الجزء الثاني

بعد ماانتفخت اوداجي ,, من الفعل المشين الي سواه ابو الشباب .. قررت اني اروح بنفسي للجامعه بعد ما أستأذن يوم من الايام .. لكن متى يجي الموظف الثاني عشان يغطي محلي واطلع انا ..

انتظرت اسبوع ونص تقريبا وجاء الموظف وكلمت المدير وقلت له ترى بستأذن ولابخليك تجيب لي توصيه
قال لا ياحبيبي رح الله يوفقك ترى العمل بدونك حلو ,,
عاد حموري خددت .. مدري خدودي حمرت من الخجل الذي انتابني ,,
جهزت عفشي واعلنت الرحيل وقلت :

مرحبا بك يالتعب بأرض الكفاح .. مرحبا والجَلَد فيني زهاب
ودعت اهلي .. واعلنت حالة الاستنفار القصوى .. وامريكا تهددني اذا ماوقفت عملية تخصيب التوصيه راح تفرض علي أقسى العقوبات .. وأنا أجمع اخواني الصغار واطلع على الدولاب وألقي خطبتي العصماء وأعلن المضي قدما في الحصول على التوصية المنتظره .. اللهم عجل بها :d
نمت بدري ذاك اليوم وصحيت بدري ولبست وتحمست وشغلت الهنادي ( الحين عرفتوا ليش كتبت الموضوع ؟ ) وتوكلت على الله

بديت يومي على صراف البنك الأهلي .. مريته عندي عمليتين أبي اسويها .. دخلت البطاقه .. رفض العمليه الأولى .. الغيت العمليه وطلعت البطاقه من نفسها..
أنا طبعا مستانس جدا أني بروح اخذ توصيه عشان كذا بالي مو معي .. مشيت رحت بسرعه للآله الثانيه .. ونسيت البطاقه في الأولى ماسحبتها من مكان البطاقات ..

وبلعت البطاقه أم الشباب .. قلنا يالله اليوم النحس جاب الهاتريك 3-0
مو مشكله انا انسان سعيد في حياتي لأني بجيب توصيه الحين .. والفلوس اخر اهتماماتي .. أهم شي العلم

مشيت على بركة الله .. ومسكت الخط .. وأثناء ماأنا أغرد لوحدي في السياره .. تذكرت ان التوصيات ماطبعتها .. لأني كنت ناوي اول ما اصحى من النوم أطبعها .. لكن قلت يانفسي أمشيها لكي الحين .. عشاني مستانس .. باخذ توصيه من قدي ,,
وصار النحس متقدم بقوه 4 -0
وصلت المدينه المطلوبه .. قلت بمر المكتبه الي جنب الجامعه .. رحت له ..
أنا : أهلا طاهر
طاهر : هلا والله
أنا : فيه طباعه ؟
طاهر : لا .. الي يطبع ماخذ أجازه !!
عسى ماشر ماحد يعرف يطبع الا هو ؟
لميت عفشي ومشيت .. 5 – 0 .. قلنا مو مشكله الاتحاد وهو الاتحاد أكلها من الهلال ب 5 .. منو أنا عشان ازعل !!؟

قلت تدري بروح الجامعه وبطبعها هناك .. وانا اصلا عارف ان مكتبة الجامعه غبيه حتى الطباعه مافيه لكن قلت بتميلح عند أي دكتور وبعطيه الفلاش يطبع لي ..
رحت للدكاتره ..
دخلت على الأول وعطاني التصريفه الي تحبها قلوبكم .. الطابعه خربانه انتظر الدكتور فلان بيجي الساعه 11
ووقتها كانت الساعه 10:30 قلت تدري .. بروح برى الجامعه استغل الوقت أطبع واصور كم نسخه .. لأن الاخوان الاثنين الي وصيتهم في البدايه وجابوا العيد .. كلهم وصوني الحين .. فعندي زحمة اوراق واحراج اطبع من الدكتور

طلعت ادور خدمة طالب .. يمين .. يسار .. فوق .. تحت .. اكس .. مربع .. تقول كأن هالديره ماجيتها من قبل ونسيت كل شارع فيها !!
اخيرا لقيت قرطاسيه .. يوم جيت اوقف عندها .. حسيت ان السياره طاحت على جنب !!
نزلت ..

ياهلا ومسهلا .. الكفر على الجنط
وللللللااااايييييييي .. طبعا هذي زغرده من الفرحه

الجو جدا حلو .. 10:30 .. شارع عام .. مافيه بنشري قريب .. الديره مافيها تكاسي .. الثوب والشماغ والوضع كله نظيف وجديد ..

ياسلاااام .. ما احلى البنشر في هذه الاوضاع ..

فكرت .. وقدرت .. وش اسوي ؟!
أغيره بنفسي .. ؟
ولا استسلم وادبر نفسي اروح للجامعه اخلص شغلي وارجع لها بعدين ؟
طبعا .. الاوراق ماطبعتها .. لأن القرطاسيه محل الجدل .. طلع ماعندها طباعه !! يعني مصيري ارجع للدكتور وامسح الوجه بمرقه واطبع عنده لي ولأخوياي وجيراننا والجامعه واذا فيه أحد منكم يبي يراسلني على الخاص
استسلمت وقلت بغير الكفر بنفسي والله يعيني .. أول خطوه .. غيرت الاستايل حقي .. وفصخت الثوب والشماغ .. وسويت دعايه مجانيه على الشارع العام لملابس برومان .. لأني كنت مطلع الورقه الصغيره حقت المقاس من ورى على اساس اني كشخه واشتري من الزين ...
وافتح الشنطه واشمر عن ساعدي .. وافتح ارضية الشنطه

و .. وو .. ووو

وأبلع لساني بدل ما أبلع ريقي تقول متصافق مع عبدالله الشريده

تدرون ليش ؟

الكفر موجود ..آمنا بالله.. لكن فيه زيت باور منكب عليه من عام الفيل وصار كل شي لزج .. ووسخ ولكم الباقي !!