وعليكم السلام ورحمة الله وبركاته

إذا أنت راعي مقاومات أو كل شوي تهدي ثم تدعس بعنف وبقوه وتهدي مره ثانيه ثم تدعس بعنف وبقوه مره ثانيه
طبيعي تزيد صرفية البنزين بأي سياره
شف أنا سواقتي سيارتي نفس سيارتك لكن قير عادي ؛ وسواقتي متوسطه بسبب ساهر عشان ما تجيني مخالفات ( أول كنت راعي سرعه )

وهذي صرفية البنزين في السواقه المتوسطه ولا أتعدى سرعة 120 .. ماشي 434 كيلو و تانكي البنزين باقي فيه كثير

قبل نص سنه أو سنه تقريباً .. غيرت البواجي وفلتر البنزين وفلتر الهواء ونظف البخاخات

ما شاء الله تبارك الله ؛ لكن لو أدعس لها كثيره وبقوه .. طبيعي تزيد صرفية البنزين



البنزين اللي أستخدمه 95 فل بـ 32 أو 33 ريال ( إذا كان التانكي شبه فاضي و مولعه لمبه البنزين )

وزيت المكينه موبيل سوبر XHP لزوجته 15W40 < ترى الزيت هذا رخيص وعادي لا تحسبه موبيل 1 الغالي :d



سعر العلبه تقريبا بـ 14 ريال عند البناشر
و زيت القير العادي API GL-4 موبيل 80W90

وجنوطي 16 حقت فل كامل و كفراتي عرضها 215\60\R16 أعرض من مقاس الشد بلد 205\60\R16 .. وضغط الهواء مخليه على 28 تقريبا يتراوح بين 28 إلى 30 كحد أقصى .. لأن عندنا بالقصيم مطبات وحفر كثيره جدا


نصائحي لك :

1) ضغط هواء الكفرات له علاقه بالصرفيه .. شيك على هواء الكفرات وخلها على 30 .. أو 28 اذا فيه مطبات وحفر كثيره

2) نظّف أو غيّر فلتر الهواء

3) اشتر محلول تنظيف البخاخات أمريكي أصلي من ساكو أو حق ميتسوبيشي < لكن ترى ما جربت حق ميتسوبيشي وتأكد أن صناعته يابانيه

4) أصبر إلى ان تولع لمبة البنزين " يعني أول ما تولع لمبة البنزين " رح لمحطة بنزين وطف السياره .. وصب كل علبة محلول أو سائل تنظيف البخاخات في التانكي .. ثم خل عامل المحطه يعبي بنزين فل 95 ( عادي خله يعبي بأسرع شيء عشان يختلط بشكل أفضل )

لأنك اذا صبيت محلول أو سائل التنظيف والبنزين على الربع أو أقل .. راح يختلط بشكل ممتاز مع البنزين < وهذا الكلام المكتوب على علبة منظف البخاخات بالأنجليزي

5) أستخدم السياره زي ما تحب ؛ و اذا وصل البنزين على الربع عب بنزين 95

6) كذا تكون بقايا منظف البخاخات قليله جدا .. لأنها يمكن تؤثر على البواجي الجديده وفلتر البنزين الجديد

7) غيّر فلتر البنزين وغيّر البواجي

8) أنصحك تغير زيت المكينه لزيت أخف من 20W50 مثل الزيت اللي أنا أستخدمه أو زيت الترا سفن 15W40 + سيفون أصلي وكاله
لأن منظف البخاخات ممكن يترك أثر على زيت المكينه الحالي

وأستمتع أداء أفضل وعزم أقوى ؛ وصرفيه أقل



* لا تصب أكثر من علبه واحده من محلول تنظيف البخاخات ( علبه واحده أكثر من كافيه ) لأن أي شيء اذا زاد عن حده أنقلب ضده .

* لا تبالغ بكثرة التنظيف .. يعني نظّف البخاخات كل 40 أو 60 أو 80 ألف كيلو تقريبا .. يعني لا تقعد تنظف البخاخات كل 10 أو 20 ألف :d لأن زي ما قلت لك الشيء اذا زاد عن حده أنقلب ضده .

* إذا زادت السرعه والـ RPM طبيعي تزيد صرفية البنزين .. والعكس صحيح

* بالخطوط الصرفيه تكون أقل من داخل المدن .. لأن دعستك تكون ثابته تقريبا عكس داخل المدن والزحام كل شوي تهدي وتسرع

* كل ما زادت لزوجة الزيت تزيد صرفية البنزين شوي .. ولا تستخدم زيت 20W50 لأنه ثقيل جدا على المكائن الحديثه

* اذا زاد عرض وحجم الكفرات والجنوط = تزيد صرفية البنزين شوي

* المكيف ضروري بالصيف .. عشان كذا صرفيه البنزين بالصيف تكون أعلى من الشتاء
* حتى العزم والقوه .. الهواء اذا كان أبرد يكون أفضل للعزم والقوه والخ...


الكلام اللي قلته لك ينطبق على كل السيارات وليست الأكورد فقط


# متى آخر مره غيرت زيت القير الأوتوماتيك و الفلتر الخارجي حق زيت القير ؟

# وش نوع ولزوجة زيت المكينه اللي تستخدمه + وش نوع البنزين اللي تستخدمه ؟

# كم ماشيه سيارتك ؟