أحدث أفلامي .. الموت من أجل الوصيه .. Action +18

**::شكسبير::** · 08-08-2010, 12:32 AM

الموت من أجل الوصيه
Die for the commandment !!

الجزء الأول

فاتحه /
انا من وين ما أجيبك .. تجيني يالنحس بعناد
طلبتك رخي شوي .. ويكفينا ألم وسهاد

صباحكم / مسائكم خير

أما أنا فصباحي اليوم مشمش .. صباحي موشوش .. ماهو من صباحاتي.. تدرون ليش ؟ لأني أستأذنت اليوم من الدوام وتعرفوني انا انسان جاد واحب عملي وأحب أخدم بلدي عشان نصير شعب منتاااز

على كل حال .. انا فيني فضفضه .. فيني بكوه .. فيني تعب ودي اطرحه على الكيبورد .. صدقوني أسمع صوت تناهيد الماوس على حالي ..

والحين قاعد اشوف الهارديسك يطبطب على راسه

مشكلتي ياشعب الهوندا .. على فكره .. ماسألوتني ليش توني مسجل معكم وعلى طول منزل هالموضوع ..

بس اسمحوا لي مو لازم تعرفون

معليش بس هذي الحقيقه .. ويمكن فيه سبب واحد بقوله لكم وهو ان سيارتي اكورد عشان كذا حبيت افضفض وافقش عليكم

قصتي أو مشكلتي .. اني تخرجت من الجامعه ..

لكن بدت مشكله ثانيه .. هي بدأت صغيره .. ثم كبرت .. ثم كبرت .. ثم كبرت .. الين صارت حلم يراودني
صارت شغلي الشاغل .. صارت مثل ذبابه تحوم فوق راسك وانت في احسن نومه

مع انها تافهه .. لكن قلنا انها كبرت وكبرت وكبرت ..

مشكلتي اني أبغى اخذ توصيه علميه من الجامعه .. التوصيه ماهي ضروريه بصراحه حاليا لكن حرصت اني اخذها الحين عشان قبل لايتغيرون الدكاتره بعدين واتوهق لو بغيت بعثه او او او ..
.
المشكله في التوصيه .. ان جامعتي في مدينه ثانيه .. وانا مرتبط بالدوام لأن علي ضغط مو طبيعي فما اقدر استأذن حاليا

وصيت خويي .. وهذا الرجل الدب .. يومه بسنه .. يعني مثال .. قلت له انت بتروح الجامعه اجل جيب لي معك توصيات ..
قال طيب .. الرجال كان بيروح في يوم من الايام .. ولما كلمته .. قال لا والله لسى مارحت عشان بجدد الرخصه اول عشان التفاتيش ,, قلنا اوكي نمشيها .. اليوم الثاني .. الثالث .. الرابع .. عدى الاسبوع الاول .. الثاني ,, الرجال من النوع الي اليوم يتصور .. بكره يصور بطاقة الاحوال .. بعده يسوي فحص نظر .. ياخذ راحه 5 ايام .. يرجع يكمل ويسدد الرسوم والمخالفات .. وهكذا حياته رحمه الله .,
انا طفشت ,, لقيت خويي الثاني .. بيروح الجامعه .. قلت اجل انت الذيبان وماغير ارفع فيه عشان يجيب لي توصيات وافتك من خويي الأول وبطأه الي تقول كأنه مقاول سعودي ماسك مشروع حكومي >> مايقصد الدرباس

راح ذيبان .. دور للدكاتره .. وأشك انه دور عليهم .. لأنه يقول مالقيت ولا واحد .. مع ان فيه صيفي وفيه اوادم .. بس الرجال شكله نساني وصرفها ..

وقلنا يالله نمشيها ..

الحين 2 _ 0 للنحس
خويي ابو رخصه .. ابشركم خلص وطلع رخصته ودشناها في قهوة ابوهيثم في حفل حضره كبار المسؤولين يتقدمهم المدير التنفيذي للفرع .. محمد اسحاق

ولا أبشركم .. راح من ثاني يوم من الفرحه .. يبي يكشخ بها بالتفتيش .. وقلت لنفسي اللهم لك الحمد حتى ترضى ..
أخيرا ربي هداه وراح يجيب لي توصيات ..

كلمته بالجوال وكلي سعادة غامره .. اتطمن عليه انه وصل للجامعه وانه عند رئيس القسم وانه طبعها .. عشان ارتاح نفسيا

قالي أبشرك .. جبت لك 5 توصيات .. من قدك .. الدكتور فلان والبروفيسور فلان والدكتور علان كلهم سلكوا لك في التوصيه والحين انت اقوى واحد ,,
قلت الله يبشرك بالخير وتراك معزوم على العشاء في تاريخ 23 / 5 / 2099 لأنك شخص تستاهل ..

وينك بس خلنا ناخذ منك الزين كله .. قال بس لحظه .. فيه مشكله ..

قلت عسى خير يارب ,,

قال ترى فيه خطأ في التخصص في 3 من التوصيات ..
وفيه خطأ في اسمك .. مو مطابق للأسم الي بالجواز في التوصيه الرابعه ..

قلت هااا ؟
والصدى في داخلي يقول هاا هاااا هااااااا ..

لااااااااااا .. لعنبوا ابليسك .. دارس معك 4 سنوات في نفس التخصص وحاطين تخصص ادارة اعمال واحنا محاسبه ؟!!
أي عقل تملك ياهذا ؟!!

قال وش اسوي رحت وانا مواصل ..!!
قلت مثل الي صام وافطر على بصله ..لكن تدري .. شقيت ورقة الروزنامه حقت 23 / 5 / 2099 لأني حلفت ما اعزمه ... لا أبوك ولا أبو توصيتك ياشيخ وعلى ماقال المثل مايحك جلدك مثل ظفرك

**::شكسبير::** · 08-08-2010, 12:32 AM

الجزء الثاني

بعد ماانتفخت اوداجي ,, من الفعل المشين الي سواه ابو الشباب .. قررت اني اروح بنفسي للجامعه بعد ما أستأذن يوم من الايام .. لكن متى يجي الموظف الثاني عشان يغطي محلي واطلع انا ..

انتظرت اسبوع ونص تقريبا وجاء الموظف وكلمت المدير وقلت له ترى بستأذن ولابخليك تجيب لي توصيه
قال لا ياحبيبي رح الله يوفقك ترى العمل بدونك حلو ,,
عاد حموري خددت .. مدري خدودي حمرت من الخجل الذي انتابني ,,
جهزت عفشي واعلنت الرحيل وقلت :

مرحبا بك يالتعب بأرض الكفاح .. مرحبا والجَلَد فيني زهاب
ودعت اهلي .. واعلنت حالة الاستنفار القصوى .. وامريكا تهددني اذا ماوقفت عملية تخصيب التوصيه راح تفرض علي أقسى العقوبات .. وأنا أجمع اخواني الصغار واطلع على الدولاب وألقي خطبتي العصماء وأعلن المضي قدما في الحصول على التوصية المنتظره .. اللهم عجل بها :d
نمت بدري ذاك اليوم وصحيت بدري ولبست وتحمست وشغلت الهنادي ( الحين عرفتوا ليش كتبت الموضوع ؟ ) وتوكلت على الله

بديت يومي على صراف البنك الأهلي .. مريته عندي عمليتين أبي اسويها .. دخلت البطاقه .. رفض العمليه الأولى .. الغيت العمليه وطلعت البطاقه من نفسها..
أنا طبعا مستانس جدا أني بروح اخذ توصيه عشان كذا بالي مو معي .. مشيت رحت بسرعه للآله الثانيه .. ونسيت البطاقه في الأولى ماسحبتها من مكان البطاقات ..

وبلعت البطاقه أم الشباب .. قلنا يالله اليوم النحس جاب الهاتريك 3-0
مو مشكله انا انسان سعيد في حياتي لأني بجيب توصيه الحين .. والفلوس اخر اهتماماتي .. أهم شي العلم

مشيت على بركة الله .. ومسكت الخط .. وأثناء ماأنا أغرد لوحدي في السياره .. تذكرت ان التوصيات ماطبعتها .. لأني كنت ناوي اول ما اصحى من النوم أطبعها .. لكن قلت يانفسي أمشيها لكي الحين .. عشاني مستانس .. باخذ توصيه من قدي ,,
وصار النحس متقدم بقوه 4 -0
وصلت المدينه المطلوبه .. قلت بمر المكتبه الي جنب الجامعه .. رحت له ..
أنا : أهلا طاهر
طاهر : هلا والله
أنا : فيه طباعه ؟
طاهر : لا .. الي يطبع ماخذ أجازه !!
عسى ماشر ماحد يعرف يطبع الا هو ؟
لميت عفشي ومشيت .. 5 – 0 .. قلنا مو مشكله الاتحاد وهو الاتحاد أكلها من الهلال ب 5 .. منو أنا عشان ازعل !!؟

قلت تدري بروح الجامعه وبطبعها هناك .. وانا اصلا عارف ان مكتبة الجامعه غبيه حتى الطباعه مافيه لكن قلت بتميلح عند أي دكتور وبعطيه الفلاش يطبع لي ..
رحت للدكاتره ..
دخلت على الأول وعطاني التصريفه الي تحبها قلوبكم .. الطابعه خربانه انتظر الدكتور فلان بيجي الساعه 11
ووقتها كانت الساعه 10:30 قلت تدري .. بروح برى الجامعه استغل الوقت أطبع واصور كم نسخه .. لأن الاخوان الاثنين الي وصيتهم في البدايه وجابوا العيد .. كلهم وصوني الحين .. فعندي زحمة اوراق واحراج اطبع من الدكتور

طلعت ادور خدمة طالب .. يمين .. يسار .. فوق .. تحت .. اكس .. مربع .. تقول كأن هالديره ماجيتها من قبل ونسيت كل شارع فيها !!
اخيرا لقيت قرطاسيه .. يوم جيت اوقف عندها .. حسيت ان السياره طاحت على جنب !!
نزلت ..

ياهلا ومسهلا .. الكفر على الجنط
وللللللااااايييييييي .. طبعا هذي زغرده من الفرحه

الجو جدا حلو .. 10:30 .. شارع عام .. مافيه بنشري قريب .. الديره مافيها تكاسي .. الثوب والشماغ والوضع كله نظيف وجديد ..

ياسلاااام .. ما احلى البنشر في هذه الاوضاع ..

فكرت .. وقدرت .. وش اسوي ؟!
أغيره بنفسي .. ؟
ولا استسلم وادبر نفسي اروح للجامعه اخلص شغلي وارجع لها بعدين ؟
طبعا .. الاوراق ماطبعتها .. لأن القرطاسيه محل الجدل .. طلع ماعندها طباعه !! يعني مصيري ارجع للدكتور وامسح الوجه بمرقه واطبع عنده لي ولأخوياي وجيراننا والجامعه واذا فيه أحد منكم يبي يراسلني على الخاص
استسلمت وقلت بغير الكفر بنفسي والله يعيني .. أول خطوه .. غيرت الاستايل حقي .. وفصخت الثوب والشماغ .. وسويت دعايه مجانيه على الشارع العام لملابس برومان .. لأني كنت مطلع الورقه الصغيره حقت المقاس من ورى على اساس اني كشخه واشتري من الزين ...
وافتح الشنطه واشمر عن ساعدي .. وافتح ارضية الشنطه

و .. وو .. ووو

وأبلع لساني بدل ما أبلع ريقي تقول متصافق مع عبدالله الشريده

تدرون ليش ؟

الكفر موجود ..آمنا بالله.. لكن فيه زيت باور منكب عليه من عام الفيل وصار كل شي لزج .. ووسخ ولكم الباقي !!

**::شكسبير::** · 08-08-2010, 12:33 AM

الجزء الثالث

بعد ماصار الي صار , نظرت بحنيه الي يدي .. ذرفت عيني ..نظرت اليها نظرة اخيره .. نظرة الوداع .. ضميتها على صدري ..
ثم غطستها في بئر النفط الأسود .. وطلعت البتاع وهو في قمة القرف .. لكن نمشيها للدنيا ونقول لعيون التوصيه ..
وخذ لك أحلى سداسيه .. 6-0

بديت وانطط واناقز عشان افك البراغي من الكفر ..
وأبد .. تروا ماهي حاره ومفتاح العجل بسم الله ماشاء الله تقول طالع من ثلاجه .. لأن الجو ماكان حار .. وتعرفون انتم وضع الأجواء الي هنا .. تخلي الحليم حيران ..
في هذه الاثناء .. بدت الذاكره ترجع بي الى الوراااء .. بديت استرجع شريط الذكريات حق سنه كامله ..
تفاجأت بشي غريب !!
اليوم هو 26 / 8 /1431
وفي يوم 26 /8 /1430
يعني قبل سنه بالتمام والكمال .. كنت في نفس الوقت تقريبا الي هو قبل الظهر ,, على خط ومبنشرين وقاعدين نغير الاسبير في جو نفس الجو الي كنت فيه اليوم .. حر + تعب خط + الثوب وقروشته
سبحان الله .. شي غريب

المهم ضبطت كل حاقه .. ويالله على أقرب مطعم .. ضامن ان عندهم مويه وصابون .. لأن الوضع مايمشي مع المويه بس ..
وادخل بوفيه وافرك يدي بيدي ورجلي .. ولاراح الا نص التشوه .. قلت أقول الحين الساعه تشير الى الحاديه عشر والربع .. الحق عليهم بس لايمشون ..
المهم .. في هذه الاثناء جاتني رساله على الجوال من البنك تفيد بأنه تم ايداع مبلغ **** الى حسابكم رقم ****
فكرت في هالمبلغ ! من وين جاي ؟ يعني بصراحه المبلغ حليو ..
تذكرت اني ماخذ اوفر تايم بالدوام وقلت أجل هذا حق الاوفر .. بس بصراحه كان مجزي وفوق الي كان محسوب لي .. استانست شوي لأني كنت احتاج لأي شي يحسسني اني في حياه حلوه مع ان كل المعطيات عكس ذلك .. قلت يالله الحمد لله على النعمه ..
شوي جاتني رساله من البنك ..
عزيزي العميل .. لقد تم سحب مبلغ **** من حسابكم رقم **** وهو نفس المبلغ من نفس الحساب ؟!! قلت لا أبوكم لا أبو الي جابكم .. اجل الحياه حلوه ها ؟ هي اليوم خاربه خاربه
وارجع الجامعه وارش الوجه بمرقه .. وادخل على رئيس القسم .. واهلا كيف الحال وش الاخبار .. ومن ها التسليك الين دخلت بالمضمون ,. طبعا شايل معي حتى الاب توب عشان أضمن ان الفلاش مايستهبل ولاشي وتكون الامور موجوده في الجهاز ..
يوم قلت له الموضوع .. قال أي ابشر أصلا توصيتك عندي على جهازي ..
انا تشقلبت مثل نواف العابد من الفرحه أن رئيس القسم متضامن معي وحاطني ضمن اولوياته ..
بس شلون عندك توصيه لي بكامل بياناتي ؟
قال من خويك الي جاني المره الماضيه !! قلت أهاااااا
أجل خذ الفلاش هذا لأن كل شي بالتوصيه القديمه لايمت لي بصله .. أبو الشباب غلطان بأسمي وأنا خويه .. وغلطان بتخصصي وانا الي جالس جنبه 4 سنوات على مقاعد الدراسه ..
طبع لي الجديده من الفلاش وطبع حقت المجرمين الثنين وبغيت اطير من الفرحه يومني رايح اصورها على 5 نسخ لكل ورقه عشان اعطيها 5 دكاتره من الفرحه واصلا المطلوب دكتورين ..
صورت ورحت للدكاتره وانا فرحاااان .. تدرون ليش ؟

مو عشان التوصيه !
عشان أول مره اوزع اوراق على الدكاتره واخليهم يجاوبون على الي مكتوب فيها بعد ماكانوا يبهذلونا في الاختبارات .. بس بصراحه كسروا خاطري وهم يحلون .. أحس اني قروشتهم .. لأني عطيت كل واحد 3 اوراق .. لي ولأخوياي << كرهتنا بأخوياك :p

يوم خلصنا وكل شي تمام التمام .. اخذت الاوراق من الاول .. رحت للثاني .. خلصت من الثالث .. وصلت للرابع وكان بروفيسور ونبيه ماشاء الله عليه .. قال تعال يبو الشباب ..
لاحظ معي .. توصية فلان ( راعي الرخصه ) بالعربي معدله 3.72 وبالانجليزي 3.58

وش السالفه ؟
الا صوت الحوووووووووووووووو دوووف .. وشو ؟
صدمه نفسيه داخليه
:(
قلت لاااااا تكفى .. والله اني شديت حيلي عليها .. قال بكيفك ماراح تقبل منه ..
ياليييييييييييييييل .. بعد ماخلصت هالمشوار وكل شي اوكي طلع ابو رخصه النشبه بمصيبة جديده ..

لكن لاحول ولا قوة الا بالله .. ما أقول الا :
مرحبا بك يالتعب بأرض الكفاح<<< ماهو حافظ الا هالبيت

**::شكسبير::** · 08-08-2010, 12:33 AM

الجزء الرابع

رجعت لرئيس القسم وأنا مطأطأ الرأس .. لأني كرهته يومه بصراحه .. وأول مادخلت عليه مديت له الفلاش وهو يكلم جوال يعني افهمها ..
قام من نفسه وقال اجلس وسو الي تبي ..
قلت عز الطلب والله .. خلنا نعيش الجو شوي .. وعاد تحمست وبغيت اطرده .. لأن ديني ودين واحد يكلم جوال في مكتبي
الوكاد اني عدلت توصية الحبيب ورجعت للدكاتره واشق وجهي بالابتسامه الصفراء عشان يمشونها لي ولا أحد يتذمر ولا تروا بعطيكم محاضرات زياده .. توني جالس بمكتب رئيس القسم ومشبكه ..
والله وماقصروا سووا لي من جديد وتمت العمليه بحمد لله ..
الحين باقي ثلث ساعه وينتهي الدوام .. الحق يبو الشباب على وكيل الكليه لشؤون الطلاب عشان يختم لك الاوراق .. اوكي
افصخ النعله اكرمكم الله .. وارفع الثوب واعضه واطلق سيقاني للريح للمبني المجاور ,,
وكل خطوه تقدرون تقولون 3 متر من الفرحه وكل ما أشوف باب مكتب الوكيل يقرب تزيد نبضات قلبي .. دربج دربج دربج

مديت يدي وانا مخطط لكل سؤال راح يسأله لأني أعرفه وعارف انه راح يسألني عن وضعي الحالي وووو الى اخره ..
يوم وصلت الباب شفت اللمعه الذهبيه ..
وعرفت كل شي .. وشلت بعضي لأني احس اني صرت حطام وانواع الارتطامات بداخلي .. افكار كانت ماشيه ورى بعض ومسكوا بريك فجأه وتصافقوا ..

اللمعه للأسف .. كانت لمعة سنة الباب .. يعني الباب مسكر بالمفتاح .. يعني مافيه ختم .. يعني ضف وجهك .. يعني اوراقك بلها واشرب مويتها ..

مات ضميري في هاللحظه .. كنت مستعد اسوي أي شي .. ممكن اذبح ادمي .. ممكن ارقص .. ممكن انام عند الباب الين يفتح بكره الصبح .. ماعندي مانع .. هي خربانه خربانه

بديت مثل المجنون أو مثل المتعاطي يدور للحبوب عند أي شخص .. وانا بديت ادمن الاختام
ادور يمين يسار .. ادخل المكاتب واسأل .. عندك ختم حق التوصيه؟ .. لا لا لا .. كانت اجابات محطمه ..

حاولت ادخل على عميد الكليه ..
ودخلت عند السكرتير حقه .. وقالي لا .. يعني ماعنده ختم التوصيه ..
بس رح لمدير الاداره !!

ماصدقت ..
طرت من الفرحه
دخلت عليه .. كان شخص حبيب بصراحه ,, وسألته .. عندك ختم حق التوصيه ؟
قال تبي ختم عربي ولا انجليزي ؟
قلت هااا .. بعد فيه خيارات
أجل عندك بطاقتي الصراف الي بلعتها الماكينه ؟ << ماهو فقش :d
قلت انجليزي وبوسه على راسك بعد .. قال ابشر بس رح وقعها من العميد وارجع لي .. قلت أخاف تقفل مكتبك .. ضحك قال لا ماعليك انتظرك .. والله واقعد عند سكرتير العميد الين طلع حضرته يوم انتهى دوامه .. قال امر؟
قلت ابي توقيعك طال عمرك .. قال بس ؟
قلت عندك عفريته ؟ << عاد تكفون صدقوني هالمره :p
قلت بس طال عمرك .. قال كان ما انتظرتني هالمده كلها .. ابد حياك في مكتبي .. بديت احس روحي كننننننق .. مره رئيس قسم .. ومره مخاوي العميد .. بس بعد ايش ؟ بعد ماتخرجنا
المهم وقع لي على هالوريقات .. وارجع على البيبان لمكتب مدير الاداره واختم من عنده ..
ومن الفرحه بغيت اشق الورق .. بعد رحلة عناء دامت شهر تقريبا
واختتمت بسيناريو 4 ساعات تقريبا .. سميته :
الموت من اجل الوصيه
Die for the commandment!!

قفله /
معنى الأمل فيني كبير .. ولو تحدوني كثير
متوكل بالله وثم .. تالي طموحات المسير

جميع الأحداث واقعيه وحصلت يوم السبت 26 / 8 /1431

**accord05** · 08-08-2010, 04:25 AM

لك مني احلى تقييم وشكر....

ادور عبارات لكن ماعرفت وش اكتب المهم رحت لخويك الدب واعطاني ورقه مكتوب فيها "لاتعليق" << :p

**abu khaled** · 08-08-2010, 01:08 PM

يا عمي رح انتحر انت وحظك :d

**abAdy.777** · 08-08-2010, 01:42 PM

ماشاء الله تباركـ الرحمن
:d
عندك قوه صبر الله يقدرك عليها
لو انا مكانكـ الله يعلم شنو سويتـ
والصراحه الموضوعووه روووعهـ
قريته كلهـ وانشاء الله يصي الي تبيه والله يوفقك

واطلب من جميع الأعضاء يدعون لك الله يوفقكـ بلدنيا وبلاخره وكل شي يتسهل عليكـ

ولا انا ابنتحر :d

**المـــــلكـ اكـــــورد** · 08-08-2010, 02:16 PM

انت وينك من زماان.. ؟؟!!

اهنيك ثم اهنيك ثم اهنيك

10/10

وروايتك هذي مدري ليه عندي احساس ان لها علاقة بجامعة الملك سعود :d

وترا كل الدوائر الحكومية نفس الطريقة يمرمطونك لين تحصل على الشيء

اهم شيئ تظفر بالنهاية <<لاحد يدقق وخاصة مجووودي :p

...لك مني اجمل تحية وتقدير

**B 5ob3aH** · 08-08-2010, 02:23 PM

ماشاء الله عليك

اسسلوبك يشد الوآحد للقرآيه ,
.

كل ماقريت كلمه ودك تقرا اللي بعدها <~ لا يا شيخ :p

لا جد يعني بعض المواضــيع تقرأ منه أول كلمتين وتقفل معك وتطلع من المنتدى كله :d

,

اهنيك والله , ومووفق بحياتك وانشاء الله تروح بعـثه وتحقق كل اللي تبيه

**::شكسبير::** · 08-08-2010, 11:12 PM

لك مني احلى تقييم وشكر....

ادور عبارات لكن ماعرفت وش اكتب المهم رحت لخويك الدب واعطاني ورقه مكتوب فيها "لاتعليق" << :p

تشكرااتي الكثيره لسعادتكم .. وان شاء الله نقيمك في افراحك :d

يا عمي رح انتحر انت وحظك :d

بشرط ..

تشوف لي طريقه سهله .. يعني مثلا .. تقبيص ولا قفز من فوق رصيف

ماشاء الله تباركـ الرحمن
:d
عندك قوه صبر الله يقدرك عليها
لو انا مكانكـ الله يعلم شنو سويتـ
والصراحه الموضوعووه روووعهـ
قريته كلهـ وانشاء الله يصي الي تبيه والله يوفقك

واطلب من جميع الأعضاء يدعون لك الله يوفقكـ بلدنيا وبلاخره وكل شي يتسهل عليكـ

ولا انا ابنتحر :d

دعواتك ثلجت صدري واحرجتني بصراحه :o

اشكرك من كل قلبي :o

انت وينك من زماان.. ؟؟!!

اهنيك ثم اهنيك ثم اهنيك

10/10

وروايتك هذي مدري ليه عندي احساس ان لها علاقة بجامعة الملك سعود :d

وترا كل الدوائر الحكومية نفس الطريقة يمرمطونك لين تحصل على الشيء

اهم شيئ تظفر بالنهاية <<لاحد يدقق وخاصة مجووودي :p

...لك مني اجمل تحية وتقدير

والله موجود من زمان لكن تعرف احنا الروائيين مشغولين شوي :p << هذا الي حس نفسه اغاثا كريستي :d

اما سالفة جامعة الملك سعود .. فلا ياحبيبي مو هذي الجامعه واسمح لي انت واحساسك ماعندكم سالفه

بس ماعلمتنا .. كيف تعلمت (تظفر بالنهايه ) ؟

أحس انك ندمت عليها :d

ماشاء الله عليك

اسسلوبك يشد الوآحد للقرآيه ,
.

كل ماقريت كلمه ودك تقرا اللي بعدها <~ لا يا شيخ :p

لا جد يعني بعض المواضــيع تقرأ منه أول كلمتين وتقفل معك وتطلع من المنتدى كله :d

,

اهنيك والله , ومووفق بحياتك وانشاء الله تروح بعـثه وتحقق كل اللي تبيه

مدري بس احس انك تسلك لي

ترى والله مشكله لاتحمست انا وصرت اكتب قصص واجد ..

صدقني ادارة المنتدى من ثاني يوم تكتب ( للتقبيل لعدم التفرغ )

لكن اشكرك على دعواتك والله يجزاك بمثلها

**أكورداوي** · 08-08-2010, 11:30 PM

شكسبير ..

أهنيك اول شي على صبرك على اخوياك خصوصا الأول فيهم ,,

ثانيا أتمنى لك التوفيق في حياتك وفي دراستك العليا ,,

تقبل مروري

**مجوودي كوول** · 10-08-2010, 11:17 AM

ما شاء الله عليك

صبور مثل صبر الجمل على العطش >>>>>> بينطق الليله يعني بينطق هع هع هع
بس عليك اسلوب ما شاء الله تبارك الله
اهنيك على هالقصه و الله يعين على الجامعات و الدوائر الحكوميه