السلام عليكم و رحمة الله وبركاته

تقبل الله طاعاتكم , انا سبق وكتبت عن مشكلة بقير السياره قبل سنه تقريباً و ياريت ان المشكله السابقه ظلت على ماهي عليه :d

اللي حاب يدخل بزبدة الموضوع يقرأ الموضوع من اللون الأحمر :d

الواحد ما يحس بقيمة الشيء إلا لما يفقده أو يطيح بشي أعظم منه , الحمدلله على كل حال

انا شريت سياره اكورد 2007 سته سلندر قبل سنه و اكتشفت ان راعيها مبدل لها زيت قير غير عن الوكاله , وحسب كلامي مع اكثر من صاحب ورشه قال ان قير الاكورد حساس ولا تفكر تحط له زيت غير عن زيت الوكاله ,

المهم انا فرحان بالسياره و قلت الا اعتني فيها :( بدلت زيت المكينه و غيرت كذا قطعه استهلاكيه و بدت فرحتي بالسياره تنسرق بعد ما عرفت بسالفة زيت القير :(

بعد مشاورات و تردد قررت إني اشفط الزيت الموجود خاصه إنه ما كان وصخ و أبدله بزيت الوكاله الأصلي , كان في خيار إني أرفع القير ويعملوا له تنظيف كامل من الزيت القديم ويركبوا زيت الوكاله وهذي الشغله كانت مكلفه و السياره توي ماخذها و ما طاوعني قلبي اسويها , يمكن لو سويتها كان خيره بس مانقول الا هذي كتبة الله

الزبده بعد ما شفطت الزيت و ركبت زيت الوكاله مشيت عليه مسافه معقوله بس أقل من المسافه الموصاه 30-40 الف و من باب الحرص غيرت الزيت مره ثانية بزيت وكاله و مشت السياره عليها 11 ألف تقريباً و فجأة شفت القير ينتع بالقوه و الريس يرتفع و السياره مثل اللي تنزل بلأرض ترجع لورا وتنط قدام

رحت ورشة شيك على زيت القير ولقاه مره منتهي و اسوود مع إن مثل ما ذكرت ما مشت السياره عليه الا 11 ألف تقريباً وانا مو راعي قومات او شي , صاحب الورشه خله الزيت ينزل على راحته و ركب زيت وكاله اصلي و قال ان شاء الله امورك تضبط والا مالك الا توظيب ؟

طيب يا ابن الحلال شيك على شي ثاني على طول تروح لآخر الحلول , قال معروف هذا اذا رجعت المشكله توظيب

طبعاً انا ما قتنعت قلت اذا فعلاً يحتاج لها توظيب ما راح استعجل و راح اجرب كذا خطوه يمكن الله يفرجها ولا اضطر للتوظيب

المهم اول ما بدل الزيت السياره رجعت زي الفل ولا كأن كان فيها أي شي , بعدها بيوم ردت المشكله و وديتها لورشه ثانيه و قال توظيب بس عندي لك طريقه يمكن تنفع

و هي نخلي الزيت ينزل على راحته و نضرب لك هوا بالفلاتر عشان يتنظف اذا في رواسب بالقير و جيب لي درزن علب زيت بس مو وكاله المهم نوعيه جيده ونعبي لك الزيت 3 علب و نحرك السياره شوي و نمشي عليها و نرد ننزل هالعلب ونعبي 3 و خذها كذا يوم عندك و ارجع ننزل الزيت ونركب لك العلب الباقي و هكذا لين ما يصفى القير من الرواسب لان يقول فيه اوساخ واجد

المهم اخذت السياره منه و نفس الحاله السياره ميه بالميه سليمه و القير حلو و ارص السياره وتعشق عدل و بعدها بكذا مشوار بنفس اليوم رجعت المشكله وهي ثقل بالتعشيق و السياره مثل اللي ترجع لورا وتنط و احياناً يطلع صوت مع التبديله وكنه شخص ثاني يدوس بنزين عنك و لما احطه على R يعلق شوي ثواني و بعدين يستجيب ويرجع لورا , بس السياره تمشي و تروح وتجي عادي اللهم التبديلات صعبه

فحبيت اطرح الموضوع لتفادي الوقوع بمثل هذه المشكله اذا صادفت ولقيت زيت القير مو اصلي تشاور كثير وشوف الخيار الانسب

و بنفس الوقت يا شباب اللي واجه مشكله شبيهة للمشكله هذي او عنده أي رأي او اقتراح او يعرف سبب مثل هالمشكله يتفضل و يشور علي و ياريت يكون عن واقع خبره او تجربه لان ما ودي اجرب طرق كثيره و اصرف فلوس على الفاضي ومن ثم ارجع للتوظيب و تزيد الخساير

و نصيييييحه اذا نويت تشتري هوندا مستخدمه شيك على زيت القير اذا مو وكاله او القير فيه أي علامه غير طبيعيه اقول لك ريح راسك والسيارات كثيره و ان شاء الله تلاقي لك احسن من هالسياره ولا توهق عمرك وتحط فلوسك في سياره تتحمل فيها اغلاط و سوء استخدام غيرك