الموضوع: :: تركيب الفلتر الرياضي على الأكورد من 2003 إلى 2007 ::

It's Me :
أهلا حبيبي خالد , يا قاطع .
إنشالله الأعضاء يستفيدوا و نشوف تطبيق منهم .
بالنسبة إللي قاللي و نصب علي هو واحد الله يستر عليه معاه سيفيك عليها بدي كت و جنط ساموراي مقاس 18 و مركب إنتيك لونج أمس رجعه شورت :p .
بس الله يستر عليه , لا تزعل ترى حتى القحطاني قالي نفس الكلام و حتى يوسف صاحب المحل يقول بالنسبة للأكورد فالشورت أفضل .
شكرا خالد على الرد الحلو .

عشقي الأول :
أهلا فيك , أخوي أنا بأتكلم عن ناحية إن الشورت أفضل من اللونج بالنسبة لسياراتنا بس , أنا سقت أكورد عليها لونج و الصراحة بين سيارته و سيارتي ما بأشوف فرق بالعزم و هو نفسه صاحب السيارة بيقولي بالنسبة للأكورد ترى ما في فرق ;) .
أول شي إحنا 4 سلندر و اللونج يحتاج مشوار إلين يوصل الهواء للمكينة , صحيح الهواء بيكون أبرد لكن إذا جاك سيل و لا مطر قوي ودخلت الموية على الفلتر و من الفلترللمكينة , هنا و ش راح تسوي ؟
أتمنى تكون فكرتي وصلت ;) .

wahd :
القطع بتكلفك التالي :
الإنتيك بـ 250 ريال مع لي واحد و مع الفلتر رجيع الزيت .
الفلتر بـ 350 ريال .
اللي الثاني مع الربلة المتحركة بـ 50 ريال .
الشدادات الثلاثة بـ 8 ريال .
يعني كلها على بعضها بـ 658 ريال .
إذا تبي تركبها عند محل فراح ياخذ منك أكثر شي 50 ريال .

Halo 5 9 5 :
أهلين يالغلا , أنا شرحت فوق ليش الشورت بالنسبة للأكورد أفضل من اللونج ;) , يعني أنا أخوي معاه ألتيما 6 سلندر مركب قطع لليل الطويل و الإنتيك إللي عنده لونج و يقول السيارة 6 سلندر فوصول الهواء ما يفرق لأن فيه قطع ثانية مثل الهيدرز بتساعد على انسيابية مجرى الهواء .
و صح هو نفس فكرة المكينة لما تكون باردة و لما تكون حارة فالفكرة هنا إن لما المكينة تكون باردة فالمروحة ما تشتغل بكامل طاقتها فبالتالي عزم أفضل و تسارع أقوى ;) .
و لو فرق حجم الفلتر أبدا ما في اختلاف في القوة , يمكن يكون فيه اختلاف بسيط بين الماركات عشين كدا أنا اخترت الـ K&N لأنه الأفضل , واحد ثاني مركب Simota و الثالث مركب AEM و أعتقد إنه ما في فرق :d .

ن ا هـ 777 :
حتى لو يعطي 6 أحصنة , ليش ما هي حلوة ؟ ترى بتفرق معاك بالعزم خصوصا بالخط ;) .

just ACCORD :
الفلتر السبورت يالغلا يدخل هواء أكثر للمكينة و النتيجة عزم أقوى و تسارع أنشط .
أما بالنسبة للأضرار فما في أضرار بالعكس إنت بتفك عن المكينة الضغط و تخليها تاخذ راحتها :d .


تدرون ياشباب إحنا هنا أول ما الواحد يشتري السيارة وش يسوي ؟ .
أنا بأقولكم , يركب زينون :d . و الله من جد هذا أول شي يصير في السيارة .

أما بأمريكا الشباب أول ما يشترون السيارة , أول شي يركب عليها هو الإنتيك و إذا ما لقى إنتيك يفك البوكس إللي تحت الفلتر و يطلع نفس صوت الإنتيك .

شكرا ياشباب على تفاعلكم مع الموضوع و على ردودكم .




تحياتي لكم .
أخوكم / خـــالـــد .

هلا بالشباب مرة ثانية ...

محمد بن عبد العزيز :
يشرفني مرورك و ردك على الموضوع يالغالي .

أبوكرم :
قريبا بإذن الله الإكزوز و الهيدرز ;) , أصلا شغلتهم أبسط من الإنتيك لكنهم بيطولوا .
شكرا على مرورك و تواجدك .

نادر وجودي :
شكرا لك حبيبي على ردك الحلو .

first :
أهلا سلطان , بالنسبة للسؤال الأول فالفرق راح يبان في الـ 6 سلندر أكثر من الـ 4 سلندر و في هذي الحالة فاللونج أفضل .
بالنسبة للسؤال الثاني فالمروحة وظيفتها إنها تدخل هواء بصورة أسرع للمكينة .
فكرتها إن الهواء يدخل بصورة لولبية و ليس بشكل مستقيم , فهواء أسرع و بالتالي عزم أفضل ;) .

بعدين لو الانتيك افضل للمكينة ليش الشركة ما حطته
هذا مو بس في الاكورد حتى في السيارات الرياضية مــثـال مستوبيشي الايفولوشن

الشركة ما يهمها إلا إن السيارة ترضي العميل و ترضي متطلباته , يعني الأكورد سيارة رسمية فالشركة ما راح تحط لها إنتيك عشين تقلبها سيارة رياضية . و بالنسبة للإيفولوشين , هي فيها تيربو فإيش تبغى بالإنتيك ؟ :p .
شكرا سلطان على مرورك و ردك حبيبي .

HONDA BOY :
هلا ببراء , إنشالله الناس تستفيد و نشوف تجاربهم على التركيب ;) .
شكرا على ردك و مرورك .

i-vtec2005 :
حلوة فكرة العازل و أنا بأدور عليه من فترة و ماني محصله هنا بجدة .
شكرا على ردك يالغلا و الله لا يحرمنا منك .

ابوناشي :
و عليكم السلام , و إنت بصحة و سلامة و رمضان كريم :d .

بسألك أخوي أكورد هل يختلف عدد الأحصنه من سيارة الى سيارة ولا ثابت في جميع السيارت 4 سلندر؟ وكم تعطي لسيارات الـ 6 سلندر

طبعا يختلف من سيارة لسيارة و كل مكينة و قدراتها , يعني الإنتيك بيعطي للأكورد 4 سلندر 6 أحصنة و للـ 6 سلندر 10.4 أحصنة , بينما للألتيما بيعطي للـ 4 سلندر 6.8 أحصنة و للـ 6 سلندر بيعطيها تقريبا 12 حصان .

الله يخليك ممكن تشرح لنا مميزات هذا الفلتر وتسوي مقارنه بينه وبين فلاتر ثانيه متوفره في أسواقنا

هذا الفلتر و إللي إسمه K&N أحسن فلتر موجود بالسوق و ما يحتاج تغيير إلا كل 100.000 كلم . و تنظيفه يكون بعد كل 4 أشهر .
أكثر الفلاتر المنتشرة بالسوق هو الـ Simota و هو جيد و حلو لكنه ما بيعيش مثل الـ K&N .
و الـ AEM حلو و جيد إلا ممتاز على الأكورد لكنه يتوسخ بسرعة بس هو أفضل شي بعد الـ K&N .

هل فيه فلاتر تعطي قوة أكبر منه وبنفس سعره .. يعني 600 ريال كثيره مرة على 6 أحصنه صح؟

و الله أنا أشوف إنها مي كثيرة , يعني إحنا بنتكلم عن 6 أحصنة على الكفر , أضف إلى ذلك المروحة بـ 4 أحصنة و بكدا تعطيك 10 أحصنة على الكفر ;) .

تقدر تسوي لك برمجه بـ 500 ريال وتعطيك 20 الى 30 حصان !!

و الله إذا تعرف محل يسوي برمجة للأكورد بالسعر هذا أنا مستعد و بأكون أول واحد يسويها .
الأكورد مالها برمجة , في جهاز ينباع إسمه الأبيكسي و سعره بـ 1400 ريال و هو هذا البرمجة حق الأكورد و إذا عليها قطع راح تنبسط :d .
شكرا على الإضافات القيمة أخوي و الله لا يحرمنا منك .

أهلا أهلا بالشباب ....

Mr. K H A L E D :
هلا و الله بسميّي , أشكرك جدا على الإطراء و على التشجيع يا غلاهم .

ميدو مشاكل :
يالله إنت حييّه , وش أخبارك عساك بخير إنشالله .

انا لازلت متمسك بـ عرضك ,, اني اتصل عليك تركبلي اياها ,, لان انا " أجبن " مني مافي ,,, احب اركب وافك بيدي ,, بس لازم واحد فاهم معايا ,,,,

ياحبيبي و أنا أبغى أركبلك إياه , بعد آمرني يكفي إنك جاي من طرف ملك مملكة جدة ;) .
و لو شفتني بأركبه راح أعلمك على كل صغيرة و كبيرة مكانه و يمكن في أقل من ساعة و إحنا خالصين ;) .

وبعدين بـ صراحة انت وصفتلي محلين واحد للانتيك والثاني للفلتر ,, تعرف خايف من ايش ,,, ولا تضحك عليا , خايف اشتري وحدة من محل وما القى الثانية ,,,
المروحة كم سعرها ؟

و الله و خوفك في محله حبيبي , أمس رحنا نشتري إنتيك لواحد في الشباب و وصلنا المحل و إلا قالنا يوسف إنه مخلص , فأتصلت على براء ( HONDA BOY ) و قالي إنه هو أخذ آخر حبة و أنا إللي ركبته له برضو ;) .
من ناحية أيهم أول فالإنتيك قبل الفلتر , لأن الفلتر متوفر لكن الإنتيك صعبة تلاقيه فإنشالله أول ما يوصل للمحل أنا بأتصل عليك و نشتريه إنشالله .
المروحة سعرها 150 ريال بس ما هي موجودة بالسوق كله , يمكن تحصل النوع الكوري لكن أنا إللي عندي هو النوع الأمريكي .

التجمع الجآي ,, اجيكم مقرقش:d ,, ونروح نمر ع المحلات نشتري القطع ونقعد نركبها في التجمع !!
:o بما ان الشغله تاخد ساعه :o
بعدين تعالي قولي ... انا سيارتي جير عادي يفرق عن الاوتو ولا شلون !!;)

يا شيخ و قت ما تحب أنا جاهز و تحت أمرك . و منها الشباب ياخذون درس تطبيقي على الطبيعة :d .
و من ناحية إنك قير عادي , يا شيخ إنت التوب , أكيد بيفرق . أصلا صوت سحبة الهواء طرب و حشرة النمرة عالم ثاني .
بس لازم أجرب معاك بعد التركيب لو إنك تنمّر صح .
في واحد في الأعضاء معاه قير عادي 2005 و أنا ركبت له الإنتيك كمان و جربت معاه بعد المروحة و حتى هو مركب المروحة .
في الحقيقة و في البداية كنت خايف إنه يقوم علي و بعدها ما أشمه :( .
لكن قلتله دحدرة 30 و بس مع البوري الثالث . أنا أفز و أطلع عليه بالقير الأوتو بفرق سيارة أو سيارة و نص ;) . و هو ماشالله معروف إنه سواق أوتوكروس و جايب تواقيت مرة حلوة .

بالنسبة للـ COVER فهذا شي ممتاز بس تدري ليش , الفلتر إللي في الصورة هذا المقاس الوسط إللي فيه فتحة أمامية يعني الهواء يدخل من الفتحة الأمامية للفلتر و هو نفس إللي مركبه العضو It's me .
أنا إللي عندي المقاس الكبير ما فيه فتحة أمامية عشين كدا ما أقدر أحط هالـ COVER .

طبعا باين من شكل الفلتر إن راعي الألتيما عنده الإهتمام و العناية = صفر على اليسار :d .

أخوي السعدي

بالنسبة للمنتج كامل فهو يباع عن طريق الإنترنيت و سعره 958 ريال بدون الشحن .
و عاد إنت و الشركة إللي تبي تشحن معها .
و هذا الرابط إللي موجود فيه :
http://www.ridepros.com/air-intakes/61A1915A0A0.aspx

و موجود بجدة الـ injen و سعره 1000 ريال مع إطار للوحة و الاستيكرات .