الموضوع: كيف أعرف أن القير بحاجة إلى توظيب ؟؟؟

نصيحتي في هذي الأمور لاتأخذ بكلام واحد..

شف لك أكثر من ورشة وبعدين إذا تأكدتمن الخراب يصير خير وقتها .

س1 / كيف أعرف ان القير فعلا يحتاج إلى توظيب ؟؟
لما تمشي بالبدايه يعني بالاول .. ويتاخر بالتعشيق .. واذا مره مره مره تبي تعرف ..
لما تدعس يكون مفضي القير من نفسه لحد ما يمسك ..
او .. لما تكون D4 بيكون ضعيف .. بتضطر انك تحطه على D1
اذا احتمى القير يبدا يحوسك عند اشاره والا بمواقف .. ولما يكون بارد عادي بيعشق معاك زي اللوز
(هذا ماحصل معي باكورد 2002 سبشل اوتو)
س2 / كم تكلفة الإصلاح المتوقعة ؟؟ وهل يحتاج قطع ؟؟
انا وظبته بـ 2500 ريال والقطع عليه ومع شغل اليد .. ولي 9 شهور وللحين ماشتكيت منه ..
صلحته بالرياض بالصناعية القديمه .. ويعطيك ضمان 3 شهور
س3 / هل تنصحون بعمل التوظيب في الوكالة ؟؟ وكم يكلف هناك وكم تبقى السيارة عندهم ؟؟
انا رحت للوكاله وخسرت مبلغ علشان تشييك وفي الاخير يقول توظيب .. ويكلفك 7000 ريال ..
وانا اكيد ابسيير نحو الباب..:d
س4 / أريد الكشف على السيارة عند ورش صح وناس فاهمين حتى أتأكد فعلا ما المشكلة ؟؟
الورشه مادري عنهم .. بس انا كنت موصى على ورشه بالصناعيه القديمه (اتراك) وتخصص قيور اوتو
واذا تبي الوصف .. ابشر وناخوك>>يمكن مايخش النت :d
اول ماتجي للصناعيه القديمه متجة لاشارة زجاج السالم .. تعدي الاشاره وفيه لفه بعد التويجري .لفة صغيره
خش يمين معها .. ورووووووووووح سييييييييييييده .. لحد ماتجي ورشة نمره على يدك اليمين طبعا ابو 100 متر وانت جاي ..
روح لواحد اسمه (جيــم) بفتح الجيم ..;)
وقوله انك جاي من طرف راعي الاكورد 2002 الفضيه الي مصلح القير عندك
>وكان مشكلته كلتشات القير ..

.
اخوي الافضل انك توظب القير ..
ولاتاخذه من التشليح ..
انا اقولك ليه .. نصحني الي صلح موتري وقال اذا بتاخذ قير تشليح من اليابان والا من هنا
انت ماتعرف القير وش يحتاج والا وش فيه القير من استخدام ..

اما التوظيب .. يقول انت تجدد القطع الي بداخل القير.. وانت عارف قيرك .. وشهو من لحيه ..:d

هذا ماحصل معي
بالاكورد 2002 سبشل .. قير اوتو
تم التوظيب في شهر 12-1428 هـ
والى الان ماشي تمام الحمد الله .. تكلفته 2500 ريال ..

خلوني أعلمكم وش صار معي عشان تتم الفائدة

حسيت يوم الاثنين بزيادة في المشكلة فرحت للوكالة وسألتهم عن التوظيب فقال الفني التوظيب بـ (1800) ريال فاستغربت أنه ارخص من الورش الي برا لكنه أكمل كلامه وقال والقطع عشرة آلاف !!!!!! انا مدري اضحك والا اصيح :( قلت طيب خل الفني يركب معي بس يشوف الوضع ، قال الفني ما يجرب السيارة إلا لما تكون مدخلها عندنا رسمي ولازم تاخذ موعد والكشفية بس 150 ريال

يا حبيبي

قلت طيب بغير زيت القير بس ( تذكرت نصيحة الأخ الهادف الله يجزاه خير ) فقال رح للخدمة السريعة وغير الزيت عندهم وفعلا رحت للخدمة السريعة لأن لهم مكتب مستقل وأخذت رقم 93 والرقم الظاهر على الشاشة 87 قلت كويس باقي 6 ارقام وكانت الساعة 10:45 ليلا يعني باقي ساعة وربع على نهاية الدوام لكن للأسف تأخرت الخدمة ولا مشى السرا وكلمت الفلبيني موظف الاستقبال وقال حتى لو استلمنا سيارتك الآن ماراح تاخذها إلا بكره !! قلت طيب كيف اروح للبيت ؟؟ قال أجل رح على سيارتك وتعال بكره الصباح الساعة 9 مع بداية الدوام لأنه مافيه زحمة ..

وقصدي من الاستطراد السابق أن خدمات الوكالة بحاجة إلى إعادة نظر لأن مستخدمي الهوندا في ازدياد ونريد زيادة في فروع الخدمة على الأقل الخدمة السريعة لأنها تستحوذ على أكثر الزبائن ( تشييكات 1000 و 5000 و 10000) وبعدها يبدا الواحد يتكاسل ويطنش ويقل حرصه على السيارة وممكن يوديها لأي ورشة لذلك يا ليت الوكالة يزيدون فروع الصيانة وأنا أتحدث عن الرياض ودنا بفرع في الدائري الشمالي وفرع على الدائري الغربي وفرع في الدائري الجنوبي . . والزود ولا النقص

المهم رجعت لهم الثلاثاء الصباح قبل ما اروح للدوام ودخلت السيارة وما قصر الفلبيني قال لهم يبدون بسيارتي قبل السيارات الي كانت واقفة من البارح لأني موجود عندهم واهل السيارات الثانية نايمين في بيوتهم وبعد تغيير الزيت تحسن أداء القير ومسكت بالسيارة خط خريص ورجع عن طريق الدمام ثم نزلت على طريق الملك فهد ورحت للدوام والتحسن ملحوظ

والشكر موصول للأخ الهادف على المشورة بتغيير الزيت

لكن التحسن ما تم وبدأ التراجع وبدأت النتعه ترجع ورحت لورشة تحسين في أم الحمام وركب معي فيصل وجرب السيارة بنفسه وقال القير صحيح انه يمكن يخرب أكثر بس ماندري متى لكنه ينصبر عليه بس عندك مشكلة ثانية هي الي مسببه الصوت !!!!!! قال الرمانات حقت الكفرات بنغيرها ، قلت أمري إلى الله وأدخلها عندهم واستاجر سيارة بثمانين ريال ورحت عليها للدوام يوم الأربعاء وكلمت فيصل بعد التراويح يوم الربوع (أمس) وقال تعال السيارة خلصت ..

رحت لهم وقال غيرنا الرمانات وصلحنا تهريب في زيت الدركسون (كنت أدري عن التهريب من فترة) وحسابك بالقطع وكل شي 650 ريال وانا الي آخذ السيارة واجربها يوم انبسطت :d لأن أداء القير مقبول وممكن يعيش فترة والصوت الي كان يحن اذا مشيت 100 أو أكثر راح لأن سببه كان الرمانات لكن ما أمداني اتهنا بالسيارة يوم واحد الا وترجع عباطة القير أردى من أول :( يعني من جد صار يفضي اذا جا يغير من الثالث إلى الرابع وأيضا ينفض السيارة اذا وقفت عند اشارة ، واذا جيت ابدا المشي بالسيارة يتأخر في التغيير من 1 الى 2

قلت مابدهااااش لازم ارجع لهم وانا الي ارجع لهم اليوم (الخميس) الظهر ودخلت السيارة وقال فيصل بندور لك قير من التشليح وبنعطيك عليه ضمان أوفر لك من التوظيب وأقل وقت تصليح .. قلت على بركة الله .. واستاجرت هونداي الانترا 2008 الله يقلعها كنها كرتون هههههههه

مالك الا الأكووورد

المشاركة الأصلية كتبت بواسطة أبوراكان الهنداوي

والشكر موصول للأخ الهادف على المشورة بتغيير الزيت

العفو اخوي .. لاتشكرني ولكن قل الحمد لله رب العالمين ..

المشاركة الأصلية كتبت بواسطة أبوراكان الهنداوي

ولو يالهادف لم يشكر الله من لم يشكر الناس

وبما أنك مشرف زينون ودي أسألك عن الزينون حق Crv هل يمكن تركيبه خارج الوكالة ؟؟ وهل هو مجرد شمعة تركبها أو يحتاج جهاز معين يركب داخل السيارة ؟؟

لأني سألت عن Crv فوجدت منه فئة بـ(96000) ريال والفئة الأعلى منها بـ(102000) ريال والفرق بينهم فقط الزينون !!!

فهل هو فعلا يستحق هذه الزيادة ؟؟؟ وما ميزته عن الأنوار العادية ؟؟؟

يعني تقدر تقول ان الفرق في سعر الزينون فقط ؟؟؟

طبعاً الفرق هو اصطابات والزينون والكمبيوتر والتسليكات واتوقع قيمتها تعادل الفرق ..

اذا حبيت تاخذها من غير زينون وتركب زينون برى تقدر من نوعية Denso .. اصلية 100%

ولكن لون وكالتها احلى من الـ Denso ..