حبيبي italian-boy , في عندك شوية معلومات مغلوطة أحب أوضحلك هيا عشان تكون في الصورة .
مكاين الأكورد إللي قلت للرجال عنها هي من الفئة K و أنا أقصد مكاين الأكورد موديلات 2003 - 2005 و حتى 2009 و كلها 4 سلندر و ليست 6 سلندر لأن سلسلة الـ 6 سلندر تنتمي لعائلة الـ J . هذي نقطة ....
بالنسبة لمكاين هوندا التي تتحمل التيربو في عندك كثير و اذكر منها أمثلة فقط " المشهورة " :
مكاين الـ K خصوصا الـ K24A4 و الـ K24A2 و على القمة طبعا K20A .
مكاين الـ B و المشهورة منها B16 الخاصة بالـ CRX و B18 الخاصة بالـ Integra . و تعتبر من أقوى محركات هوندا في التعديل رغم حجمها الصغير .
مكاين الـ F و الأفضل فيها و الأكثر شهرة في التعديل F22A .
مكاين الـ H و طبعا H22A الخاصة بالبريليود مكينة غنية عن التعريف و من أكثر محركات هوندا سهولة في التعديل و تعديلها منتشر بصورة جيدة في الخليج . و هالمكينة تتحمل التيربو , أصلا حلاة التعديل عليها تيربو , السيارة بتصير مصروعة و شايفة قوة جبارة و أقدر أجزم و بأكد على كلامي إنو في أكورد موديل 93 موجودة في القطيف معدل طبعا تيربو على 16PSI و هذا رقم بصراحة لنا الفخر إنو توصله هوندا موجودة بالسعودية .
و على قصة تشبيك الضفيرة للسيفيكات القديمة , العالم مليانة و صارت تشبكها في بيوتها من سهولة التسقيط و التشبيك , أنا أعرف واحد شابك مكينة H22A على سيارته في البيت و غالبية الشباب في جدة يعرفوه , بس أخذت منه وقت لأنه يشتغل عليها براحته و ما واجهته إلا مشكلة حساس الثروتل بدي , تعبنا لين حصلناه في التشليح بس مدري ركبه و لا لأ , لأن سعره جديد بالوكالة 3000 ريال , السيارة عليها فل هوائيات و ماشالله مستوى السيارة جبار , نزل الرياض و جرب مع لومينا SS ستوك , طلع عليها قومة و خط بفرق حلو ....
مكينة الـ K24A4 أتذكر واحد من أصحابنا كان معاه سوبرا 1JZ معدل 450 حصان و سافر ماليزيا يدرس هندسة محركات , الرجال كان يقول بيعو سياراتكم التعبانة , اللحين بعد ما درس و تعلم و فهم غير رأيه بعد ما أشترى كتاب عنوانه و كل كلمة فيه تتكلم عن سلسلة مكاين الـ K-series , إللي هي محركات أكورداتنا
فكرة تركيب الـ V6 هذي سووها برى و على سيفيك قديمة كمان , أكيد كان في تعديلات لكن الديكور الداخلي ما وصله شي , و معليش يوم يقولكم بيجيب ياباني أنا منكم أقل شي أنزل إللي برجلي على راسه و انتم بكرامة , هذا تلاقيه ما يفهم و ما عمره ربط مسمار بحياته ... روحو عند حمزة , كلايد و شوفو وش بتحصلو عندهم , مشاريع لين تتعبوا و خصوصا كلايد .
لعلمكم , مكينة LS1 كانت مشروعي قبل ما تتشلح سيارتي و كانت بتكلفني 18.000 ريال كاملة مع الهوائيات و البرمجة , و أقصد كاملة يعني سيارتي أكورد LS1 تمشي في الشوارع .... بس حصل إللي حصل و راحت السيارة و حاليا بأفكر في الـ LS2 .
أخوي italian-boy أتمنى أكون وضحت و اثبت لك وجود قطرة في بحر محركات هوندا الجبارة . و إنشالله تكون النقاط وضحت لك , إحنا هنا بنفيد و نستفيد من بعض و بنتبادل خبراتنا و تجاربنا , مو عيب نغلط في شي إسمو تعلم , نتعلم من بعض و لهذا وجد شي إسمو منتدى .
تحياتي لك حبيبي
أخوك : خالد .
مواقع النشر (المفضلة)