هل أسعار قطع غيار أكورد 2008 - 2012 نفس الأسعار لإني سامع إنه أرخص
وماسبب غلاء قطع غيار أكورد 2006 - 2007
مساعدات - كراسي مكينه - كراسي قير - غطاء راديتر - الخ...
السلام عليكم ورحمة الله وبركاته
كل عام وانتم خير ؛؛ اللهم بلغنا رمضان
اليوم 1434\8\30 رحت للوكاله ومحلات قطع الغيار وسألت عن الأسعار ؛ وشريت كم قطعه
سيفون أصلي وكاله بـ 20 من محل قطع غيار هوندا
غطاء راديتر من الوكاله سعره قبل الخصم 81 ريال وبعد خصم 10% صار سعره 72.9 ريال
وأسعار المساعدات بالوكاله الله لا يوريكم
سعر طقم مساعدات أماميه قبل الخصم بـ 1935 ريال ؛ و بعد خصم 10% صار سعرها 1759 ريال ؛ وبعد خصم 20% صار سعرها 1548 ريال ...... ناااار !!
سعر طقم مساعدات خلفيه قبل الخصم بـ 1868ريال ؛ و بعد خصم 10% صار سعره 1698 ريال ؛ وبعد خصم 20% صار سعرها 1494.4 ريال ....... ناااار !!
يعني سعر طقم أمامي + طقم خلفي .. قبل الخصم 3803 ريال .. بعد خصم 10% صار سعرها 3475 ريال ؛ بعد خصم 20% صار سعرها 3042.4 ريال .... ناااار !!
حشا والله لو أنها مصنوعه من ذهب
المهم أخذت غطاء ريديتر أصلي من الوكاله ورقم القطعه
( ويا ليتني أخذته من محلات قطع الغيار سعر الأصلي الوكاله بـ 60 ريال تقريبا بدون مكاسر ؛ وسعر الياباني 25 ريال )
وعند محل قطع غيار هوندا مساعدات 4 أنواع :
أصلي وكالة و سعره أرخص من الوكاله لكن ما سألت عنها ؛ يمكن الحبه تقريبا بـ 600 ريال على ما أظن
ياباني KYB أو TOKICO هيتاشي
صيني
وهذي الأسعار بالتفصيل الممل .. من محل قطع غيار هوندا
مساعدات KYB الحبه الواحده بـ 190 ريال × 4 مساعدات = 760 ريال
مساعدات TOKICO هيتاشي الحبه الواحده بـ 175ريال × 4 مساعدات = 700 ريال
مساعدات صينيه الحبه الواحده بـ 125 ريال × 4 مساعدات = 500 ريال
سير أصلي وكاله من محل قطع غيار هوندا بـ 170 ريال وفيه ياباني بـ 90 ريال
شداد سير كامل أصلي وكاله من محل قطع غيار هوندا بـ 400 ريال
وفيه شداد كامل صيني بـ 200 ريال لكن ما نصحني فيه حق محل قطع الغيار يقول أنه أحيانا تركبه وبعد ساعات قليله ينطلق السير ؛ وأحيانا بعد كم شهر ينطلق السير ... يعني أنت وحظك ونصيبك ؛ ويقول الأصلي أفضل بكثييير ويدوم لسنوات طويله
طقم كراسي مكينه أصليه وكاله من محل قطع غيار هوندا بـ 1000 ريال ؛ والطقم التجاري إذا ماني غلطان بـ 400 ريال
طقم كراسي قير عادي أصلي وكاله من محل قطع غيار هوندا بـ 400 ريال
سيفون أصلي وكاله بـ 20 ريال
سيفون ياباني بـ 15 ريال ؛ لكن ترا السيفون الأصلي أفضل
ملاحظه :
غطاء الراديتر شريته وراح اغيره إذا غيرت ماء الراديتر ان شاء الله ؛ مجرد صيانه وقائيه
والغطاء مافيه شيء
أيه صح نسيت أقولكم سعر غطاء تانكي البنزين قبل الخصم 250 ريال تقريبا وبعد الخصم بـ 200 أو 190 ريال تقريباً ( نسيت سعره بالضبط ) لكن المهم أنه غالي ؛ حافظوا عليه وأنتبهو عليه لا ينسرق
محل قطع الغيار اللي رحت له ما عنده غطاء بنزين ولا يدري كم سعره
التعديل الأخير تم بواسطة THE SILVER ACCORD ; 09-07-2013 الساعة 06:49 PM سبب آخر: إضافة المزيد من الأسعار
هل أسعار قطع غيار أكورد 2008 - 2012 نفس الأسعار لإني سامع إنه أرخص
وماسبب غلاء قطع غيار أكورد 2006 - 2007
لا تاخذ ( مقلب ) بأن قطع غيار الأكورد 2008-2012 أرخص من الموديلات القديمه 2007 ونازل ..
و اتوقع تختلف الأسعار ولا تكون نفسها إلا في بعض الأشياء المشتركه بين موديلات الأكورد ؛ مثل فلتر المكيف وفلتر زيت المكينه والخ... تركب على أغلب موديلات الأكورد
طقم بواجي أكورد 2007-2003 بـ 60 ريال وتتغير كل 40 ألف أو أكثر .. أرخص بكثييييييييير من الموديلات الجديده 2008-2012 بواجيها غاليه جدا وأريديوم تتغير كل 80 أو 100 ألف
فلتر هواء الأكورد 2003-2007 جاف بدون زيت وتقدر تنظفه بسهوله بالهواء المضغوط ويخدم ويكرف ؛ أما الموديلات الجديده 2008-2012 أتوقع فلتر الهواء يكون عليه زيت ويمسك الغبار وتنظيفه اصعب اذا كان زيت
الأكورد 2008-2012 بعض قطع غيارها أغلى من الأكورد 2007-2006 .. وبعض القطع نفس الأسعار .. وبعض القطع (إحتمال وغير متأكد) ممكن تكون أرخص
أضف إلى ذلك كراسي الأكورد 2008 وفوق .. السته سلندر v6 سعرها غاااااااااااالي جدا جدا للأسف
أما كراسي مكينة الأربعه سلندر أسعارها أرخص بكثير من السته سلندر V6
أسعار المساعدات غاليه جدا ومبالغ فيها جدا سواءاً للأكورد 2007 ونازل أو 2008 وفوق .. و سبب غلائها هو >> وكيل هوندا في السعوديه
لكن الحمد لله فيه بدائل كثيره ومن شركات كثيره للمساعدات .. عند محلات قطع غيار هوندا .. يعني لا تشيلون هم أبداً
وترى فيه عند محلات قطع الغيار مساعدات أصليه وكاله .. وبسعر أرخص من الوكاله ؛؛؛؛ بالإضافة إلى نوع كثيره من المساعدات ومن شركات متخصصه بصناعة المساعدات مثل KYB و TOKICO هيتاشي
أنا كتبت الموضوع للفائده .. و عشان أنبّه الناس اللي ما يعرفون شيء إلا الوكاله ( أنا منهم سابقاً ) ؛ كل شيء يشترونه من الوكاله ثم يتّشكون من غلاء ( بعض ) القطع مثل المساعدات
لكن بالواقع .. فيه خيارات كثيره للمساعدات بمحلات قطع غيار هوندا وبأسعار معقوله جداً جداً
وترى قطع غيار هوندا تتحمل الكرف وعمرها طويل ؛ أغلبها صناعتها يابانيه وجودتها عاليه ؛ وحتى بعض القطع اللي تكون ( تجميع امريكي مثل فلتر زيت المكينه ) مواصفاتها يابانيه وجودتها ممتازه
يعني لا تقارنها بسيارات قطع غيارها مصنوعة بأندونيسيا أو تايلاند أو الخ...
ولا ودي يخرب الموضوع ويكون مقارنات بين 2007-2003 .. و .. 2008-2012
إن شاء الله ( إذا قدرت ) بجيب لكم بعض أسعار قطع غيار الأكورد 2008-2012 اللي أقدر عليها
لكن والله مشغول + الجو حر أعوذ بالله 45 درجه تقريبا
التعديل الأخير تم بواسطة THE SILVER ACCORD ; 09-07-2013 الساعة 02:38 PM
يعطيك العافية يا سلفر
الاسعار نار ياااااا حبيبي نار
حبيت اذكر معلومة اني مره كنت بقطع الغيار بالوكالة وشفت واحد طلب مساعدات امامية ل2008 وحسبوها ب500 للمساعد !
وقبل اسبوع تقريباَ سألت عن فحمات امامية ل2013 قالي ب350 بعد الخصم ومع الخلفية تطلع 600 ! على كذا اشتري فحمات السيراميك
ما اقول الا الله يعيننا على هذا الوكيل
السلام عليكم
صراحه تقرير طيب وماقصرت على المجهود
بس عندي تعليق بخصوص القطع خلنا نجيب مثلا شركه تيويتا مويقولون رخيصه وقارن بالاسعار انا سألت عن الكراسي فقط وطلعت اغلى من الاكورد وبأمكانك تتاكد
ثاني شي انا سيارتي ماشيه الان 400 الف رجلي ثقيله ومعذبها مطبات وحفر ولله الحمد ماعمري بدلت مساعد ولاربل ((بعكس التيويتا لها عمر افتراضي قليل لازم تبدلها بعد فتره ))
بخصوص القطع اللي ذكرتها ماتنفع تاخذ تجاري ومانصح خصوصا غطا الرديتر يكتبون عليه ياباني بس هوتصنيع صيني رديئ ويطلع عليهم ب10 ريال ولايكمل معاك شهر وخطر على السياره
والكراسي والمساعدات وغيرها لاتاخذ الا اصلي هذي اشياء ميكانيكيه عليها ضغط كبير لازم تركب شي اصلي ولاتركب وحتى من التشليح ماتنفع ماعدا المساعدات ممكن تضبط معاك اذا ماكانت ناشفه
وشكرا
مواقع النشر (المفضلة)