افيدوني قبل اتهور

**RoOt** · 23-08-2007, 03:07 AM

بسم الله الرحمن الرحيم

السلام عليكم ورحمة الله و بركاته

انا يا اخوان ناوي على سيارة جديدة و محتار بين تويوتا اوريون و لومينا LTZ و هوندا اكورد ان شاء الله

لحد يخش في عيني و يقول هوندا اكورد بدون ما يعرف وش ابي

المهم انا ما حطيت السيارات اللي فوق الا على شان شاشة الملاحة

الذكي الحين عرف وش ابي صح

طيب اللي ما عرف وش ابي فبقول له وش ابي

وش ابي ؟

ابي اعرف هل الاكورد 2008 نازلة ان شاء الله بشاشة او لا ؟

اتصلت على الوكالة وقالوا ما ندري قلت الموقع منزلها شاشة و فيها ملاحة

قال هذي لامريكا

و قلت حنا عيال الشغالة ؟ :(

قال مدري اللي بتنزل السعودية ما ندري عنها

قلت متى بتدري عنها طال عمرك

قال بعد العيد

قلت له ترى بشري لومينا لو ما ترد علي ( يقال لي اهدده الحين :d ) قال الله يقويك و يعطييك خيرها و يكفيك شرها :(

يالله علموني ولو طرف علم فيها او اتوكل و اروح اشري لومينا او اوريون

**just 4 u** · 23-08-2007, 03:23 AM

سو اللي في بـالك يا RoOt
أنت حـريقة ما تـنـقرب ..!!!

**ناوينها نية والكورد لؤلؤي** · 23-08-2007, 10:19 AM

وش حلاة الاوريون :$

**ل م س 3 3 4** · 23-08-2007, 10:56 AM

تبي راايي زود فلوسك شوي وخذ افالون وان شاء الله ماراح تتحسف

**BLK** · 23-08-2007, 10:58 AM

لومينا Ltz حلوة

بس الأوريون أحلى

**al3ood** · 23-08-2007, 01:27 PM

افلون احلا واحسن واقوى وسياره اقتصاديه

**يامطنش** · 23-08-2007, 01:39 PM

والله الشباب عطوك المخصر المفيد والقرار لك في الاخير

**RoOt** · 23-08-2007, 02:28 PM

just 4 u

الحمد لله اننا في منتدى موب في شارع منيب قادر اسوي لك شي :d
يالله ابي رايك انت :o

شكر لك على الرد

==

ناوينها و الله الاوريون حلوة بس ما مثل رساوة الهوندا عن تجربة اضافة الى ان الشاشة يقول موظف عبداللطيف جميل انها مهيب شد بلد

شاكر لك على الرد

==

ل م س الافالون حلوة بس ما فيها شاشة وعام 2009 بتتغير كليا

شكر لك على الرد

==

BLK و الهوندا احلى و احلى

ما سويتا شي حيرتني زيادة :(

شاكر لك على الرد

==

العوود مثل ما قلت فوق مشكلة الافالون ان ما فيها شاشة و بتتغير قريب عام 2009 ان شاء الله

شاكر لك على الرد

===

يا مطنش الشباب كل واحد عطى رايه وش رايك انت :d

شاكر لك الرد

يالله انتظر البقية الباقية من الشباب

**الهادف** · 23-08-2007, 02:52 PM

من رايي ..

اورون فل ابشن ..

مكينة 6 سلندر جبارة .. وهدوء .. أضواء زينون بعيدة المدى وشاشة ملاحة .. واشياء كثيرة جداً

**يامطنش** · 23-08-2007, 05:09 PM

والله اذا على رائي توجه لي السيارت الامانيه فيها كل شي دامك راح تدفع مبلغ ضخم وتجه لي المرسيدس من الفئة الصغيره:d
اما اذا على اليابني ودي اقولك هوندا بس ما فيها المواصفات الي انت تحتاجها الاروان خيار جيد او الافلون

**ابوالهنوف** · 24-08-2007, 02:35 AM

اوريون حلووووووووووووو بس جديد وسعرها غاليا.

**صوت المساء** · 24-08-2007, 05:46 PM

اوريون + لومينا = استراليا

هوندا أكورد = اليابان

انت قارن وقرر

**قوه أكورد** · 24-08-2007, 09:11 PM

اصبر على موديل 2008 أكورد

قوه أكورد

**RoOt** · 24-08-2007, 11:33 PM

الهادف اوريون حلوة بس مهيب انوار زينون وشاشة الملاحة على كلام الوكيل انها مهيب شد بلد
يعني تركيب من عنده !
شاكر لك على الرد

==

يا مطنش الالماني ما عليه كلام بس خلال 5 سنوات بدفع ضعف السيارة صيانة و قطع غيار دورية :(
الهوندا اذا اكد لي احد ان الخليجية منها فيها شاشة فانا ناويها ان شاء الله :d
شاكر لك على الرد

==

ابو الهنوف مثل ما قلت للهادف في الاوريون
حلوة و من تويوتا بس مشكلة الشاشة انها مهيب شد بلد :(
شاكر لك على الرد

==

صوت المساء اكد لي ان الهوندا فيها شاشة و انا انوي عليها

شاكر لك على المرور

==

قوة اكورد خيار موفق ان شاء الله بس اذا فيها شاشة
شاكر لك على المرور

**الهادف** · 24-08-2007, 11:38 PM

وش لك بالشاشة انت شد بلد او لا ؟؟

المهم شاشة موجودة وخلاص .. على الأقل هذا وكيل يهتم بأكسسوارات سيارته ..

والزينون الا حقها انا شفته .. لونه أبداع وكذلك حلو ومرتب .. بغض النظر أن كان شد بلد أو لا ...

فيه حل واحد .. استأجر دي السيارات وجربها وشوف الا تنفع معاك ..

**RoOt** · 25-08-2007, 12:11 AM

الهادف اذا كانت شد بلد فانا بستفيد من معلومات السيارة عن طريق الشاشة

يعني معلومات عن الرحلة معلومات عن المكينة معلومات عن ضغط الكفرات الخ

الثاني انها شد بلد بتكون مصممة للسيارة نفسها مهيب مصممة لسيارة ثانية و اركبها

الشي الثالث انها بتكون من المصنع الام يعني اصلية ما تجيب صينية او تايوانية

الشي الرابع وهو الاهم اذا كانت شد بلد بيكون انتل الملاحة مركب من الشركة الام يعني قوي و يعطيك معلومات دقيقة عن مكانك بعكس التجاري اللي يعطيك دقة اقل من الاصلي لان الانتل يكون في نفس الشاشة

اما بالنسبة للزننون فما يهمني كثير ولا حرصت عليه مثل حرصي على الشاشة

شكرا لك

**التراري طاره غير عادي** · 25-08-2007, 02:03 AM

انا عندي الحل خذلك جمس صحن هههههههه بدال ضياعك بين الخيارات

اختار سوبارو الجديده دفع رباعي وممتازه احسن من الدفع الامامي

وشكلها حلو خذ فل كامل ولون كويس انا قاعد افحط ابيها بس ماسمحت الضروف

اسأل عنها وشوف بعيونك انا ما اعرف نوعها ههههههههه

بس هي قريبه من الكورد
ولاتنسى دفع رباعي عشان شوارعنا المتكسره

والله يوفقك

**RoOt** · 29-08-2007, 06:37 PM

التراري انا اهم شي فيها شاشة او لا؟

شكرا

**متواضع** · 30-08-2007, 05:05 PM

خذ اوريون فل بدون شاشة والشاشة عندي شد بلد بس فوق 5000 وعندي صور للشاشة شد بلد والشاشة حقةعبد اللطيف جميل على العموم يزيد 10000 في الشاشة عند عبداللطيف جميل والراي لك

**MonsterX** · 30-08-2007, 07:05 PM

ليش ما اتسوي اخوك موضع تصويت في المنتدى افضل :d.....

لئنه كذا الموضوع مو مرتب وصعب انك تتخذ قرارك بسهولة.....

وبالنسبة لشاشة الملاحة.......خذ لك شاشة خارجية وركبها في السيارة ماراح تتعطل ولا تضيع الطريق:d.....

ولا خلك مثلي انا استخدمه عن طريق الجوال وشاري قطعة الملاحة من محل أكسترا - الخبر....

تحياتي لك
MonsterX

**RoOt** · 30-08-2007, 07:19 PM

اخوي متواضع ورني صورة الشاشة اذا تكرمت

شكرا لك

===

اخوي MonsterX

الشاشة الاصلية مهيب ملاحة فقط و انما عرض لمعلومات السيارة

شف هنا

http://www.toyota.ca/NWS/english/cus...3e_sienna.html

شكرا لك

**كامري 2007 وبس** · 31-08-2007, 01:39 AM

لا تفكر بغير الكامري

**و ى ل السعوديه 8 5 5** · 31-08-2007, 12:54 PM

المشاركة الأصلية كتبت بواسطة كامري 2007 وبس

لا تفكر بغير الكامري

انت وشجابك معنا بالمنتدى...

هذا منتدى اسمه نادي محبي هوندا...

ماقالوا كامري...

**الوااافي** · 31-08-2007, 02:48 PM

مســـــــــــــ الورد ـــاء يا RoOt وكل اللي بالمنتدى

أنا اللي فهمته إنك ما ودك بالأوريون لأنك متردد بسبب إن الشاشة ماهي شد بلد

أما الأكورد إلى الآن ما ثبت هل بتجي بشاشه أولا :( لكن نتمنى

وبالنسبة للسوبارو الليغاسي فيه عرض الآن من الوكيل تجي بشاشه ملاحه وشويه إكسسوارات

تحياتيــ

**الهادف** · 31-08-2007, 03:42 PM

المشاركة الأصلية كتبت بواسطة الوااافي

أنا اللي فهمته إنك ما ودك بالأوريون لأنك متردد بسبب إن الشاشة ماهي شد بلد

أما الأكورد إلى الآن ما ثبت هل بتجي بشاشه أولا :( لكن نتمنى

وبالنسبة للسوبارو الليغاسي فيه عرض الآن من الوكيل تجي بشاشه ملاحه وشويه إكسسوارات

شاشة الملاحة في السوبارو واليجاسي تجي معلقة في الزجاج الأمامي .. ولا اتوقع أنها تعرض معلومات السيارة .. والأكورد مثل ما قالك الرجال ... لين الحين ما فيه خبر أكيد ..

اما أنك تاخذ أوريون أو تصبر للأكورد 2008