الموضوع: جـــوالــك تــحــت الــــمـــــجــــهـــــر...

" بســـــمـ الله نبـــــدأ "


1/ ماهو نوع جوالك ؟

نوكيا E61
او السطحه

:d

2/ ما اخر صورة تم التقاطها ؟
( يفضل عرضها)

الجوال ما فيه كاميرا
لان سلسلة جوالات الـ E خاصة برجال الاعمال

واللي مثلي ما يحتاجون كاميرات في اعمالهم

;)

3/ كم رقم مخزنـ عندك ؟

337

4/ ما اخر رسالهـ تم تلقيها ؟

رسالة من واحد يقول وشفيك ساحب علي ما اتصلت !!

5/ ماهي الرسـالهـ رقم 5 ولاحظ ((5)) بالتحديد ؟

رسالة Missed Call من موبايلي

6/ من ضمن الاسماء في تلفونك هل يوجد اسم غريب او مضحك لاحد اصدقائك,, اذكره لـنا ؟

واحد من اخوياي مسميه (فش فاش)

:d

هذا سافر معي مره انا وواحد ثاني وفش فاش هذا كان جالس ورا

المهم

وقفت في محطة وعبيت بنزين وشريت اغراض مثل البارد والبساكيت
كان من ضمن الاغراض 8 اكياس فش فاش

حطيت الاغراض عند خويي اللي ورا وفي نص الخط طلبته يعطينا من الفش فاش اللي عنده
قالي ما عاد فيه .. خلص !!

وش اللي خلص ؟ 8 اكياس يالمدمن ؟!



وطحنا فيه تقطيع طول الخط .. حتى بغيت انزله لانه من جد خرب مزاجي
ومن هنا جات التسميه

7/ ماهي أعلى فاتوره قد تجاوزتها ,,او كمـ هو حدك الائتماني ؟

وصلت 2400 ريال
واللحين حدي الائتماني 500

8/ ماهو اسمك بالبلوتوثـ ؟

B Unique

9/ ماهو الثيم الحالي تلفونك ؟

Apple Macintosh

10/ ماأكثر ماتستخدمهـ بالتلفون مثلا: المنبه , الحاسبه , البلوتوث , ؟

متصفح الويب ، الماسنجر ، الحاسبه ، المنبه ، الملاحظات

11/ آخر بلوتوث استقبلتـه ماهو ؟

فيديو للسيارة اللي صدم فيها كوكو كورد على طريق الطايف الرياض

:(

12/ كم عدد الرسائل بالصندوق الوارد ,, وكم عددها بالصادر ؟

الوارد : 469 رسالة
الصادر : 300 رسالة

13/ رسالة لن تقوم بمسحها أبداً ولماذا ؟

رسالة عتاب من شخص يعز علي
لاني ما عرفت قدري عنده الا بعد ما وصلتني الرسالة هذي

14/ ماهو الأسم رقم ((13)) المخزن عندك ؟

(ابو صالح) سرى ليله
خخخخخخخخخخخخخخخ

:d

15/ ما آخر رسالهـ قمت بأرسآلها ؟

والله من اللقافة الزايده .. عطيتك وجه انا !!






واما الآن نقدم لكم عضو النشبه القدير بلونه المغبر الجديد

ابو عزوز

إجابة أسئلة و ى ل

كم رقم مخزن بجوالك...؟

272 رقم

متى اول مره شريت فيها جوال...؟

أيام المتوسط .. يوم كان B Unique بالحضانة :d

ماهو اول جهاز استخدمته...؟

ما أدري وش أسمه الصحيح .. لكن نسميه المسكت

هل كان هديه او انت شريته...؟

هدية :( يا حسره من مين ؟؟!! .. لا والله من عرق جبيني

مالك نيه تغير جوالك واذا نويت وش ناوي تشتري...؟

والله ودي أغيره .. لكن الظروف الماليةما تسمح ..

الحين يكفيك هذا ويلا ياعضاء وينكم...؟

ما أحد حولك ..
أنا ما أقدر أدخل اليوم ..
عشان كذا أرشح أخوي المشرف اتشـــ
للشرشحت جواله .. :d

" بســـــمـ الله نبـــــدأ "

حسابك بعدين يابو عزوز ;)

1/ ماهو نوع جوالك ؟

نوكيا 7610 ( الملقب بالزعيم )
شريته من دبي اول ما نزل بـ 2800 ريال
والحين ناوي على الـ E90

2/ ما اخر صورة تم التقاطها ؟

صورة للوالده ( الله يشفيها ويعافيها ) وهي جالسه تقرأ في كتاب الله

( يفضل عرضها)

هذي ما تنعرض لانها اغلى عندي من لوحة المونيليزا :d

3/ كم رقم مخزنـ عندك ؟

بعد اخر تصفيه عملتها للاسماء رست على 73 رقم وعقبال ما تصفى على 3 ارقام

4/ ما اخر رسالهـ تم تلقيها ؟

أنا عند البيت
بيتكم عشان لاترسلي رساله تقولي فيها أي بيت :d

5/ ماهي الرسـالهـ رقم 5 ولاحظ ((5)) بالتحديد ؟

كثر الثقل مو زين ويقول المثل من تغلى تخلى :o

6/ من ضمن الاسماء في تلفونك هل يوجد اسم غريب او مضحك لاحد اصدقائك,, اذكره لـنا ؟

ذيل الكلب ( وانتم بكرامه لانه مستحييييييييييييل ينعدل )

7/ ماهي أعلى فاتوره قد تجاوزتها ,,او كمـ هو حدك الائتماني ؟

حدي الأئتماني عشرة الآف ريال

8/ ماهو اسمك بالبلوتوثـ ؟

H Y S T E R I A

9/ ماهو الثيم الحالي تلفونك ؟

نففففففس الصورة اللي بتوقيعي

10/ ماأكثر ماتستخدمهـ بالتلفون مثلا: المنبه , الحاسبه , البلوتوث , ؟

برنامج Quickword
والحاسبه

11/ آخر بلوتوث استقبلتـه ماهو ؟

قصيده تسد النفس

12/ كم عدد الرسائل بالصندوق الوارد ,, وكم عددها بالصادر ؟

867 رسالة في الصندوق الوارد

و 33 رسالة في الصندوق الصادر

13/ رسالة لن تقوم بمسحها أبداً ولماذا ؟

لو : دريــت بحــالتي مالمتنــي
أحتضن طيــفك بقلب مانســاك


لو : لمست الوصل فيني وزرتنــي
أزهرت أوراق حبــي في خطــاك


لو : نظــرت بعيــن قلبك شفتني
مامعــي مخلــوق يستاهل غلاك .


اما لماذا ؟؟ يمكن يجي يوم واحتاج اني ارسلها لنفس الشخص اللي ارسلي اياها

14/ ماهو الأسم رقم ((13)) المخزن عندك ؟

الأستعلامات الدولية
026354044
( وهذا رقمهم للي حاب يستفيد منه في معرفة مصادر الارقام الوارده من خارج المملكة )

15/ ما آخر رسالهـ قمت بأرسآلها ؟

الاسم الرباعي ( لواحد الله يستر علينا وعليه )


باقي شي وللا اروح بيتنا :d

1/ ماهو نوع جوالك ؟

سوني اريكسون w880i بكل فخر ,, وبكل شموخ وبكل تميز ,,

2/ ما اخر صورة تم التقاطها ؟

كنا في مطعم ,, وخويي اللي باشر علينا سوا مفاجاة حلوة ,,, كاتب اسمائنا على العصيرات بالفراولة

3/ كم رقم مخزنـ عندك ؟

444 رقم حسب اللي قريتة بالجوال وفي الشريحة 214 رقم

4/ ما اخر رسالهـ تم تلقيها ؟

اخر رسالة اليوم الساعة 1.17 دقيقة من صباح يوم الخميس (( يعني لسة في الليل يوم الاربعاء للسعوديين هع هع هع )) وان مكتوب فيها ( جوعوا حتى نجيكم المرسل B Unique

5/ ماهي الرسـالهـ رقم 5 ولاحظ ((5)) بالتحديد ؟

عزيزي العميل :لقد صدرت فاتورة شهر اغسطس بقيمة 287.23 واخر موعد للسداد يوم 22 سبتمبر 2007 الرجاء استخدام رقم الحساب 966568XXXXXX عند سداد المبلغ , وشكرا .

6/ من ضمن الاسماء في تلفونك هل يوجد اسم غريب او مضحك لاحد اصدقائك,, اذكره لـنا ؟

فية واحد من اخواي اسمة ماجد البقمي واسمة في الجوال ( تنيسة ) تسألون ليش ؟؟ لانة كان مشرف في مركز صيفي ,,, وكان فية طاولة تنس ,, ولعبة الفريرة المعروفة ........... الرجال مشهور بالنداء القديم حقة الاطرم .. لانة دايم يكلج في الكرام ,, يربط كلمتين مع بعض .. يخترع كلمة جديدة ,,,, المهم انة ذاك اليوم بدل مايقول فريرة قال تنيسة ,,,, يقصد طاولة التنس ... وجت على وزن فريرة ..... تنيسة ...

7/ ماهي أعلى فاتوره قد تجاوزتها ,,او كمـ هو حدك الائتماني ؟

اعلى فاتورة ... 1700 ريال ,,, لاني لعبت على نفسي ذاك اليوم وشغلت النت حق موبايلي زماااااان قبل اكثر من سنة قبل هالخدمة الجديدة نت 100 و 200 والمفتوح 350 .... شبكت الاب توب بالجوال وخذ لك نت وتحميل ... وفجأة !!!

حدي الائتماني 400 وفواتيري حاليا ما تتجاوز 230

8/ ماهو اسمك بالبلوتوثـ ؟

اسماء كثيرة ,, حالياً NightHawk

9/ ماهو الثيم الحالي تلفونك ؟

وش دخلك ؟؟ حتى لو وصفتة لك ماراح تفهمة !!! :p

10/ ماأكثر ماتستخدمهـ بالتلفون مثلا: المنبه , الحاسبه , البلوتوث , ؟

الحاسبة >>>>>>>>>> لاني ساقط في الرياضيات:d
البلوتوث
المنبة

11/ آخر بلوتوث استقبلتـه ماهو ؟

الوليد بن طلال داخل طائرتة الخاصة ,, فيديو

12/ كم عدد الرسائل بالصندوق الوارد ,, وكم عددها بالصادر ؟

الوارد 376 نصها كول مي :(
الصادر244

13/ رسالة لن تقوم بمسحها أبداً ولماذا ؟

هي الرسائل اللي احفظها في نفس شريحة الجوال ودايم تذكرني بمواقف ,,,
واخر رسالة حفظتها في شريحة الجوال من متيم بالهنادي 2002 الله يسكن روحة الجنة ويغفر لة ويرحمة ,,

14/ ماهو الأسم رقم ((13)) المخزن عندك ؟

اسمائي كلها انجلش ,,,
الا اعضاء المتدى عربي ,,

اذا حطيتة عربي يطلع رقم 13 سحر المشاعر
اذا عنجليزي يطلع ابو صالح ,, الله يذكرة بالخير مدرس التحفيظ يوم كنت عاقل قبل 8 سنوات

15/ ما آخر رسالهـ قمت بأرسآلها ؟

ارسلتها لـ B Unique (( الشباااااااااب جيعااانين ))

اشكرك بعنف على الموضوع الذي كويس ;)

المشاركة الأصلية كتبت بواسطة ـبطرانـ2005ــ

انا






انا






انا





انا






انا





انا جوالي مسرووووووووووووووووووووووووق:(

مسكيييييييييين !!
من جد كسرت خاطري

1/ ماهو نوع جوالك ؟
Sony Ericsson w900i


2/ ما اخر صورة تم التقاطها ؟
صورة لأبن عمتي في مطعم

( يفضل عرضها)
ما أفضل عرضها ..

3/ كم رقم مخزنـ عندك ؟
285 رقم ..

4/ ما اخر رسالهـ تم تلقيها ؟
!! انت منت حبيب عادي!!
والباقي مو لازم :o

5/ ماهي الرسـالهـ رقم 5 ولاحظ ((5)) بالتحديد ؟
رسالة موجود ..

6/ من ضمن الاسماء في تلفونك هل يوجد اسم غريب او مضحك لاحد اصدقائك,, اذكره لـنا ؟
زينون .. هذا سلمك الله رقم واحد في الدمام ركبت عنده الزينون القديم الا عندي قبل ما اتعلم اوصل الدائرة الكهربائية وسميت الرجال زينون :d حتى ساعات انسى اسمه الحقيقي .. :d


7/ ماهي أعلى فاتوره قد تجاوزتها ,,او كمـ هو حدك الائتماني ؟
450 ريال .. فواتيري عادية جداً

8/ ماهو اسمك بالبلوتوثـ ؟
ما غيرته من اول ما اخذت الجوال ..
W900i

9/ ماهو الثيم الحالي تلفونك ؟
Apple

10/ ماأكثر ماتستخدمهـ بالتلفون مثلا: المنبه , الحاسبه , البلوتوث , ؟
المنبه حق اجلس للداوم .. الله يلعنه من دوام ..

11/ آخر بلوتوث استقبلتـه ماهو ؟
صورة لواحد من أعز أعز اصحابي راح امريكا وغاب عن عيني 10 شهور حالياً .. الله يرجعه بالسلامة ..

12/ كم عدد الرسائل بالصندوق الوارد ,, وكم عددها بالصادر ؟
للأسف الجوال الفاشل ما يخزن اكثر من 100 رسالة ..
الوارد 62
الصادر 35

13/ رسالة لن تقوم بمسحها أبداً ولماذا ؟
رسالة ما شخص فارقته مدة سنتين بسبب مشكلة والحمد لله انحلت برسالة منه ..

14/ ماهو الأسم رقم ((13)) المخزن عندك ؟
ابو حجر
سالفة الأسم طوييييلة :d

15/ ما آخر رسالهـ قمت بأرسآلها ؟
call me

1/ ماهو نوع جوالك ؟
Sony Ericsson W900i
ابيض

2/ ما اخر صورة تم التقاطها ؟
صورة اخوي وهو ينطق من الوالد
( يفضل عرضها)
مستحيـــــــــل
:o
3/ كم رقم مخزنـ عندك ؟
371

4/ ما اخر رسالهـ تم تلقيها ؟
رساله من عاجل الله يغثهم

5/ ماهي الرسـالهـ رقم 5 ولاحظ ((5)) بالتحديد ؟
تهاني من ولد خالي بمناسبه قرب رمضان

6/ من ضمن الاسماء في تلفونك هل يوجد اسم غريب او مضحك لاحد اصدقائك,, اذكره لـنا ؟
خالي سحلاوي
الحمد لله خخخ
;)
7/ ماهي أعلى فاتوره قد تجاوزتها ,,او كمـ هو حدك الائتماني ؟
220

8/ ماهو اسمك بالبلوتوثـ ؟
Frenda Marwolla
:d
9/ ماهو الثيم الحالي تلفونك ؟
ثيم اجهاز الاصلي البرتقالي

10/ ماأكثر ماتستخدمهـ بالتلفون مثلا: المنبه , الحاسبه , البلوتوث , ؟
برنامج الWalkman للاغاني
398 اغنيه

11/ آخر بلوتوث استقبلتـه ماهو ؟
مقطع اثنين خكاريه الله يكرمكم
:d
12/ كم عدد الرسائل بالصندوق الوارد ,, وكم عددها بالصادر ؟
19 رساله

13/ رسالة لن تقوم بمسحها أبداً ولماذا ؟
رساله من خطبيتي الغاليه تعاتبني
:o
14/ ماهو الأسم رقم ((13)) المخزن عندك ؟
بوفيه الحجاز (ياعليهم كبده)

15/ ما آخر رسالهـ قمت بأرسآلها ؟
رساله الى مديري ابلغه اني باتاخر عن الدوام
;);)

المشاركة الأصلية كتبت بواسطة JUVENTUS

2/ ما اخر صورة تم التقاطها ؟
عداد السياره وماشي066660

تبيع الطبلون المميز ؟!

1/ ماهو نوع جوالك ؟
الجهاز الأول ETEN G500

والرقم الثاني بجهاز سيء السمعه من يوم طلع على وجه الأرض ;)
أصلا من يوم تقول لأحد معي جوال كذا يقول اعوذ بالله وياخذ عنك فكره سيئه
الظاهر انه حامله وشارب الكحول واحد :d
الجهاز هو الباندا والعياذ بالله

ترا ذا البزر لايقربني ولا اقربه انا ماخذ الصورة من النت >>> لاخلاء المسئوليه

2/ ما اخر صورة تم التقاطها ؟
بالـ ETEN صوره مالها داعي بس بنزلها عباطه :d

( يفضل عرضها)

3/ كم رقم مخزنـ عندك ؟
210 شخص بالباندا اما بالايتين مشوار مافيه طريقه اعرف عددهم لازم اعدهم بنفسي :p

4/ ما اخر رسالهـ تم تلقيها ؟
رسالة تهنئة بقرب رمضان ودعاء لي بالمغفره (رسالة طويلة مافيني حيل اكتبها)

5/ ماهي الرسـالهـ رقم 5 ولاحظ ((5)) بالتحديد ؟
برضه رسالة اللهم بارك لنا في شعبان وبلغنا رمضان (طويلة بعد ومافيني حيل اكتبها)

6/ من ضمن الاسماء في تلفونك هل يوجد اسم غريب او مضحك لاحد اصدقائك,, اذكره لـنا ؟
كثير >>> نادر يكون واحد مكتوب باسمه الحقيقي
ابوعسم
الملا
قطيش
السفير الياباني
علوش
الخ الخ >>>> تراه موب اسم

7/ ماهي أعلى فاتوره قد تجاوزتها ,,او كمـ هو حدك الائتماني ؟
الحد الائتماني 2000 ريال واعلى فاتوره 500 وشوي مااذكر بس زمان

8/ ماهو اسمك بالبلوتوثـ ؟
بيبسي مان

9/ ماهو الثيم الحالي تلفونك ؟
Cobra

10/ ماأكثر ماتستخدمهـ بالتلفون مثلا: المنبه , الحاسبه , البلوتوث , ؟
بالنوكيا المنبه والمكالمات وبس (البلوتوث شغال دايم بس نادر استخدمه)
بالايتين كل شيء فيه استخدمه من الاكسل للجي بي اس للتقويم للنوت للقاموس >>> محلله تحليل :d

11/ آخر بلوتوث استقبلتـه ماهو ؟
اخر بلوتوث زمان استلمته وهي صوره شوفوها

12/ كم عدد الرسائل بالصندوق الوارد ,, وكم عددها بالصادر ؟
444 رسالة + 1251 رسالة من جوال الزعيم
بالايتين والله مدري كم رسالة يبيلي اعدها مشوار

13/ رسالة لن تقوم بمسحها أبداً ولماذا ؟
كلش قابل للمسح مافيه اي مشكله :d اللي يروح يجي

14/ ماهو الأسم رقم ((13)) المخزن عندك ؟
الوالد :d ومسميه جاكم الاعصار وخر عن طريقه

15/ ما آخر رسالهـ قمت بأرسآلها ؟
رسالة تهنئة برمضان >>> سوق شركة الاتصالات شغال هاليومين

1/ ماهو نوع جوالك ؟
نووووكيا N95
2/ ما اخر صورة تم التقاطها ؟
اخر صورة تم التقاطها الى سيارتي في الامارات ,,, وانا بانتظار البسامي يوصلها الي ... لا وازيدكم من الشعر بيت ,,, تعبت واشتريت وشحنة ,,, توصل الاحد واسافر الثلاثاء:d
( يفضل عرضها)
---------------------------------
3/ كم رقم مخزنـ عندك ؟
73 رقما
4/ ما اخر رسالهـ تم تلقيها ؟
رسالة من واحد من الاصدقاء يدعوني الى السحور في المنزل
5/ ماهي الرسـالهـ رقم 5 ولاحظ ((5)) بالتحديد ؟
مبارك عليك شهر رمضان . ,. ,
6/ من ضمن الاسماء في تلفونك هل يوجد اسم غريب او مضحك لاحد اصدقائك,, اذكره لـنا ؟
الاسم المضحك هو : (( مافي معلوم 1 )) يعني هو يتصل وانا ماعرفه:d
7/ ماهي أعلى فاتوره قد تجاوزتها ,,او كمـ هو حدك الائتماني ؟
يالله ,,, الفواتير كلها بال 600 او 700 ,,, الحد هو 300
8/ ماهو اسمك بالبلوتوثـ ؟
The Best BMW
9/ ماهو الثيم الحالي تلفونك ؟
Nokia
10/ ماأكثر ماتستخدمهـ بالتلفون مثلا: المنبه , الحاسبه , البلوتوث , ؟
اكثر برنامج هو ROUTE 66
11/ آخر بلوتوث استقبلتـه ماهو ؟
انية شاطر شاطر
12/ كم عدد الرسائل بالصندوق الوارد ,, وكم عددها بالصادر ؟
10 وارد وصفر صادر
13/ رسالة لن تقوم بمسحها أبداً ولماذا ؟
درجة القياس ورقم الطلب حق البعثات ,,, ليش ,,, للحاجه
14/ ماهو الأسم رقم ((13)) المخزن عندك ؟
FADEL QATIF
15/ ما آخر رسالهـ قمت بأرسآلها ؟
واللي مايقدر وش يسوي ؟

تضامنا مع لابتوبي الذي امتدت له ايدي الفيروسات الغاشمه وتم التعامل معها بالفرمته

قام جوالي بمحاولة الانتحار وذلك بالقفز من يدي على البلاط مما ادى الى ارتجاج بالمخ وهو حاليا في حالة اغماء كلي مع تعرضه لكسر شديد بالوجه وهو يرقد بالعناية المركزه بالصيانة لمحاولة انقاذ مايمكن انقاذه

دعواتكم له بالشفاء العاجل وان يمن الله عليه بالصحه والعافيه جزاكم الله خير

والحمد لله انه هو اللي طاح موب انا >>>>> نذل :d

المشاركة الأصلية كتبت بواسطة الاخطبوط

والحمد لله انه هو اللي طاح موب انا >>>>> نذل :d

هانت عليك العشره يا اخطبوط ؟!



الله يشافي جوالك ويقومه بالسلامة
عشان يرجع ينتقم منك !!

المشاركة الأصلية كتبت بواسطة الاخطبوط

قام جوالي بمحاولة الانتحار وذلك بالقفز من يدي على البلاط مما ادى الى ارتجاج بالمخ وهو حاليا في حالة اغماء كلي مع تعرضه لكسر شديد بالوجه وهو يرقد بالعناية المركزه بالصيانة لمحاولة انقاذ مايمكن انقاذه

يالاخطبوط عندك ثمان ايادي وما قدرت تمنعه من الانتحار :d

يارجال خليه ينتحر أصلا هذي ثاني مره ينتحر فيها والمره الأولى صارت السماعه مشوشه وصار الجوال على قولة الشاويش فريد جوال أبوهندل :d

ان شاء الله ببدله بصديق ثاني قريبا بس خله يطلع من العناية المركزه عشان اصدمه بالخبر الأليم