الموضوع: كما وعدتكم .. تجربتي الشاملة والكامله لأكوردي 2008 فل [ بالصور والفيديو ] .. !

المشاركة الأصلية كتبت بواسطة قوة الأحلام !

الله يعطيك خيرها ويكفيك شرها يارب
بس ياخي ماامداك تكمل 1000 كيلو ومشغل اغاني حرام والله يعني ال1000 كيلو الاولى شغل صورة البقره كامله علشان العين والحفظ من ربك وبعدها اسمع بايديك ورجليك
انا اول ماطلعت الاكورد 2006 طلعتها انا وخويي في نفس اليوم كلهن فل اللهم سيارتي جلد وهو مخمل من طلعتها من الوكاله مريت البيت واخذت الحافظه حقت السيديات وخويي مر التسجيلات الاسلاميه وخذله سيدي سورة البقره وشغلها كامله في ال1000 كيلو الاولى ونا طربان من اول كيلو
النتائج :
انا طقتني عين او مدري وش السالفه تخيل مرتين حصلت معي اذا طلعت من مواقف الكليه القى السياره فيها حكه اي خدش بالفصحى مره لقيته فالصدام ومره فالباب حق الراكب المهم في يوم
قالو الشباب ماسكه عالدمام <<< يلمحون
علما اني من سكان الرياض <<< حلوه علما
قلت قدام ورحنا للدمام وتعشينا وتمشيتا وفلينا ابوها ورجعنا فالرجعه الكارثه دق الشايب وينك
قلت انا قريب قال تعال ودخل السياره بسرعه <<< شاريها من دم قلبه
قلت خويي سيارته خربانه باوديها معه للورشه وباجي <<< نصااااااب يقاله راعي فزعات
قال خلاص المهم توني في بداية الطريق ودعست شوي قامو الدشير يريشون بي واثبت على 220
المهم انا في السيد الوسط قدامي دينا ماشفتها الا يوم وصلت << الشوف شجر
المهم خففت السرعه شوي و ابعدت عنها ويختل توازن السياره واجيب العيد وانقلب 3 قلبات تقريبا وانعدمت الاكورد تشليح والدشير واحد اغمى عليه والباقين جروح خفيفه ونا انكسرت رجلي
المهم الشايب زعل ولا كلمني تقريبا سبوعين والموتر الحين هايلكس غمارتين 98 << حدك
وخويي الى الان وهو معه الاكورد كانه توه مطلعها امس ماشا الله الله يعطيه خيرها ويكفيه شرها
وانشا الله الشايب الله يحفظه بيطق لي اكورد 2008 فل انشا الله وباشغل فيها القران كله مو سورة البقره بس واسف على الاطاله <<< قصة حياتك يابو الشباب
بس من باب الفائده

الحمدلله على السلاااامه

وثلاث قلبات مهيب هينه أبد :(





_______________________________


ماشاء الله تبارك الله


الله يعطيك من خيرها ويكفيك من شرها


موضوعك متكامل !


ومن جد الموتر رووعه

ان شاء الله يمر الترم الاول بسررعه >> في ثالث ثانوي :d


الله يعين