تكككككككفى مساعدتكم

السلام عليكم ورحمة الله
يا اخوان تكفى مساعدتكم :ambivalence:روالله مرضت من السيارة دي هوندا سيفيك 2005 بحكيلكم قصتي من البداية
انا اشتريت السياره دي من خالي بعد ما افترى فيها صراحة كان كل يوم يطلع فيها ذهبان بحكم عمله
المهم انا اشتريت السياره منه لانه طلعله سياره كاش في البداية كانت معايا زي الحلاوة الصلاة على النبي
بعدين بدات تبهلل شوي شوي مرة الوالد يخذها ويجي يقولي سيارتك تهرب زيت قلت بس شكله الكارتير
الا واشيك والاقيه تمام طيب من ايش وكنت لسه ما افهم في السيارات الين ما جاء جاري ومعاه نفس موديل سيارتي اللهم هو 2004 ماتفرق كتير,المهم ونصحني بورشة الجنوب اللي في الاسكان واروحلك ويقولي الصوف متهرهره عند مره ,قدر الله وخويي جاري كان معاه صوف وكالة قالي شيلها بنص القيمه جزاه الله خير,وصلحناها ومشي الحال الين بدات تبهلل مره تانيه ايش في الا ار بي ام يلعب لعب والسياره كاني ادعسلها بنزين وانا اصلا بره طيب ايش المشكله قالوا بوابه طيب اشتريت بوابه من عند الرجال حق ورشة الجنوب لانه جديد انتو تعرفو كم سعره المهم مشي الحال لين ماجات المشكله دي اللي الا الان ماحصلتلها حل ,وطالب مساعدتكم ارجوووكم فيدوني ....

المشكله عندي كل ما امشي بالسياره مسافة طويله تروح السياره تطفي اي والله طلعت عيني المشكله انها لمن تطفي تصلب كلها عشانها هيدروليك وبغت تروحني مره بس ربنا ستر ,انا ماعليا بس خايف مره يكون معايا اهلي وتطفي حتى اهلي ماصرت اشيلهم الا المشاوير القريبه بس ,حاولت احل المشكله رحت لكهربائيه كتير قالو هذي طرمبة البنزين ياحساس التيمن,سالت ناس تاني قالوا مالو علاقه حساس التيمن الاعراض اللي عندك طرمبة بنزين ,غيرت طرمبة لبنزين ,والمصيبة المشكله زي ماهي تعبت والله قلت مالي الا افحصها كميوتر طلع النتيجه يقولي ظفيره بس ظفيرة ايش ما يدري
المهم زهم الكهربائي فتش فتش فيها لين م جاء رطن معاه المهم انا على اعصابي قالي عندك الالتماس في ظفيرة المكينه مع ظفيرة طرمبة البنزين,طيب صلح ضحك في وجهي قالي حتكلفك 'طيب كم
قالي بتكلفك 1350 غير القطع يالطيف وانا والله حالتي وكذا قالي من الاخر 800 ريال
المهم انا دحين ما ادري هوا صادق ولا لا خايف تكون المشكله بسيطه ,وخايف تكون المشكله كبيره
عشان كدا بعرف رايكم وارجووووو الافادة....

وعليكم السلام

المكنيك الي يقول لك طرمبة البنزين هذولا مكنيكيين سيارات قديمه .

الظفيره هذا كلام فارغ .


مشكله انطفى السياره فجئه بسبب عطل
1_ حساس الكرنك بنسبة 50% ( Sensor Crank )
2_ أو صمام Valve EGR

هذه صورة الحساسه ومكانه جوار فلتر الزيت طريقة تركيبه تشيل مفاتح السياره من السوتش وتفصل البطارية وتركب الحساس

وان شاء الله تضبط معاك .

اعتقد موجود عند الوكيل فقط . وتقدر تركبها بنفسك . الصمام شوفه بالتشليح . ارخص

ملاحظه هامه : بعد تركيب الحساس حافظ على كيس الحساس والفاتوره بشكل سليم على شان اذا قدرالله
والمشكله ما راحت فك الحساس ونظفه ورجعه . حاول تطلع مسافات طويله وجرب الحساس بنفس اليوم .

وتعال هنا بلغنا ايش صار معك

هذه صورة حساس الكرنك

https://static.baza.farpost.ru/v/1450663005288_bulletin



هذه صور الصمام . وعلى الفكرة الصمام ممكن يتنظف ويضبط معاك اذا مو عطلان كليا .

http://img.justparts.com/eImage/129b...0e9b015cf0.JPG

شكرا لك اخي ابو كريم وشاكر لك ردك
ابغى اخذ بقولك والله يعيني على التشاليح وهم التشاليح
وحا ارجع اقولكم ايش صار معايا.....

الحمدلله يااخوان طلعت المشكله من حساسات التيمن واحد منها زي ماحطت صورته ابو كريم
وديتها ورشة الجنوب اللي في شارع الاسكان في جدة
والان انا قاعد اجربها لانه اعطاني ضمان شهر على الحساسات لانها مستعمله
اخذ علي 450 ريال بعد المناحله معاه نزلها من 700
على العموم انا بجرب وبشوف وان شاء الله ماتطفي.