K&N والا Injen والا takeda ?? للنقاش
السلام عليكم ورحمة الله وبركاته
شباب الموضوع ملفت من عنوانو .. انا الصراحة جمعت في الموضوع بين انو يكون موضوع مهم شخصي يفيدني انا
وموضوع عام لكل ملاك الاكورد وايش الافضل والأنسب لسيارة الاكورد خاصة موديلات +2008
والله يا شباب احترت ايش افضل انتيك للاكورد .. من غير ما احد يجي يفتي .. انا احترت في حاجتين ..
احيانا الانتيك الـLong يجي في كثير من السيارات اقوى من الـshort
بس في الاحيان الـshort يكون اقوى وافضل على بعض السيارات
هذي اول نقطة
ثاني نقطة وهيا الصراحة اهم نقطة مشكلة حساس الهوا الموجود في السيارة
اخاف اطلب واحد من بره ولمن يجي تصير مشكلة الحساس عائق قدامي ولا اقدر اركب الانتيك ولا حاجة :(
لكن واحد قالي ان الانتيك الـshort ما يحتاج تشتري قطعة وتولف عليها مدخل الحساس زي الLong
مع العلم انو كل من K&N و Takeda انتيكات الاكورد عندهم كلها Short
ثالث نقطة هيا نوع الشركة .. الى الان والافضل الصراحة هذولا الثلاتة
k&n - injen - takeda
طبعا اكيد اكثركم مهو عارف شركة takeda بس الصراحة هذي الشركة هيا الافضل من بين الشركات اللي ذكرتها واللي ما ذكرتها كمان
لانو اعطت للأكورد 08 ال4 سلندر على الداينو 13 حصان يا شباب وهذي مهي بسيطة
ونوع الانتيك كان short
وتعطي لل6 سلندر14 حصان ونوعو short وتقارير الداينو موجودة في موقعهم ويرفع الtorque +14
اما بالنسبة للـ k&n ححصر الكلام فقط على الـ6سلندر .. طبعا الموجود نوعية الـshort وتعطي على الداينو 10.23 حصان
واما injen اعتقد حصب ما افتكر انو تعطي 9 احصنة
والموجود عندنا في محل السيارة الرياضية يقلك اركبلك K&N اصلي وكل شئ قدامك تشوفو يوحيلك انو اصلي الصراحة
حتى الكرتون اللي فيلو الانتيك والفلتر .. بس الصراحة في موقع K&N مافي Long للـ اكورد 6 سلندر الجديدة
وغير كدا شكلو يختلف في نفس الانتيك ونفس لون الانتيك
والصراحة سار في بالي ان اللي في السيارة الرياضية مو مضمون واحسو مو اصلي
يعني بالعربي احسو (( كوبي ))
والى الان من الارقام والفيديو اللي شفتو في اليوتيوب عن الـtakeda تشير الى انها افضل شركة صنعت انتيك للاكورد الجديدة من حيث القوة اما من نحية الجودة اعتقد برضو بتكون جودتها عالية
ولكم الحكم .. انا الصراحة محتار وخايف اطلب شئ واتورط فيه :(
والموضوع وضع للنقاش يا شباب
اتمنى من الكل يناقش ويتكلم وفي انتظار ردك يا خالد على أحر من الجمر
تحياتي
مواقع النشر (المفضلة)