بسم الله الرحمن الرحيم
اول اشكرك اخوي على الموضوع المهم جدا
السلام عليكم اخواني بحكم خبرتي المتوسطه في القومات والتزويد اليكم بعض النصائح
اخواني اعضاء منتدى هوندا في سباقات القومات من الصفر الكثير من المفاهيم الخاطئة عند الشباب المزودين اوغير المزودين(سياره استوك )
وكلنا نعرف ان الثانية تفرق والكهربة الضائعة تفرق والهورس بور واحد يفرق واشياء كثير بسيطه
لاكن هذي الاشياء ممكن تضع قومتك او انطلاقتك على المحك ويمكن يطرحك الخصم بسبب هالشي البسيط
يعني الي اقصده مو قومة يارس وبورش اقصد بالقومه بين مازدا ومازدا وكلهم زي بعض اكورد وكامري مثلا
يعني سيارات تكون متشابهه او متقاربة في المكاين وعدد الاحصنه .......
فابدا واقول اول شي الثقة المفرطه وياما ناس دخلت واثقة وراحو بيوتهم مهزومين شر هزيمه فلازم تكون واثق من نفسك وموترك في حد المعقول يعني اعطي موترك حقه ولا تزيد عليه واعرف انت و سيارتك
ايش حجمكم وماهي قدراتكم ومداكم
ثاني شي شيك على موترك قبل السباق والاشياء الي لازم تشيك عليها معروفه مثل :
1- الزيت - يمكن لاسمح الله ناقص او تهريب وما انتبهت وياكثر التهريب في السيارات المزوده .
2- السيور - وانت عارف ان وراك حرق فيمكن في جرح بسيط في السير خاصه سير الدينمو
3 - الكفرات ماتكون ممسوحه او محبله او ذات مقاسات مختلفه
4 - سلامه جميع الدوائر الكهربائيه مثل البواجي والدينمو من القصور الكهربائي
وفي اشياء تختلف على حسب تعديلك والقطع الي انت مضيفها فمثلا مركب فلتر ولك شهرين مانظفته وماشي في الغبره والامطار ومعدوم وتروح تقوم به او هيدرز او اقزوست ويكون فيه تنسيم
وغير الفلتروالاقزوست والهيرز فيه اشياء تحتاج للتشييك وبيطول ذكرها .
الاشياء الثانية الي لازم تسويها وانت راكب في السياره وقبل القومه بالظبط .
1- تطفي اي كهرباء ما تحتاجها مثل المسجل الانوار( الزينون) واي شي يسحب كهرب او يحتاج كهرب ومو ضروري في القومه او سسيتم ساوند
2- تترك السياره في الفاضي يعني مو معشقة وادعس بنزين بس مو للاخير يعني وصل الار بي الى3 او 4 او بالكثير 4.5 وبعدين الدعسه مو متواصله يعني دعسه ورفعه دعسه ورفع كذا مرره وبعد كذا دعسه بطيه الين يوصل الار بي الى 6 او 6.5 بس لا تضغط مرره .
3- بالنسبه للقير العادي شوف الاربي الي اذا كنت داعس عليه والسياره ما تفحط فيه كم مثلا :
سياره اذا دعست الين 7 في الابنص وعشقت تفحط لاكن اذا كنت داعس على 6.5 وعشقت ما فحطت تقوم في الحاله هذي وانت داعس على ال6.5 لان كذا تكسب الوقت لان اذا فحطت تضيع شويه لان فيها رجعة دعسه وفيها تكتيمه ماهي حلوه الا(( الي مركبين تيربو )) بالعكس امغطها الين يقطع البخاخ وقوم لان بالطريقة هذي يشتغل التيربو كامل على حسب لفات العمود .
4- بالنسبة للقير الاوتو فلهذا القير طرق كثيره على حسب الشركات فيه شركات سياراتها فيها مانع انزلاق وبعضها حلو مثل الكابرس فانت تشغل المانع وتنطلق وفيه شركات مانع الانزلاق ماهو قد كذا مثل الفورد الي يقل التسارع اذا شغلت مانع الانزلاق
المهم بالنسبة للاوتوماتيك نقدر نقول ان افضل طريقة هي انك تعشق السياره في الدي وتبقى داعس فرامل ومع دعسة الفرامل تدعس بنزين بس مو تكتم وبعد السباق تروح توضب القير اهم شي دعسة متوسطه
ومع القومه تفك الفرامل او تكون حاطه في الn وداعس تقريبا الين 2.5 او 3 ومع القومه تعشق الd
بالنسبة للتيبو ترونك ما يفرق عن الاوتماتيك شي في القومه لاكن حاول تلاحظ وتحفظ المكان الي عنده يقطع البخاخ بالزبط ولازم تكون متاكد انه يقطع عند المكان الفلاني وتعشق قبلها بثلاث شرطات علشان تعطي الجيربكس وقت للتعشيق لان استجابته مو زي العادي
مثلا يقطع بخاخ سيارتك اذا وصل العداد حق الاربي ام 8 فانت تعشق على ال على 7.7 وفي سيارات بطيئة في التيبوترنك زي الزووم مثلا فانت تعشق على ال7.6 يعني تسبق بشرطه .
وخلاصة كلامي لازم تكون بينك وبين الاربي ام والقير ترجمه يعني كل واحد يجاوب الثاني مع العلم بانه في ملاحضه خاطئه لبعض السائقين يعني تلاقيه داعس على البنزين الين يفصل العداد وهذا خطاء في السرعات العاليه يعني خذ بالاعتبار انه في دعسه ثانيه عندك يعني بعد ال140 ارفع رجلك وادعس مره ثانيه بسرعه فائقه بتلاقي العزم اقوى من الدعسه المتواصله اما في الطرق الغير مستقيمه والتي يلزمها تقليل السرعه وتقليل غيارات القير يجب تجديد الدعسه بعد كل غيار بلحظات لكي يقوم القير بغيار عكسي يعني اذا كان في الرابع يرجع الى الثالث وهذي في القير الاتوماتيك والتيبترونيك.
انتهينا كذا من الاشياء الي انت تسويها باقي اشياء لازم تتاكد منها وتفررررررق كثير
يعني لا تروح تقوم بالسياره وهي فل بنزين افضل شي تكون ربع لان البنزين له وزن ومو خفيف
ولا تروح تقاوم وانت مركب معاك عيال الحاره كلهم في السياره لان الوزن يفرق معك كثيييروالاكورد كفايه وزنها وبالذات 2008 و2009 وانا عن نفسي ولاتضحكون كنت اشيل الاستبنه والمقاعد غير مقعدة السائق طبعا اذا كان في سباق متفق عليه مسبقا
وتاكد من كفرات سيارتك وظغط الهواء ولو تعبيها نيتروجين وتزود الظغط يكون افضل يعني مو تروح تحط الظغط 100 لا خلي ضغط الكفر من 45 الى 50
واذا انت مركب جنط كبير وعندك جنط اصغر ركب الاصغر لانه اخف على السياره ويفرق في العزم معاك كثيروالاكورد 16 او 17 للموديلات الحديثه
حاول قد ما تقدر تكون في استقامه من نقطة البداية الى نقطة النهاية لان كل ما كان المقود في استقامه كلما زادت قدرت المركبه على اختراق الهواء وخروج الاطار من الرفرف يزيد من تعارض الهواء له مع اغلاق جميع النوافذ لعدم دخول الهواء الى السياره بطريقه عكسيه مما يودي الى تقليل اندفاع المركبه الى الامام وخساره بعض الاحصنه
ولا تراقب السياره الي قامت معاك حتى لو كنت في المقدمه بمسافه ركز على نقطة النهاية وعلى الطريق والمفاجئات الي فيه وركز على عددات سيارتك ولا يوصل الاربي ام للخط الاحمر
اذا كنت متفق انت والي تقوم معاه على مسافه طويله مثلا خط اكثر من ربع ميل واكثر من كيلو مثلا طريق نادر احد يمشي معاه وطول الطريق هذا حواالي ال5 كيلو وبتجيبون الطبلون حق السياره
مع ملاحضه انتقاء الطرق السليمه والخاليه من الحفر وان تكون الطريق ليست مرتفعات ومنحدرات بل اختر الطرق المستويه لانه في هذي الحاله بيشكل وزن المركبه عامل مهم جدا جدا جدا
ويوجد طريقة حلوه ومجربه معاي كثيرللسباقات التي لها خط نهايه بس بشرط ان يكون طبلونك قريب من طبلونه يعني مثلا اكوورد 2008 واكورد2007 وشفت انكم بتوصلون مع بعض حاول تجي وراه قبل خط النهاية ب200 متر على الاقل
وتكون قريب بس مو تلحم يعني مسافة متر الى مترين كذا هو بيشق الهواء وانت وراه وممانعة الهواء بتكون في وجه سيارته هو وكلنا نعرف الانسيابية وتاثير وبتلاحظ انك قاعد تجيبه وشوي وتصدم فيه وهو شاد بس الهواء يقلل شدته بس انت لا واذا قربت من النهاية اكتم دبل الدعسه بسرعه ولف قبل لا تصدمه وبتلاحظ ان سيارتك شدت وتعديته بس لو سويتها بدري اضمن لك بعد كم متر بتكونو في نفس المستوى.
اعذروني على الاطاله لان الاشياء الي قلتها كثير وكل شي منها يعتبر موضوع مستقل بس حاولت اجمعها للرد على اخوي صاحب الاستفسار ولباقي منتدى هوندا
باقي اهم حاجه انتبهو من المرور السري لانه ندمت في ذاك اليوم واسالو الي قعدت سيارته الملكه هنادي في الحجز علشان سباق وسمع العسكري الدبه وما طلعت الين فكيت القطع اللي عليها ودفعت جميع القسايم
وساحوني اذا قصرت او اخطاءت واللي عنده اي اضافه ينورنا بها وكل اللي قلته عن تجارب شخصيه وياما خسرت في كثير من السباقات بس الواحد يتعلم
وشكرا لكم :cool:
اخوكم اكووورد مجنونه
