الله يعطيك الف عافيه اخي بلال
والله ماقصرت بيض الله وجهك
شرح مفصل ورائع عن العيوب الشائعه لدى هوندا
شكرا
امس جلست اتصفح قسم الصيانة من اخر صفحة الى اول صفحة وحتى في موضوع علقت عليه قديييييييم وزعل مني المباشر :d
لاحظت مشاكل الشباب بالنسبة للاكوردات وتنحصر في الاتي
1- تعطل القير في موديلات 2003 و2004
2- الرجفة عند التغيير الى D او الى R
3-اهتراء في فحمات الفرامل وصوت الصرير وانتهاءها
4-صوت في الديكور
5-تعليق النور العالي
طيب نمسك كل مشكلة لوحدها
1- مشاكل القير في عام 2003 - 2004
بالنسبة للقير هذه باعتراف هوندا وجي دي باور انه كان فيه مشاكل في اول الموديلات من هوندا اكورد بمحرك K وتم تعديلها في الدفعة الثانية من موديلات 2004 والمشكلة هذه اللي كانت تحرج الناس والوكالة بانها تتعطل وتروح ويقولون لك يبغالها توضيب بالنسبة للموديلات اللاحقة اختفت المشكلة هذه وكل مشاكل القير
2-الرجفة عند وضع الغيار D او R
هذه سالت فيها ناس في هوندا الرياض وهوندا اليابان بالايميل وقالوا ان القير زادت حجم الطنجرة فيه من عام 2003 وفوق انشين اكثر من الموديل السابق وايضا زادت حدة الريش في الطنجرة وهذا اللي خلا عند هوندا اكورد الطنجرة الرياضية لان الطنجرة الرياضية هذه ميزتها وهي تعطيك نفس احساس القير العادي لكن مع عدم الراحة قليلا في وضع الوقوف طيب وبما ان الريش زادت حدتها وميلانها الامر اللي خلا ضغط الزيت عالي جدا حتى لو تعشق وتترك الفرامل تلقى السيارة تسحب سحب مو طبيعي بدون بنزين طيب هي من الوكالة ترجف بس مع الوقت تزيد بس ايش السبب ؟ السبب هو اللي ذكره اخوي المباشر اللي هو منظم البخاخ او الثروتل مهما كان اسمه حنا كميكانيكيين نسميه منظم البخاخ وفي هوندا اكورد او سيفيك او سي ار في او اوديسي وكل سيارات هوندا ما عدا سيتي تلقى عندها نفس السالفة يعني كل سنة لازم تنظف منظم البخاخ لاجل تنحل المسألة وهي ما هي مشكلة.
3-اهتراء الفرامل او صوت الصرير او اهتراء الهوبات
يا اخوان اخوياي كثير اشتروا اكورد ابتداءا من موديل 2003 الى 2009 وكل اللي يقود بطريقة رياضية تضيع فحماته وتضيع هوباته واللي يسوق بطريقة عادية تجلس الفحمات مابين سنة ونصف الى سنتين بدون خرط هوبات وانا كنت امتلك كامري وكنت كل ستة شهور او كل ثمان شهور اغير فحماتها وانا صحيح احيانا اقود بطريقة رياضية بس مو دائم وكانت تهتريء لعلمكم هوبات كامري الواحد 800 ريال وهوبات هوندا اكورد الواحد 270 ريال يعني فرق ويا بلاش بس بالنسبة للفحمات لا يزعل الواحد لما يمشي 200 ويبيها توقف خلال ثلاث ثواني لاجل يدخل مخرج يعني الهوندا ماشاء الله ما بعت الكامري واشتريت هوندا الا لانها مرضية من ناحية الاستهلاك وقلة الاعطال باذن الله
4-صوت في الديكورات
وهذه الاصوات سمعتها في الاوريون والكامري بشكل زاااااااااائد طبعا الكامري من 2007 وفوق القديمة اللي كانت عندي موديل 2004 ما كان فيها اصوات الا قليل بس عند الباب
بالنسبة للاكورد ما انكر فيه اصوات في الديكور تجي وتختفي عند الباب والديكور الامامي وديكور القير وهذا شي موجود من عام 2003 الى الان 2009 تدرون ليش ؟
لانه مافيه قسم في هوندا ولا اي سيارة يابانية او امريكية مثل ما هو موجود في السيارات الالمانية
القسم هذا مختص بس بسماع الاصوات وتتبعها بفك الديكورات حبة حبة مثل ما هو موجود في الاودي على سبيل المثال
يروح على ارض غير مستوية ومتعرجة تعرج كامل ويكون فيه ناس متخصصين يسمعون الاصوات في الداخل ويفككون الديكور الى ان يوصلون للقطعة اللي تطلع الصوت وبعده تتغير وحتى الصندوق يكون فيه واحد بس يسمع الاصوات
وايضا ناس ميكانيك يسمعون الاصوات اللي تصدرها المساعدات وايضا الاطارات وبناء عليه اصلا تحدد ايش هي الاطارات المناسبة للسيارة ماهو اختيار بشكل عشوائي وللاسف ولا شركة يابانية ولا كورية ولا امريكية عندها القسم هذا لانهم يعتبرونه قسم مكلف بلا فائدة
يعني ابلعها واسكت واصصص ولا كلمه لا اسمع احد يتكلم ويزعل يقول ديكوراتي تطلع اصوات جيب نص مليون وطلع مرسيدس واذا طلع صوت تعال حاسبني انا
5- تعليق النور العالي
معليش يجيك واحد يلعب بالزينون وفوق كذا يجيك الخط من ورى ويلحم فيك ويكبس ويطفي ويكبس ويطفي ويسوي الحركة هذه 1233144 مرة في الثانية الواحدة وما تبين الكتاوت تعلق ؟؟؟
بسيطة روح لعلبة الفيوزات واللي فيه تجمع الكتاوتات وادخل ومعك محرم ( مفك) وفكه وبدله بواحد ثاني وتضبط معك ان شاء الله اما اذا ما ضبطت اشتري عصا النور ب 230 ريال اصلي و 150 تجاري وبدله وتبديله سهل جدا وغير كذا ما فيه الا اسلاك فقط والاسلاك ما تتعطل باذن الله
اجمالا هوندا رائعة وهذا اللي خلاني ابيع الكامري واشتري هوندا اكورد وقصتي فيها اني كنت امتلك سيفيك وكانت الحرارة ترتفع وسويت كل الحلول ولا نفع معها اي شي وطول سنة كاملة وهي ترتفع حرارتها وحتى الوكالة ما قدروا يحلون المشكلة ومع ذلك وسنة كامله من اشتريتها مستعملة ولا مرة شنبرت وبوشت ولا مرة انفجر راس المكينة وكانت الحرارة الطبيعية هي H او بعد النصف بكثير طول سنة كاملة ومع ذلك ما شاء الله ولا تاثرت الشنابر ولا تاثر راس المكينة اللي المفروض ينفجر وفوق كذا عجبني القير الاوتو حق الهوندا وحسيت اني اسوق سيارة بقير عادي مع اني ما كنت احب القير الاوتو ظنا مني انه يهدر كل طاقة المحرك لكن مع تجربة الهوندا سيفيك واللي ادخلتني للاكورد بصراحة اعجبت بقوته ونسبة توصيله لقوة الاحصنة في المحرك فمثلا قوة محرك هوندا اكورد 4 سلندر هي 187 حصان وصافي القوة على العجلات هي 177 حصان الى 174 حصان وهذا يعتبر ممتاز جدا وهذه النسبة مقاربة للقير العادي
واسف على الاطالة وشكرا
الله يعطيك الف عافيه اخي بلال
والله ماقصرت بيض الله وجهك
شرح مفصل ورائع عن العيوب الشائعه لدى هوندا
شكرا
الف الف شكر لك
الله يعطيك العافيه على التغطيه الكامله
يعطيك العافيه مجهود جبار
لعلمكم هوبات كامري الواحد 800 ريال وهوبات هوندا اكورد الواحد 270 ريال يعني فرق ويا بلاش بس
عشان يقتنعون الي يقولون التايوتا افضل وقطعها ارخص وعيب الهوندا قطع غيارها غالي بس والله الي يقول هالكلام سامعه من سنه1300م
ما شاء الله عليك ، والله يعطيك العافية على هذا الشرح المفصل والمنطقي
ما شاء الله
يعطيك ألف عافيه أخوي بلال
أنت كذا جمعت أكثر من موضوع في موضوع واحد
ما قصرت والله لا يحرمنا من معلوماتك الحلو
يعطيك العافيه اخووووي
يعطيك ألف عافيه أخوي بلال
يعطيك العافيه اخوووي بلال ..
ما قصرررت
عراسي انت ... لموت انا في الناس الفهمانه اللي تتكلم بثقه وعن دراية وخبرة وتجارب
أم الكوري عـ أم الأمريكي
يعطيك العافيه على هالتفصيل الممل والاجابات الشامله لكل شي
الصراحه انا معي اكورد2004 فل وماشالله لين الحين ماشيه وكارف والدينها وماشالله حمار كرف على ما قالو لا وبعد في جده وشوارع جده
يعني الصراحه انا على سواقتي لو معي غير الاكورد كان قعدت على الحديده من كثر ما اصلحها بس الحمد لله للحين الشي الوحيد اللي كلفني كراسي الجربوكس وكراسي المكينه وهذا شي طبيعي بعد الـ100 الف انها يبغالها تغيير غير كذا كل شي تمام التمام والمكينه ماشالله على حالها من يوم ما شريتها مافيها اي تغيير او اي خراب
يعيك العافيه وحبيت اشارككم بتجربتي مع عشقي هوندا اكورد
مقطعها الرخص هوندا هيييييييين معي هوندا وكان معي كامري الكامري بالبقاله تحصل قطعها وببلاش وتعيش معك اقل شي 3 سنوات مافي مقارنه بينهم الا بالهوبات سعرهم سوا الهوندا افضل من الكامري بثقلها وسواقتها الكامري 2003 وانت طالع الى 2006 افضل من الهوندا مليون مره من ناحية سواقه والررساوه كنك راكب كابرس صابونه اما الجديد غبي اما قطع خل عنك ماتقارن بتايوتا
وللاسف ولا شركة يابانية ولا كورية ولا امريكية عندها القسم هذا لانهم يعتبرونه قسم مكلف بلا فائدةومع ذلك الياباني يعيش 10 سنوات بالراحة و مايقول شيء صح ولا لا
أنا معك إن الألماني هو أفضل و أفخم شيء بالسيارات جودة و صبر لكن تقارن الكوري و الأمريكي بالياباني لا
.
.
.
.
.
.
.
ما قارنت الامريكي والكوري في الياباني
ومو كل الياباني زين
بس هوندا غير تماما من كل النواحي وحتى التقنية
لعلمك اخوي
تقنية vtec كانت اختراع هوندا في عام 1990 وكان اختراع خيالي جدا وبعد الله التقنية هذه خلت هوندا تحتل مراكز اولى في سباقات فورملا 1 ومرسيدس وبي ام دبليو وفورد سووا شراكة لاجل الاختراع هذا
وهوندا ايضا كانت اول سيارة تدخل الولايات المتحدة باول محرك في العالم بمواصفات الولايات الامريكية لانبعاث الغازات وايضا فورد ومرسيدس وجنرال موتورز سووا تعاون معها للشراكة في التقنية هذه
واول شركة في العالم تصنع سيارة كفراتها الاربع تلف مع الدركسون
واهم من هذا كله
شركة ماكلارين فازت في بطولة فورملا 1 بمحرك مصنوع ومهندس بالكامل من شركة هوندا
صدقني هوندا تاريخ طويل في الابداع والقوة والتقنية
الان تحولت الى الهونداوية بعد ما كنت تويوتيا
شكراااااااااااااااان
افدتنا جدا جدا جدا
يعطيك العافية على الشرح بس عندي تعليق
ممكن اعرف شلون راسلتهم بالايميل لاني فريت الويب سايت مالهم عشرميت الف مره ولا لقيت الايميل الللي تقول عنه وياريت ترسلي الايميل بالخاص-الرجفة عند وضع الغيار d او r
هذه سالت فيها ناس في هوندا الرياض وهوندا اليابان بالايميل
يعطيك العافيه على هالتفصيل والاجابات الشامله لكل شي
يعطيك العافية أبدعت
:::::::::::::::::
يعطيك العافية على التغطية أخوي بلال
كفيت وفيت
اخوي بلال رجاءاً لا ترفع بالاكورد لانها في النهاية مجرد تنك ومثلها مثل اي سيارة ما تسلم من العيوب
مع احترامي لك ما ادري كم لك تملك سيارتك بس خلني اقولك عن تجربتي للاكورد اللي دامت 4 او 5 سنوات واحكم بنفسك . في البداية كان معي 2004 ستة سلندر شاريها جديدة من الوكالة ، جلست معي 3 سنوات ونص ومشيت عليها حوالي 200 الف كيلو حتى قدر الله علي بحادث وانتهت في تشليح . واللحين معي 2006 ستة سلندر امريكية شريتها مستخدمة ماشية 77 الف كيلو ، لها معي اكثر من سنة واللحين ماشي عليها 177 الف كيلو . الصراحة من اول يوم امتلكت الاكورد حبيتها وصرت اشوف كل السيارات اللي من فئتها دون مستواها . حتى من حبي لها دايم ادلعها ولا احط فيها الا الاصلي لاني كنت ماشي على المثل اللي يقول (دلع سيارتك .. تدلعك) بس للاسف ما لقيت من ورا الدلع هذا الا التبن ومن كثر ما تطلب صرت اصرف عليها اغلب راتبي . وليتها في النهاية توقف عند حد لااااااا كل فترة تطلع بمشكلة وشي جديد !!
السيارة بكل اختصار ما شاء الله عليها تصبر وتتحمل المشاوير والمكده اكثر من غيرها لكن عيوبها المصنعية ما تنتهي . ومشكلة شركات السيارات الله يحرقها انها ما تعلن وتعترف الا بالعيوب المصنعية اللي ممكن تأثر على سلامة الركاب وغير كذا الله يعين المالك على الخساير اللي بتجيه !!
خلال فترة استخدامي للاكورد هذي المشاكل اللي مرت علي وعلى اخوياي وبسبب تكرارها اعتقد مالنا الا نسميها عيوب مصنعية :
- اولاً اعطال القيور وبالذات في الستة سلندر
- طقة قفل الامان في القير اللي لنا سبع سنين وهم يقولون طبيعية
- طرمبة الدركسون اللي صارت اكثر القطع طلباً في التشاليح
- فحمات الفرامل والهوبات (حدث ولا حرج)
- لمبات السقف اللي تشتغل وتطفى بمزاجها حتى تضطر تغيرها بقاعدتها
- ووووووووووط صوت المكيف البايخ اللي سببه تهريب من الثلاجة
- علبة الفيوزات اللي مددت الشركة فترة ضمانها اعترافاً منها بوجود العيب المصنعي
- اصوات مفصلات وزنية البيبان اللي مالها حل الا التغيير
- منظم الهواء الاحظ انه حساس اكثر من اي سيارة ثانية واي نسمة غبار تأثر عليه
- البواري اول ما تتعرض للعج لازم تزكم والسبب تصميمها الغبي
- مشاكل المسجل في موديلات 2003 - 2004 - 2005 وبالذات مسجل السي دي الواحد
- اعطال السنتر لوك حق الابواب اللي تخليك تستغني عن شي اسمه ريموت
- اصوات الديكور ما بأعتبرها عيب مصنعي تختص به الاكورد لانها موجودة في كل السيارات
لاحظ اني ما جبت طاري للقطع الاستهلاكية لان عمرها يرجع لطريقة الاستخدام ما عدا فحمات الفرامل طبعاً لانها حاله استثنائية . الناس يختلفون فيه منهم من يستخدم السيارة استخدامها العادي ويهتم بصيانتها وتلقاه يشتكي . وفيه من يكرف السيارة ولا يغير فيها مسمار واحد واذا سألته عنها قال لك ما شاء الله لها معي 20 سنة وعمرها ما تطلب والمشكلة اذا ركبت سيارته تلقاها خرده ما يمشيها الا البنزين . وفيه من يمدح سيارته ويقول لك والله قطعها الاستهلاكية عمرها طويل واذا جيت للحقيقة تلقاه ما قد مسك بها خط ، اذا تهور واسرع مشى 140 ، وفي السنة ما يتعدا ممشاه 10 آلاف كيلو .
فوق هذا كله مازلت اقدر الاكورد وما عندي اي نيه ابيعها لانها مثل ما قلت سيارة تنحب . ويمكن السبب يرجع لثباتها اللي غطى على كل منافساتها ، تماسكها وجودة عضلاتها ، قوة مكينتها واخص بكلامي هذا الستة سلندر لاني بعد ما جربتها صرت اشوف الاربعة سلندر (دباب) ، واخيراً فخامتها الداخلية وشكلها الخارجي الجذاب اللي يهون علي مشاكلها رغم اني قرفان منها اغلب الاوقات ..
التعديل الأخير تم بواسطة B Unique ; 11-08-2009 الساعة 08:29 AM
.
.
.
مواقع النشر (المفضلة)