الموضوع: الله يجزاكم خير , يا اهل الخبره , تعالوا :)

السنتر لوك : قيمة الواحد جديد اصلي 260 ريال ،،
توني امس مركب تجاري ابو كلب زي اللي وصاني علية اكورداوي ومركبة هو من سنة وماشي زي العسل ، امس ركبت 3 بــ 150 ريال ،، صح بتشوف انواع التلفيق ،، بس الشغل 100٪

لمبات السقف : استخدم خاصية البحث ،، توة هالاسبوع نزل موضوع كيف تصلحها بنفسك .

الرجة : شيك على كراسي المكينة ،، واذا كان الامامي في مشكلة الله يعينك ،، قيمتة 630 قبل الخصم الله ياخذة خرب ام ام الميزانية !

الدريشة ،، ماعندي خبر ،، شيك على كل العدة حقتها وشوف وش المشكلة وغير المكينة للمرة الثالثة

شنطة السيارة ،،، يمدحون بخاخ الصدا وجرب حظك !!

الكهرب يبيلك خبير كهرب ،، مشكلة غريبة ،،

امبير الضغط ،، المشكلة صارت لواحد من الاعضاء ،،، يبيلك تغير حساس الهوا الامامي ( مكانة حول الشكمان ) الله يعينك قيمتة فوق 1200 ريال ،،
بس خلك ظريف زيي توني امس مغير حساس الهوا الخلفي بـ 120 ريال من التشليح مفكوك من اكورد 2007 ،،، والله يحرق ابو الوكالة 1200 ريال على سلك مشبوك في الشكمان !!!

دامك في الرياض ،، ابوصيك على ورشة في ام الحمام ،، والله ان تصحى في الليل تدعيلي ،، ورشة موظفينها كانو قبل سنين طويلة عند عبدالله هاشم ،، ثم صارت طفرة عندة وسرح كل العمال ،، واخذهم واحد لهالورشة ،، ناس متخصصة ميكانيكا وناس متخصصة كهرب ماتلقا عندهم الا هوندات فقط ! وواحد متخصص فرامل وهوبات وغير كذا شغل يدهم رخيص !!
بكم يصلحون الورش العادية او المتخصصة طرمبة الدركسون ؟؟؟ 300 ريال اقل شي ،،، صلحتها عندهم بـ 50 ريال خلال 30 دقيقة وشغلهم 100٪

موقع الورشة : صناعية ام الحمام رقمها 20 ،، بالضبط خلن اوصف لك :

انت جاي في خريص --- ياخي وصفها غبي !!

وصف اخر :
انت في التحلية ،، انزل كنت تبي اول التحلية ( تركي بن عبد العزيز الاول ) يعني ،، اقطع العليا والملك فهد والتخصصي وفي النهاية بتوصل تركي بن عبد العزيز الاول حرف T اطلع يمين ،، ورح سييييييدة مدري كم اشارة بتعدي ،، بس بتلاحظ مبنى غريب على يمينك يقولون انة حق المباحث ويقولون انة حق الاستخبارات ويقولون ان فية مفاعل نووي ويقولون ويقولون ويقولون وضيع السالفة ،، المهم ان جا المبنى على يمينك ناظر يسار ،، بتلاقي ورش كثيرة ومحلات تأجير سيارات ،، في هذة اللحظة انت بتكون عند اشارة ديور وخلك في السريع ،، اول لفة خدمة خلها ،، ثاني لفة خدمة خش معها ،،، بتحصل الورشة رقم 20 قدامك ،،، ابد ،، خش في عينهم على طول ،، واذا تبيني اخاويك عشان اعرفك عليهم ويخصمون لك شي ،، خبرني ،، #

* الوكالة فيها تنقيط ببلاش ،، محلات العليان عندهم اقلام بوية بنفس لون السيارة ،،
* سؤالك جا متأخر !!

اي خدمت ؟؟؟
# تذكرت واحد اسمة:p king :p بدال مايحط الوصف يقعد يسولف ويقول انت من وين عشان يعلمك الورشة ،، طيب خل العالم تستفيد وحط الوشة لو انك بالصومال ،، يمكن يجي واحد من الصومال بعد ويستفيد :p

المشاركة الأصلية كتبت بواسطة كوكو كورد

اي خدمت ؟؟؟

# تذكرت واحد اسمة:p king :p بدال مايحط الوصف يقعد يسولف ويقول انت من وين عشان يعلمك الورشة ،، طيب خل العالم تستفيد وحط الوشة لو انك بالصومال ،، يمكن يجي واحد من الصومال بعد ويستفيد :p

:d

اظاهر أني حطيت الوصف

بعد العناء الطويل :p