تكفون الفزعة ياشباب : سيارتي 2008 وتنقص زيت بشكل واااضح

عندي أكورد موديل 2008 ( 6 سلندر ) فل كامل ماشية حتى الآن ( 84 ألف كيلو ) شاريها من شهر تقريباً والموتر ماشاء الله تبارك الله رساوه وسرعة وما تعيب عليها شي.

بس لاحظت مؤخراً أن الشكمانين يجي عليهم سواد مثل البودرة ( كربون ) رحت لورشة مختصة بالأكورد ولقيتها مقفلة وحصلت واحد من العمال وسألته وقالي يمكن المشكلة في أحد الحساسات يبيله تغيير وسألني هل سيارتي تنقص زيت بشكل واضح ...؟؟؟

بصراحة ماعمري شيكت على الزيت لأني أغيره كل 4000 كيلو أول بأول قلت له ماتنقص زيت

المهم : بعدها بيومين رحت وشيكت على الزيت وكان وقتها ماشي حوالي 1200 كيلو وانصدمت أن الزيت مابقى منه إلا شي بسيط يادوب يوصلني للبنشري.


والمشكلة الأخرى أن الورشة اللي جيتها قبل كذا بعيده.

فيا شباب تكفون اللي يعرف وش المشكلة ووش حلها يرد علي لأنها بصراحة موترتني كثير أخاف لايكون عندي مشكلة بالشمبر.

ان شاء الله بسيطه


طيب يالغلا ممكن تصور لنا معيار الزيت ويكون علي ارض مستويه والسياره تكون طافيه علي الاقل 3 ساعات

لان ممكن يكون فـ♡ـي خطا فـ♡ـي المعيار وان شاء الله مو نقص



آنــــ į ąɱ ــآ استدخدم زيت كاسترول ماجنتيك 10w40 الي الان ماشي عليه 9500 كم النقص 350 ملل فقط ماشاء الله

ممكن اللي قبلك كان يدعس فـ♡ـي الموتر وهلك المكينه بِــ̯͡سّ لازم نتاكد من المعيار

أشكرك أخي جاكي على التجاوب السريع


أنا لاجيت أشيك على الزيت أشغل السيارة دقيقة دقيقتين وأطفيها وبعدين أمسح العيار وأرجعه ثاني مره وأشيك

المشكلة يالغالي أن يوم أشيك على العيار والسيارة طافية مايطلع معي زيت على العيار أبد بعدها غيرت زيتها إلى ألترا 7 وله تقريباً 3 أيام وماشيكت بصراحة بعدها

وبسألك هل الكربون اللي على الشكمان له دخل بسالفة الزيت وإلا لا ....؟؟؟

كيف تعاير الزيت ؟؟

الطريقه الأولى :
اذا انت توقفها بالليل وتعاير الصبح أو بعد ساعات طويله من توقيفها .. على أرض مستويه تماماً .. المفروض يكون الزيت عند العلامه العلويه UPPER MARK .. واذا ناقص تزيد الزيت شوي على دفعات بسيطه ثم تعاير
وأصبر للزيت ينزل لأنه يحتاج وقت .. يعني لا تعبي وتعاير على طول

الطريقه الثانيه :
أما إذا تشغلها وتحميها ثم تنتظر 4 دقائق تقريبا .. اذا كان الزيت بين العلامه العلويه والسفليه بالوسط .. ما عندك مشكله
لأن الزيت متوزع

اذا كان قريب من العلامه السفليه أو تحتها .. زد زيت

http://www.honda-manuals.org/images/...3/index.63.gif



http://www.honda-manuals.org/images/...3/index.64.gif


و تأكد أن مافيه تهريب من ( صرّة الزيت والسيفون " فلتر الزيت " + غطاء الزيت مغلق بإحكام + عيار الزيت مغلق بإحكام والربله حقته سليمه + حوالين المكينه يمكن تهريب مع الوجيه + بلف التبخير pcv valve + صوف المكينه )

وش الزيت اللي تستخدمه ؟؟ واللزوجه ؟؟ وكم علبه ؟؟

يمكن الزيت مغشوش أو غير مناسب .. بعض الزيوت سيئه تتبخر وتنقص بسرعه

ركب واشر أصلي جديد من الوكاله للصرة ( رخيص جدا لكنه مهم )


بعض البناشر يزيدون الزيت عن العلامة العلويه بالعيار ثم تنفقع صوفه المكينه وتصير تهرب زيت

أحسن شيء أن الواحد يقرأ كتالوج سيارته ويعرف كم تحتاج سيارته بالضبط

لأن اذا كان الزيت زايد فوق العلامه العلويه يضر المكينه والصوف ( ويصير رغوه بالزيت )

طبعا اول شي عشان الكربون الاسود
شيك علي البواجي شوفها كويسه ولا منتهيه ( تشييك وتغيير اذا لزم الامر)
واسلاكها طبعا ( تشييك فقط)
طبعا معروف لازم تغير فلتر البنزين علي 80 الف كيلو
وشيك علي فلتر الهوا
وفي احتمال ان شاء الله ضعيف ( ان ممشي السياره مو حقيقي لاكورد 2008 ) ولكن حبيت احط جميع الاحتمالات
وبالتالي الاستهلاكيات اللي فوق اخذها عمرها وزياده. وهذا مجرد احتمال فقط

لان احد اسباب الكربون فـ♡ـي الشكمان ان خليط البنزين والهوا ماحترق صّـْْ(☑)ـْْحّ

وكمان شيك علي حساس الاكسجين عندك طبعا ادا لمبه المكينه مو شغاله معناه ان شاء الله الحساس تمام
وهذا رابط قد يفيدك بموضوع سواد الشكمان

http://www.toyota4arab.com/forum/t232954.html

زيت الترا سفن 20w50 .. انسى ينقص .. لكن للاحتياط عاير الزيت كل فتره وفتره أو كل 1000 كيلو

انا جربته على سيارتي 4 سلندر ومشيت عليه 6500 كم ولا نقص .. ما شاء الله تبارك الله .. لكن اعاير الزيت كل فتره وفتره للاحتياط فقط

وما أنصح بأن الواحد يمشي على الزيت أكثر من 5 آلاف .. حتى لو ما نقص الزيت


وبالنسبه للشكمان يمكن انك مبطي ما غيرت البواجي أو نظفت فلتر الهواء .. لا تشيل هم

فلتر البنزين يتغير كل 80 ألف < 2007 ونازل

البواجي العاديه الرخيصه تتغير كل 40 ألف < 2007 ونازل

البواجي الغاليه < 2008 وفوق .. على ما أظن تتغير كل 80 ألف أو 100 ألف

فلتر الهواء اذا حسيت انه مكروف غيّره


واذا تبي تحافظ على نظافه البخاخات
اذا جيت تعبي بنزين طف السياره وعب فل

وحاول ما ينزل البنزين عن الربع ( لأن مع الوقت تتجمع أوساخ وشوائب بقاع التانكي ) .. واذا صار البنزين قليل جدا تشفطه الطرمبة ويتوسخ فلتر البنزين وتتوسخ البخاخات

و تدرون أن البنزين له دور بتبريد طرمبة البنزين والمحافظه عليها .. اذا كان البنزين قليل ما يبردها زين

دايم ما أعبي بنزين إلا اذا ولعت لمبة البنزين .. كسل كل شوي اعبي بنزين .. والحمد لله الطرمبة مافيها شيء .. ومافيه أحد يشتكي من طرمبة بنزين الأكورد

الله يجزاكم عني خير الجزاء

يعلم الله أنكم ريحتوني الله يريحكم دنيا وآخرة

بالنسبة لسؤالك أخي Silver Accord

الزيت اللي أستخدمته قبل كان سوبر موبيل 20 50 ويوم شيكت على الزيت لقيته أسود وناقص لكن فيه لزوجة وكان الزيت ماشي تقريباً 1200

الزيت اللي أستخدمه الحين ألترا 7 ( 20 / 50 ) وشيكت عليه قبل شوي ماهو ناقص ولا قلب أسود وماشي حتى الآن 270 كيلو وزيادة

والعلب : 4 ونص مع السيفون