المشاركة الأصلية كتبت بواسطة JUVENTUS
السلام عليكم..
حبيبي معشي طيور النورس..
أبي رأيك بالأعضاء التالين..
راح اتكلم باختصار
أنا/
واحد عن عشره ما شاء الله عليك نشيط و بس لاني ما اعرفك حيل يعني و اخاف اقول شي مو فيك
أبو عزوز/
احسن صديق ... شخص عقلاني .. يستاهل مليون كلمة شكر
الوافي/
اسم على مسمى
فريدوهـ/
وحش المنتدى ... يستاهل بعد مليون <<<< مليون كلمة شكر لا تروح بعيد
مطنش/
احسه شخص مزاجي بس ليش ما ادري
ميو/
مسكين تغشمرت معاه و لزقت فيه الكلمه بس شنو يموت بخالد عبدالرحمن ... ارسل لي اغنيتين قبل سنه و ما سمعت منهم الا دقيقه يمكن ( زليت ) ( بلا ميعاد ) <<< ما اسمع عربي
ن ك د/
ما اعرفه شخصيا .. بس ماادري شقول عنه
أيش تحب البحر أو البر ؟ وليه ؟
احب البحر ... طول عمري بالبحر .. و كل عايلتي مالهم الا البحر ........ بارد بالصيف و مثلج بالشتا :d ... احب اطلع البحر مع عمامي و عيال عمامي ... سواء للسباحه .. زيارة جزيرة معينه ... حداق ( صيد )
وين ساكن بالكويت ؟ وأيش رأيك بقيادة المرأه للسيارهـ ؟
ساكن بالقرين ( 35 كيلو عن مركز مدينة الكويت ) ..... اييدها و ما اييدها ...... المراه لما تسوق توفر عليك انك تجيب سائق و توفر عليك مشاوير السوق و غيره ... بس هاذي الايام البنات بدأو يتجهون للجيبات .. علشان اذا ما لقت موقف تطق الرصيف ... و تدعم خلق الله 
<<< توه صادمته وحده
النساء يقودون السيارات بالكويت , هل هذا القرار من الحكومه أو كان بطلب وإلحاح الشعب ؟
لا من الحكومه و لا من الشعب ..... اول ما طلعو السيارات و الحريم يسوقون و محد قالهم لأ بس ما كانو بكثره لين جات السيارات الاوتو .... و عن قريب بتشوفون الحريم بالدوريات ... لاني اعرف واحد اختاروه بلجنة اختيار اللبس النسائي لوزارة الداخليه و بالتحديد بالمرور
ماهي مساوئ قيادة المرأه للسياره ؟ وماهي الإيجابيات ؟
افف المساوئ عد و خربط و الايجابيات بعد عد و خربط
المساوئ :
1- البنات يسوقون سيارات بطريقه العن من الشباب .. كيف ؟ انا اعطيك مثال بسيط
انا اقوم الصبح و اروح لدوامي بالجامعه ... صدفة بنت الجيران رايحه الجامعه بنفس الوقت ... طريقنا واحد ... اهي عندها التيما اربعه سلندر .... انا امشي 220 و اشوفها صافه وراي و تكبس ... شنو تعليقك ؟ ( البنات مستهترين اكثر من الشباب )
2 تم تغيير اسماء بعض الشوارع عند الشباب ... مثل شارع الحب <<< الاسم الرسمي الدائري الثاني ... ليه ؟ انا اقولك ... اذا انت فاضي و تبي تشوف بنات .. ما عليك الا تدق سيارتك سلف و تروح شارع الحب
و بتشوف البلاوي والله ... طبعا البنات بسياراتهم و مشاخط و الشباب و راهم ... ياما صارت حوادث و السبب ان الولد لاحق له بنت و البنت تنثول و تخش باقرب رصيف و لا باقرب باص
3- سامع عن بنات يفحطون ؟ ..... صارت بالكويت و كل يوم تصيرو كان هذا الشي غريب بس اللحين لأ ... لو تشوف اشكال البنات و هم يسوقون المواستنق و الكماروات تموتون من الضحك
4- البنت تركب السياره و تدق تلفون قبل لا تدق سلف و ما تصك التلفون الا بعد ما توصل المكان اللي بتروح له .. و النتيجه .. تلف عليك بالشارع و تقطع اشارات و حوادث و السبب انها ما تعرف تصكر فمها و تنتبه للشارع
5- لازم تشتري لها سياره و كشخه بعد
6- اذا صار شي بالسياره انت اللي راح تبتلش لانك انت اللي بتدور فيها من ورشه لورشه
الايجابيات :
1- ما تحتاج سواق .... ما تحتاج انك توديها و تجيبها
2- تروح دوامها بدون لا تشيل همها
بس و هاي كل الايجايبات اللي ببالي اللحين
هل ترا أن القيادة للمرأهـ عندنا بالسعوديه ستنجح ؟ وهل نجحت بالكويت ؟
نجحت بالكويت ... ماراح تنجح بالسعوديه ....اسمح لي بس كل ما اشوف سعودي بالكويت اشوفه يطرد ورا بنات و خصوصا اذا كان اعزب ... شلون عيل لو تصير البنت بروحها بالسياره عندكم بالسعوديه .. الله اعلم
لو قالولك إطلب أي طلب وراح يتنفذ , أيش هو طلبك ؟
انهم يسفرون كل الوافدين اللي بالكويت علشان نعرف نمشي بالشوارع بدون زحمه
اخر تعداد للكويت كان في 2006 و يقول
التعداد الكلي للسكان : 3 ميلون و 800 الف 
الكويتيون منهم : 1 مليون و 100 الف:(
الوافدون من غير الدول الخليجيه : 2 مليون و 650 الف
اخر شارع رئيسي تم انشأه بالكويت سنه 84 و وتم انشأه لخدمه الشاحنات المتجه الى المصانع
شوارع الكويت الرئيسيه بنيت باواخر السبيعات لتستحمل 2مليون و 500 الف :o
ماهو رأيك في العراق حكومه وشعب قبل الحرب وبعد الحرب ؟ ومارأيك بالحرب هل أفادت أم أضرت ؟
ماهي أفضل دوله بالعالم ولماذا ؟
سويسرا .... بس لو يشيلون الكويت و يخلونها جمبها
أي فريق تشجع من الأنديه العالميه ؟
البرازيل كمنتخب --- برشلونه بالدوري الاسباني و الاوربي ---- العربي الكويتي بالدوري الكويتي
كم أعلى سرعة اتصال عندكم بالكويت ؟ ومارأيك فيها ؟
8 ميقا و ما يمدحونها كثير .... بس احسن شركة بالكويت توفر لك 2 ميقا بتنزيل 8 ميقا و كل شي بحسابه ( احسن شركة بالكويت اسمها فاست تلكو ) بس اهم اغلى شركه
مارأيك بالمنتدى عامة ؟
منتدى رائع و اعضائه اروع بس ناقصه قسمين ثلاثه و يصير كامل ... بس انا احتفظ بفكرتي لين اشوف ان الاعضاء يصيرون اكثر بعد
__________________________________________________ ______
أتمنى إني ماطولت عليك
وكل عام ياقلبي وأنت بأتم صحه وعافيه
ولاتكثر من الكبسه عشان ماتسمن!
لو ذقتها من ايد الوالده ودك ما تصكر حلجك و الله 
رد مع اقتباس
مواقع النشر (المفضلة)