هااااه عشان تصدق شوف هذي توها أكورد نفس موديل سيارتك بس هذيك اربعة سلندر يقول موظبينها بـ 5000 آلاف :suspicion:
قلت خلني أشوف الوضع خل السيارة واقفه عندك وبجيكم بكره .. المهم أني استخرت الله قلت خلني اشوف ورشة ثانية أفضل رحت جبت سطحة اليوم الثاني وجيت للفلبيني قلت بروح لورشة ثانية وسبحان الله شغلت سيارتي وعشقت طلعت السيارة من حالها للسطحة ولا كأن فيها شئ القير شغال ريوس وقدام ويعشق مضبوط .. وكان يتابع الموقف هذا شخص سوداني من الورشة اللي جنب ورشة خوينا قال ياسيدي تعال وش الموضوع قلت له كيت وكيت قالي الزول آآآآآي سيارتك القير مافيهو شئ مجرد نفك لك القير بننظفه وبنشوف اذا فيه كلتشات معدومه بنغيرها ( الظاهر قصده الموضوع مايحتاج توظيب كامل ) وقال نغير زيت ونغير المبرد بتكون سيارتك زي الفل وراح نأخذ منك 3000 ريال
... صراحة حسيت السوداني معه علم
ولكن أنا انسان ماحب استعجل وبما أن عندي سيارة ثانية وكانت أموري المادية مش ولابد وقتها خليت صاحب السطحة يمشي قلت أفكر وأشوف وديت السيارة وقفتها تحت البايكة بالمكان اللي أنا ساكن فيه والسيارة نزلت من السطحة شغالة نزلتها من السطحة والقير شغال بدون دف ولا شئ وقفتها وشغال القير ما كأن فيه شئ والآن السيارة صار لها مايقارب 6 شهور واقفة أشغلها من فترة لفترة ولازال القير يعطي تعاشيق طبيعي وتفز السيارة ما شاء الله ولكن الزيت مخلوط مع الموية حتى بالرديتر الموية طالعة مخلوطة بالزيت تقول كبيت لبن بدل الموية :playful:
سؤالي يا حباني بعد المقدمة الطويلة هذي اللي لازم منها عشان نعرف تاريخ المشكلة وتسلسل الأحداث
وش تنصحوني فيه ؟؟ نصلح القير نفك ووننظف على قول السوداني ؟؟
والا اشتري واحد من التشليح ؟؟ وكم سعر المبرد في الوكالة ؟؟
وش يتوجب علي اسوية بالخطوات ؟؟ وش تنصحوني بورشة كويسة بالجبيل أو الدمام يكونوا فاهمين بالقيرات ؟؟
وهل الرديتر تأثر من جراء عملية الخلط ؟؟ << أتعب عاللغة العربية هههه
وش رأيكم بالقيرات اللي تجي من تشاليح الكويت قالي عليها واحد من الشباب ؟ هل تنصحوني فيها والا لا ؟؟
علمي وسلامتكم وأبي المشورة منكم
