حبيبي خذها قاعدة مو في شراء السيارة وبس .. في شراء أي شي في هالدنيا
اقعد كذا مع نفسك وفكر لمدة ساعة او نص ساعة بس .. انا ايش اللي ابغاه بالضبط في هذا الشي اللي بشتريه؟؟
صدقني انها قعدة تسوى الف مشورة

اذا انت انسان شبابي رياضي حق دعسة وقومة في سيارات تصلح لك
واذا انت انسان حق ليدات واصطبات وزنون ومساج كراسي برضو في سيارات تصلح لك
اذا كنت حق بران وتطعيس وكل يومين ماخذ اهلك وعفشك وطالعين تخيمون برضو في سيارات تصلح لك

بعطيك مثال عن نفسي ..
أنا رغم اني عاشق أكورد من سنة 93 >> الله يذكر ذيك الايام واكورد ذيك الايام بالخير السيارة كلها مقرطسة ودلع :d
اقول لك رغم ذلك وكل سياراتي اللي شريتها في حياتي اكورد .. بس برضو احترت حيرة غير طبيعية قبل ستة شهور وقعدت اربع شهور اقلب النت واشوف المواصفات والمميزات والعيوب لان صراحة سيارات هالزمن تلعب في مخ الواحد لعب كل سيارة تقول الزين عندي!
اخر شي قعدت مع نفسي قعدة صفاوة وقلت يا ولد وش تبي انت من السيارة.؟ طلع كل اللي ابيه سيارة أول شي متينة وقوية ثاني شي واسعة داخليا وتصميمها جميل .. ثالث شي وهو اهم شي عندي التماسك .. ابي سيارة احس اني وانا اسوقها انها كتلة وحدة فاهم علي؟ يعني مو احس اني بيدي الطارة بس كل كفر بجهة ومتفكفكة وكل شوي يبي لها تربيط
وعلى قد ميزانيتي شفت ان ما لي خيار الا معشوقتي الابدية الاكورد .. فليش أقعد اغير عن سيارة عرفتها وسقتها سنين وعارف جودتها ورساوتها وتماسكها واعتماديتها لسيارة ثانية بس عشان في القومة تعطيك عمودين وتوصل الـ 100 في اربع ثواني وفيها اصطبات ليد وتشغيل بصمة وباقي الخرابيط هذي (طبعا هي خرابيط بالنسبة لي لانها من اتفه الاشياء عندي) .. بس مثل ما قلت لك ممكن تكون من اهم الاشياء عند واحد غيري تفكيره وستايله غير عني وتهمه جدا هالاشياء
عشان كذا اقول لك اقعد مع نفسك وفكر واطرح خياراتك وتأن في الاختيار .. وصدقني راح توصل للقرار المناسب بنفسك وبترتاح مع اي سيارة بتشتريها