شباب ..احذروا من سمكرة سياراتكم عند وكالة هوندا بالدمام ( على طريق الخبر - الدمام السريع ) ..أحكيكم عن تجربتي الأليمة معاهم:
قبل عدة سنوات كان معاي سيفيك مطلعها وكالة في سنتها وفرحان بيها وبعد كم شهر طلع لي واحد من لفة وخش عرض علي وجت الضربة في الرفرف الخلفي بعد الباب الخلفي اليمين وكمان جت في الرفرف الأمامي اليمين والأبواب ماحاشها شيء يعني هو لما طلع من اللفة صارت سيارته موازية لسيارتي وضرب بيها ..المهم وقفت أشوف أبوالشباب ..اش شكله ؟؟ طلع يتأسف وأنا كنت مستعجل ومنتبهت والذي منه ..المهم سامحته بعد ماحكى لي عن ظروفه المادية ..وجاء المرور وعدت السالفة وقلت ياواد ياخلف مالها غير الوكالة سيارتك دوبها جديدة ..ورحت الوكالة وقالوا لي مبلغ غالي ويبغوا يسمكروا الرفرف الخلفي لأنه مايتبدل لأنه من ضمن هيكل السيارة ككل وبدهم كمان يغيروا لي الرفرف الأمامي والباب الأيمن الأمامي !!!!!!!! طب اش دخل الباب الأيمن مافيه ولا ضربة !!!! المهم رحت ورشة كويسة ومعروفة بجودتها بخضرية الدمام وقالوا لي مبلغ وقدرة وهو ربع مبلغ الوكالة بس شغل مضمون وماعليه كلام ..أنا اغتريت بالوكالة للأسف ورحت دخلت سيارتي الوكالة حتى يسمكروها وجلست عندهم ثلاث أسابيع ورب الكعبة لما جيت أستلمها بعد ما تبهدلت خلال المدة وتعطلت لقيت شغلهم مرررررررررة تعبان والبوية سيئة وشغل أتعس ورشة مو وكالة وكمان واضح جداً جداً إن السيارة مسمكرة والزيك حاطين لها زيك يختلف لونه عن الزيك الأصلي وطالع مرقع ترقيع وعصبت وخلعت الزيك ورميته وقلت روح جيب الزيك القديم والسوداني تبع الصيانة يقول ياأخ دا مع الشمس بس يرجع لونه !!!!!!! ورجعت الزيك القديم اللي ماحاشه غير لمسة بسيطة من الحادثة والزول يقول حيتعوج عليك مع الوقت وجلست السيارة بعدها ثلاث سنوات لحتى بعتها ولاصار للزيك شيء ..نصاب ..المهم صارخت عليهم وتجمع العملاء في الصيانة ونصحتهم لا تقربوا سمكرتهم والله نصابين وفرجيتهم على الشغل في سيارتي والزول يبغى يهديني ويقول أنا ألمع لك السيارة بلاش وماأدري ايش أساوي ..لأن السيارة كمان صارت فيها خدوش كثيررررررررررررة ..لكن هي دي تجربة وخسرت فيها فلوس كثير لكن تعلمت والحمدلله ..والله إن وكالة هوندا في الدمام ( على طريق الدمام - الخبر السريع ) سيئين في السمكرة لدرجة ماتتخيلها ..من اللحظة إياها وأنا قاطع على نفسي عهد أي سيارة هوندا لي ماتدخل وكالة هوندا الدمام للسمكرة أبداً أبداً والله بياخذوا فلوس كثيرة وشغلهم مررررررررة تعبان . ندمااااااااااااااااان على تركي للورشة المعروفة بجودة سمكرتها وذهابي لوكالة هوندا بالدمام للسمكرة ..انتبهوا تدخلوا سياراتكم عندها للسمكرة وحذروا كل من يعز عليكوا ..